Tu si F ai tau A so EF KA S · Tamaseko i le pupula mai le lagi, sa pa ¶Ì o ia i le eleele ma...
Transcript of Tu si F ai tau A so EF KA S · Tamaseko i le pupula mai le lagi, sa pa ¶Ì o ia i le eleele ma...
Tusi Faitau Aso EFKAS
IULAI – TESEMA 2020
TUSI FAITAU ASO
EKALESIA FAAPOTOPOTOGA KERISIANO I AMERIKA SAMOA 1 Kanana Fou St, Pusa Meli 1537, Pago Pago, Amerika Samoa 96799
+(684) 699-9810 https://efkasonline.org
Fa’aliliu e le Ofisa o le Lamepa
Ofisa Tutotonu EFKAS Livigisitone Nu’usila Samuelu FS
Usugafono Satele FFS
Iese Faavaoga AKF
Edward T. Semaia AKF
Emau Petaia FSP
Maliliega mo lenei Fa’aliliuga
O lenei Tusi Faitau Aso ua mafai ona lolomia ona o se maliliega i le va o le Ekalesia Faapotopotoga Kerisiano i Amerika Samoa (EFKAS) ma le International Bible Reading Association (IBRA), ua aumaia ai le fa’atagaga e
fa’aliliu lana tusitusiga Peretania, “Fresh from the Word: A Bible for a Change 2020,” i le gagana Samoa. Talu ai fa’afitauli e masani ai le fa’aliliuina o gagana, e i ai vaega o lenei fa’aliliuga Samoa e le o mafai ona maua le
uiga atoatoa o manatu ma mafaufauga o loo aumaia i le gagana Peretania. Peita’i, o le agaga maualuga i le Ofisa Tutotonu o le EFKAS, fa’apea le Ofisa o le Lamepa sa feagai ma lenei fa’aliliuga, ia mafai ona maua e
tagatalotu o le EFKAS se punā’oa fa’aleagaga o loo utuvai ai le to’atele o tagata Kerisiano i le lalolagi, e fai ma ta’iala mo aso faiso’o e fesoasoani i lona soifua tapua’i ma lona ola su’esu’e i le Afioga Paia a le Atua.
2
Aso Lulu - Iulai 1: “O le ofo i le fa’aaliga a le Atua” Tusi Faitau - Sapakuka 1:1-14 (The shock of God’s Vision)
Matua - f.5: “Ia outou va’ai atu i nu’u ese ma ia outou iloa ma ia matuā
taufaiofo lava; auā ou te faia se galuega i ona aso o outou, e ui lava ina
tala’ina atu, tou te le talitonu ai lava.”
O le fuaiupu e 5, o se vaega lea o le tali a le Atua i le sa’i a le perofeta o
“Sapakuka” – o le uiga o lona igoa i le gagana Eperu, “ia fusifusia.” O le
fa’atuatua o Sapakuka i le Atua, e le gata na maua ai e ia le lototele e fa’aleo
lona tete’e i faiga lē amiotonu o tagata i lona vaitaimi, ae na lototele ai foi e
sa’i i le Atua, pe aisea ua nofoa’i ai a o fa’ateteleina le amio leaga o lona nuu.
A sa’i le tagata i le Atua, o lona uiga, ua le talitonu o ia i le pule a le Atua o
loo fa’agasolo ai mea e tutupu i le olaga, ma, ua naunau le tagata e fia uumia le
pule lea, na te pulea ai mea e tutupu ina ia talafeagai ma lona mana’o. O le sa’i la o Sapakuka, masalo sa manatu le perofeta o le a tu’u mai e le Atua le pule ia
te ia e fofō ai le amio leaga o tagata i lona vaitaimi. Peita’i, e ese le fofō na
finagalo ai le Atua, ma, na matuā ofo ai foi ma le perofeta – o le a laga e le Atua
ma fa’aaoga le nu’u o Papelonia e ui atu ai lona to’asā ia Isaraelu!
O ala o le Atua, e le o ala ia o le tagata. E ui o ala e ofo ma fa’ate’ia ai le
tagata i le tele o taimi, ae tatau pea ona tatou sauni e “fusifusia” ia ala, e pei o
le uiga o le igoa “Sapakuka.”
Tatalo: Le Atua e, o loo e fusifusia i matou e le aunoa i ou ‘auala. A’oa’o
mai ia matou iloa ona tu’u atu mea uma i ou aao, Amene.
Aso Tofi - Iulai 2: “Va’aia se lalolagi fou” (Seeing a new world)
Tasi Faitau - Galuega 9:1-19 Matua - ff.5-6: “Ona fai atu lea o ia, ‘Le Alii e, o ai ea oe?’ Ona fetalai mai
lea o le Alii, ‘O a’u o Iesu, ua e sauā mai i ai....Tu ia oe i luga, ina alu ia i le
aai, ona ta’uina atu lea ia te oe o le mea e tusa ona e faia.”
O Saulo sa ma’elegā i lona mulimulita’i i le lotu o Iutaia, lea na avea ai o
ia e fai ma ta’ita’i i le sauāina o le ‘au Kerisiano. Ina ua taia Saulo i le ala i
Tamaseko i le pupula mai le lagi, sa pa’ū o ia i le eleele ma tauaso ai i aso e 3.
I lona fa’asoa ma le Alii Toetu, na amata ai ona iite Saulo i le sesē o lana
va’aiga sa i ai, aemaise le sesē o talitonuga sa ma’elegā ai.
O aso e 3 na tausao ai, e le taumate o le taimi lea na mafaufau loloto ai
Saulo i lana fetaia’iga ma le Alii Toetu ma le lē talafeagai o lona olaga sa ola
mai ai. Na i’u ai ina salamō; ua iloa le sesē o lana va’aiga sa i ai ma le olaga
sa ola ai, ma ua tatalo i le Atua ina ia suia lona olaga. O iina na toe fa’apupula
ai e le Atua lana auauna, ma va’aia ai e Saulo se lalolagi fou e ese mai le
lalolagi tuai sa ola ai. O tatou lagona ea le suifofoga o le Atua o loo valaau
mai? O tatou va’aia ea se lalolagi fou, poo e fiafia pea i le lalolagi tuai?
Tatalo: Le Atua e, fa’amagalo lo matou tauaso fa’aleagaga, ma se’i e
fesoasoani mai ina ia manino la matou va’ai atu i le mea moni, Amene.
3
Aso Faraile - Iulai 3: “Susulu malamalama” (Shining bright)
Tusi Faitau - 1 Korinito 13 Matua - f.12: “Auā o ona po nei tatou te va’ava’ai ai fa’anenefu i le fa’aata,
a o ia ona po tatou te fesaga’i ai; o nei ona po ou te iloa ai fa’aleatoa, a o ia
ona po ou te iloa tino ai, pei ona iloatinina o a’u.”
A puaōa ma nenefu le va’ai o le ave ta’avale i le auala tele, e fa’aola molī o le ta’avale e sulugia ai le ‘auala, ina ia manino ai le va’ai o le ave ta’avale,
ma saogalemu ai le fa’afoeina o le taavale. E fa’apea foi le ola fa’aleagaga; a
nenefu ma puaōa le va’ai fa’ale-fa’atuatua, e tatau ona i ai se molī e fa’aaogā e
fa’amanino ai le fa’afoeina o le soifua fa’aleagaga o le tagata.
O le tusi atu o le Aposetolo i le Ekalesia i Korinito i le mataupu e 13, o
loo fa’atāua ai le alofa – o se tasi lea o “molī” e fesoasoani i taimi e puaōa ai
le va’ai fa’ale-fa’atuatua o le tagata. Mo Paulo, o le Atua e ala ia Iesu, o foliga
va’aia lea o le alofa – a o le alofa e susulu malamalama. A susulu le alofa o le
Atua i o tatou olaga e pei o le susulu o le La, ona tatou iloa tino lea o le Atua,
ma silafia foi e le Atua i tatou. Peita’i, e puaōa pea ma nenefu pea le va’ai a le
tagata i le tele o taimi, talu le agasala. Finagalo le Atua ina ia suluia i tatou i le
Lā o le Amiotonu, e avea ai i tatou ma sulu e susulu atu ai Lona alofa i Lana
foafoaga ma le lalolagi atoa.
Tatalo: Le Atua le Lā o le Amiotonu, susulu mai ia ia te i matou, ina ia
matou iloa ona alolofa atu i lau afio ma lou foafoaga, Amene.
Tuto’atasi a Amerika
Aso Toona’i - Iulai 4: “Va’aia le miti” (Beholding the dream)
Tusi Faitau - 1 Timoteo 6:11-21
Matua - f.11: “A o oe, le tagata o le Atua e, ia e sola ese i ia mea; a ia e
tausisi atu i le amiotonu, ma le amio Atua, ma le fa’atuatua, ma le alofa, ma
le onosai, ma le agamalu.”
Apoapoa’i Paulo ia Timoteo, ia to’aga e miti i le ola e fa’avavau, auā o
iina na te malamalama ai i le mafuta mai o le Atua. O lona uiga, o le miti e le
o se fa’aaliga e va’aia i le taimi e moe ai. A o le fa’aaliga na te vavaoina le
tagata mai le fia moe – o le fa’atusa o le nofo agasala. O loo taumafai Paulo e
pu’e le uiga moni o le miti e olaina i totonu o le malamalama o le Atua, auā o
le ata tonu lea e tatau ona mulimulita’i ai le olaga fa’a-Kerisiano.
I totonu o le tusi faitau, e 13 lelei vaepe o loo ta’ua e Paulo ia Timoteo e
mafai ona fa’atino ai le miti lea. E talafeagai foi veape ia mo i tatou i nei ona
aso: sola ese, tausisi, tau le taua, tago atu, tautino atu...ma isi. O le valaauina
e avea ma soo o Iesu, o le valaau e sola ese mai le amio leaga, ae ia tausisi i le
olaga o le ofo atu atoatoa, usiusita’i, onosa’i, fa’atuatua, alofa atu i isi, galulue
fa’atasi, feoeoea’i, ma le fa’aaloalo o le tasi i le isi.
Tatalo: Le Atua o miti, fesoasoani mai ina ia matou tausisi atu i mea silisili, e
fai ai i matou molimau ola i le oo mai o le malo i le lalolagi, Amene.
4
FAITAUGA I LE TUSI O NUMERA
1 – Femalagaa’i i le Vao
Aso Sa - Iulai 5: “Le Atua femalagaa’i” (A travelling God)
Tusi Faitau - Numera 4:4-16 Matua - f.15: “Pe a uma foi ona ufiufitia e Arona ma ona atalii le mea
paia....mulimuli ane ona ulu ane ai lea o le fanauga a Koato e ave ai; ae ‘aua
ne’i latou papai atu i se mea paia, ne’i latou oti.”
A o femalagaa’i Isaraelu i le vao, e le gata sa tapena lava le tagata ia i ana
mea e malaga ma ia, ae sa feavea’i ai foi ma le fale fetāfa’i a le Atua. O le
fale fetāfa’i – o le afioaga lea na afio mai ai le Atua e lotolotoi fa’atasi ma ona
tagata; o le afioaga e sili ona paia. O le fa’ailoga va’aia lea o le mafuta mai o
le Atua, ma lona fa’amaoni i lana feagaiga na osia ma lona nu’u o Isaraelu.
O tala o i le tusi o Numera, o tala o le malaga ese o Isaraelu mai le oti i
Aikupito, ae aga’i atu i le ola i le nu’u folafolaina. A o lei taunuu Isaraelu i le
nu’u folafolaina, sa aumau i le vao – le nofoaga o tiga ma tofotofoga. A o le
feavea’iga o le fale fetāfa’i, o le mautinoa lea mo Isaraelu, e lotolotoi le Atua
ma i latou. O le fa’amoemoe ola foi, o loo latou malaga fa’atasi ma le Atua.
Tatalo: Le Atua e, e te lotolotoi ma i matou e ala i le Agaga Paia, tatala la
matou va’ai i lou fa’atasi mai mo i matou i lenei aso, Amene.
Aso Gafua - Iulai 6: “O le fa’amanuiaga fa’a-ositaulaga” Tusi Faitau - Numera 6:22-27 (The priestly blessing)
Matua - ff.24-26: “Ia fa’amanuia oe e le ALII, ma ia na tausi ia te oe; ia
fa’amalamamaina e le ALII ona fofoga i luga ia te oe, ma alofa atu ia te oe; ia
fa’asaga mai le ALII ona fofoga ia te oe ma tuuina atu ia te oe le manuia.”
O le “fa’amanuiaga fa’a-ositaulaga,” o upu ia sa fai ma fa’amanatu ia
Isaraelu i fa’amanuiaga a le Atua sa latou maua i aso faiso’o. E fa’amanatu
mai ai le tāua o le mafutaga a le tagata ma le Atua. E liligi mai e le Atua ana
fa’amanuiaga. E fa’asaga mai foi ona fofoga alofa ia te i tatou i aso uma. O le
taimi e tautala ai le ositaulaga i upu ia, o le fa’amanatu lea mo Isaraelu i le
Atua e sili ona latalata mai, ma e laualuga i lona finagalo le fa’amanuia atu.
O le fa’amanuia atu, o se aga e le masani ai le tele o aganuu. Aisea e
fa’amanuia atu ai, pe a leai se taui e maua mai ai? O le fa’amanuia atu, o le
meaalofa lea o le alofa tunoa. O le auala lea e fa’amanuia mai ai le Atua ia te i
tatou; o le mafuaaga foi lea e tatau ona tatou fa’amanuia atu ai i isi.
Tatalo: Le Atua o fa’amanuiaga, susulu mai ou fofoga alofa, matou te iloa ai
ona fa’asoa atu au fa’amanuiaga i isi, Amene.
Aso Lua - Iulai 7: “Tausisia le Paseka” (Keeping the Passover)
Tusi Faitau - Numera 9:1-14
Matua - ff.1-2: “Ua fetalai mai foi le ALII ia Mose i le vao o Sinai, i le masina
5
muamua o le tausaga e lua talu ona latou o maim ai le nuu o Aikupito, ua
fa’apea atu, ‘Ia faia e le fanauga Isaraelu le paseka i ona po ua tuupoina ai.”
O le Paseka, o le tausamiga e sili ona tāua mo Iutaia. E fa’amanatu ai le
fa’atoilaloina o Farao ma le galuega ofoofogia sa faia e le Atua, e laveaiina ai
Isaraelu mai le nofo pologa i Aikupito. E ui na fa’amanatu i tausaga uma, ae
mo le Iutaia, e le o se mea e fa’apa’ole ona fai. A fa’amanatu le Paseka, e
tatau i le Iutaia ona fa’amanatu e pei o ia lea sa i ai fa’atasi ma le augatupulaga
lea o loo nofo pologa i Aikupito, ma fa’atalitali i le Atua ma lana galuega
lavea’i. O le tāua o lea faiga, ina ia avea le fa’amanatuina o le Paseka e fai ma
“fa’amanatu ola,” e autu i le fa’amoemoe e toe fa’atino lava e le Atua lana
galuega lavea’i mo tagata Iutaia i nei ona aso.
Mo le Kerisiano, o le Paseka e fa’amanatu ai le maliu ma le toetu o Iesu.
O Iesu o le mamoe o le paseka na ofoina mai lona soifua e fai ma taulaga mo
agasala. A o le Paseka foi, o le fa’ailoga o le manumalo ma le pule aoao o le
Atua i le agasala ma faiga o lenei lalolagi e tetee i lana pule.
Tatalo: Iesu e, fa’aaoga i matou mo lou galuega fa’aola i le lalolagi, Amene.
Aso Lulu - Iulai 8: “Ao fa’a-afi” (Cloud of fire)
Tusi Faitau - Numera 9:15-23 Matua - f.15: “O le aso na fa’atuina ai le malumalu na ufitia le malumalu i le
ao, o le fale fetafai lea ua i ai le tulafono; o le afiafi foi sa i luga o le
malumalu o le mea ua tino mai peiseai o le afi, ua oo i le taeao.”
O le ao sa i luga o le fale fetāfa’i, o le fa’ailo lea o le mamalu o le Atua sa
lotolotoi ma Isaraelu a o femalagaa’i i le vao. E le gata na folafola e le Atua le
laveaiina o Isaraelu mai le nofo pologa i Aikupito, ae na folafola ai foi ma lona
lotolotoi fa’atasi ma i latou – lea na fai ai le fale fetāfa’i. O le mamalu o le
Atua, o loo fa’amatalaina e pei o le ao ma le afi e nofo i luga a’e o le fale
fetāfa’i. O le ao ma le afi, ua na o ni ata fa’a-fa’atusa ua fa’aaoga e le tusitala
e fa’amatala ai le mamalu o le Atua, auā e le mafai e le gagana fa’ale-tagata
ona fa’amatalaina atoatoa. O le mea tāua, sa molimauina e Isaraelu le ‘auai
mai o le Atua e ala i lona mamalu, i mea uma sa latou femalagaa’i ai. A o le
mamalu foi lea o le Atua, faimai le Evagelia o Ioane, sa liutino tagata e ala ia
Iesu, ma sa mau fa’atasi ma i tatou.
Tatalo: Le Atua e, afio mai ma lotolotoi mai e ala i lou Agaga Paia, ina ia
matou iloa lou mamalu i mea uma matou te faia, Amene.
Aso Tofi - Iulai 9: “O le vala’au a le pu ario” (The silver trumpet call)
Tusi Faitau - Numera 10:1-10 Matua - f.8: “O atalii o Arona o ositaulaga la te ilia pu; e fai foi lenei ma
tulafono ia te outou i a outou tupulaga a le tu a le tu lava.”
Mo Isaraelu, o le tāua o le iliina o le pu ario, e fa’ailo ai se fa’aaliga tāua
poo se fa’alavelave fa’afuasei ua tulai mai. E pei foi o le logo o le falesa pe a
6
ta – o le fa’ailo lea i tagata o le a amata le sauniga lotu. Poo se fa’aipoipoga
poo se sauniga masani o le Aso Sa, o le leo o le logo pe a ta, o le fa’ailo lea i
tagata latou te iloa ai o loo i ai le falesa e latalata ane ia te i latou, ma o loo i ai
foi le Atua i le lalolagi na te leoleo ma puipui i ona tagata.
E i ai foi taimi e mana’omia ai e le tagata fa’atuatua se fa’ailo e fafagu ai
lona ola fa’aleagaga. O lenei fa’ailo e mafai ona auala eseese mai; pe auala
mai i se fautuaga a se isi, poo se mea faigata e feagai ma le tagata, poo se mea
foi e tupu i le soifuaga. Poo a lava ‘auala e ui mai ai le fa’ailo, e tatau ona
tatou fa’alogo ma le manino, poo le a le finagalo o le Atua mo i tatou.
Tatalo: Le Atua e, ia ili leo tele le pu ia lagona i le lagi ma le lalolagi, matou
te mautinoa ai e te le o tuulafoaiina i matou, Amene.
Aso Faraile - Iulai 10: “Manai i le vao” (Manna in the wilderness)
Tusi Faitau - Numera 11:4-9 Matua - f.8: “Na feoa’i le nu’u ma fa’aputu ai, ona latou ola ai lea i ma’aolo,
ma tu’i i le tanoa, ona latou tunu ai lea i pani, ma fai a’i potoi, o lona nanamu
e pei o le nanamu o le potoi ua palua ma le u’u.”
O le lona lua lea o tala e fa’atatau i le manai i le vao. O le tala muamua e
i le tusi o Esoto, ina ua tu’ua e Isaraelu le nu’u o Aikupito ma malaga atu i le
vao. Na sa’i Isaraelu ona o le leai o se mea ‘ai. Ae saunia e le Atua le mea
alofa o le manai e tausi ai lona nu’u. O le ata lea o le fa’amaoni o le tausiaga a
le Atua. A o le tala lea i le tusi o Numera, ua le lāvavā tagata i le ‘aai so’o i le
manai. Ua tele tausaga o tamilomilo Isaraelu i le vao, ma ua toe fa’asolo ai o
latou manatu i tua i Aikupito, e sa’oloto ma pule lava i latou i le mea e ‘aai ai.
E manatua mea lelei sa ‘aai ai i Aikuptio, ae galo nimo ai le ola pologa sa
soifua ai i lalo o le pule sauā o Farao. A o le manai, o le mea alofa a le Atua e
fa’aauau pea mo ona tagata, e tausia ai i latou seia o’o i le nu’u folafolaina.
Tatalo: Le Atua e, fafaga i matou i le areto o le ola e ala i lou alo, Iesu
Keriso, ma ia matou iloa ona fa’asoa atu lou areto i isi o loo fia ‘aai, Amene.
Aso Toona’i - Iulai 11: “O Toeaiina e 70” (The seventy elders)
Tusi Faitau - Numera 11:10-17, 24-30 Matua - f.17: “Ona ou alu ifo ai lea ta te tautala ma oe i lea mea; ou te avea
foi nisi o le agaga o loo ia te oe, ma ou tuuina atu ia te i latou; ona latou
tau’ave ai lea fa’atasi ma oe le avega o le nu’u, ina ia e le avea to’atasi.”
Mo Mose, sa le faigofie le olaga i le vao. Sa taumafai lava Mose e
mulimulita’i i fa’atonuga uma mai i le Atua, ae ua le mapu le nu’u i le sa’i ma
le fa’atuatua itiiti. Ua le lavā Mose. Ua fiu i le faia to’atasi o le galuega
fa’ata’ita’i. Sala la lona sa’i i le Atua, “O ou tagata ia, faitalia oe ma tausi!”
Sa fa’apea ‘ai o le a fa’atula’i Mose ae filifili e le Atua se isi ta’ita’i mo
lona nu’u. Ae peita’i, ua vala’auina e le Atua isi tagata o le nu’u, o toeaiina e
70, e fai ma fesoasoani ia Mose ina ia māmā ai lana avega. Ua tu’uina e le
7
Atua lona Agaga i toeaiina ia, ua latou perofeta ane ai i le nu’u. O lenei mea
ua faia e le Atua, o loo manino ai lona finagalo, na te le tu’una ana auauna na
o i latou i le mamafatū o le galuega. E pei ona mana’omia e Mose se
fesoasoani mo le galuega, e fa’apena foi i tatou ua valaauina e le Atua.
Tatalo: Le Alii e, fa’amalumalu mai lou Agaga, matou te faia ai lau galuega
fa’atasi ma le fesoasoani mai o nisi ua e tofia, Amene.
FAITAUGA I LE TUSI O NUMERA
2 – Taimi o le Tofotofoina
Aso Sa - Iulai 12: “O le tau o le sa’olotoga” (The cost of freedom)
Tusi Faitau - Numera 11:18-23, 31-34 Matua - f.18b: “...auā ua outou fetāgisi i fofoga o le ALII, o loo fa’apea mai,
‘O ai se na te aumaia ia te i matou o manu matou te ‘aai ai?’ Auā sa lelei i
matou ina o i Aikupito.”
Ua fa’asolo le faitauga i le tusi o Numera i lenei vaiaso i mataupu e 11-25,
o loo aumaia ai le ata o Isaraelu e lei leva ona laveaiina e le Atua mai i
Aikupito, ae ua amata ona sa’i. O tala ia i le tusi o Numera, e fa’afeagai ma
tala e maua i le tusi o Esoto. Peita’i, e fai si tūgā o le ata o le Atua ma le ata o
Isaraelu o loo aumaia i tala ia i le tusi o Numera O Numera o loo aumaia ai le
ata o Isaraelu fa’atuatua itititi ma sa’i i taimi uma, ma le ata o le Atua e tali atu
ma le to’asā. Masalo e mafua ona fa’apea auā o tala ia i le tusi o Numera, sa
tu’u fa’atasia i le taimi na foi ai le tafeaga mai i Papelonia a o tauivi pea le nuu
ma le fesili, pe aisea sa fa’aleagaina ai le malumalu. O le tali sa i’u i ai lo
latou tauiviga: o le to’asā lea o le Atua ona o lo latou fa’atuatua itiiti. O le ata
la lea o le Atua e tali ma le to’asā ona o le fa’atuatua itiiti o lona nuu, o loo
fa’amamafa mai e le tusi o Numera.
I se isi foi va’aiga, o tala ia o loo aumaia ai le feau: o le malaga ese mai le
ola pologa e aga’i atu i le ola saoloto, e tumu i lu’itau, aemaise le tofotofoga e
pa’ū ai pea le tagata: o le toe tepa i tua ma toe fia fo’i i tua i mea sa sau a’i, e
tusa lava pe oti ai. O le fa’alagolago i le Atua, e lavātia ai e le tagata ia lu’itau.
Tatalo: Le Atua e, e le taugofie le tau o le ola sa’oloto, ae sei e fa’amanatu
mai ia i matou lou manuia o i le lumanai, e maua i le ola sa’oloto, Amene.
Aso Gafua - Iulai 13: “O le fa’aaogāina sa’o o le pule”
Tusi Faitau - Numera 12:1-15 (The right use of power)
Matua - f.2: “Ua la fai ane, ‘Ua na o Mose ea ua fetalai mai ai le ALII? E le
o i ma’ua foi ea ua fetalai mai ai o Ia?’”
E le na o Mose, ae na fetalai foi le Atua ia Arona ma Miriama i isi taimi
mo le fa’atinoga o lona finagalo. A o lo la fa’aleaga ma lo la faitio ia Mose
ona o lona fai to’alua i le fafine o nu’uese, e le talafeagai lea ma le finagalo o
le Atua. O lenei tala o loo fa’amanatu mai ai le tāua o le ta’ita’i e loto maulalo,
8
ma le fa’autautaga poto i tagata e mulimulita’i. Ua fa’atusa Mose i le ta’ita’i loto maulalo. Ae ona o le leai o se fa’autautaga poto ia Arona ma Miriama, ua
tali le Atua i lo la fa’aseā e fai ma ‘auala e fa’ataotoga sa’o ai le tulaga o le
pule: muamua le Atua, ae lona lua ai Mose.
O le aga’i ese mai i le ola pologa e aga’i atu i le ola sa’oloto, e
fa’aosoosoina ai ta’ita’i e fa’aaoga sesē le pule ua latou maua. E fa’apea foi i
tagata mulimuli, ua seetia gofie i latou i ta’ita’i ona ua leai se fa’autautaga
poto. O le ta’ita’i ma tagata na te ta’ita’iina, e i ai lo latou matafaioi e
fetausia’i ai le isi i le isi.
Tatalo: Le Atua e, puipui mai o’u laugutu mai i upu oona, ma fa’ama’ati lau
fa’alogo i le upu moni, e sa’o ai lo’u fa’aaogaina o le pule, Amene.
Aso Lua - Iulai 14: “Faitau le tau” (Count the cost)
Tusi Faitau - Numera 13:1-3, 17-29 Matua - ff.1-2a: “Ua fetalai mai foi le ALII ia Mose, ua fa’apea mai, ‘Ia e
aauina atu tagata, latou te asiasi le nuu o Kanana...”
Fa’ataunuu e Mose le fa’atonuga a le Atua i le tofia o le ‘au asiasi latou te
asia laueleele o le nuu folafolaina, poo se laueleele e fua lelei, ae poo ai foi ni
tagata o nonofo ai. O le tulaga lea ua faia e Mose, e pei o le fetalaiga a Iesu i e
ua fia avea ma ona soo – ia faitau lelei le tau pe gafatia.
E i ai le tau o le ola sa’oloto. E ui ina tiga le ola pologa, ae e i ai ona
tulaga mautinoa e ono fiafia i ai le tagata; e pei o mea e ‘ai ai, o le ta’u e
ta’uina ai, o uo, ma isi mea. A o le aga’i atu i le ola sa’oloto, e aga’i atu i le
mea e le o mautinoa. E alu pogisa. E tuu fesili i taimi uma. E leiloa poo fea o
le a i’u i ai. A o le tāua lea o le fa’atuatua i le Atua. Lafoai i le Atua mea uma
e le o mautinoa ai, na te ta’ita’ia le tagata i lona aga’i atu i le ola sa’oloto.
Tatalo: Le Atua faimalaga, saunia i matou mo lu’itau o le a matou fetaia’i ai a
o matou aga’i atu i le ola saoloto, Amene.
Aso Lulu - Iulai 15: “Palota lau fa’amoemoe” (Vote your hope)
Tusi Faitau - Numera 13:30–14:10a
Matua - f.31-32a: “Ona fai ane ai lea o ia tagata na o a’e ma ia, ‘Tatou te le
mafaia ona o a’e e tau ma lena nuu, auā e sili lo latou malosi i lo tatou’. Ua
latou fai tala leaga mai foi i le fanauga a Isaraelu i le nuu na latou asiasi i ai..”
E i ai pea le ‘au fa’aleaga ma le ‘au tetee e tautatala i upu tau fa’afefe. O
tagata ia e fiafia e fa’amata’u i isi tagata, e ala i le faia o tala fa’atupu ma tala
pepelo. A o le to’atele foi o tagata i nei ona aso, ua se’e gofie i tala pepelo ma
tala tau fa’afefe, ae ua le se’i fa’aaoga lelei le mafaufau sa foaiina mai e le
Atua e fetuunai ai pe sa’o ia tala pe leai.
O le galuega fa’a-ta’ita’i, o le taumafai e fa’atupu le filemu i le ta’ita’iina o
tagata i se fa’amoemoe fou. Peita’i, e i ai taimi e fiu lava e fa’atonutonu le
tagata fefe, e le mafai lava. Na o le mea e inosai ai le ta’ita’i, e pei ona inosia
9
Mose ma Arona ina ua aumai le ripoti i tagata o loo aumau i le nu’u folafolaina.
A o le mafaufau e fetuuna’i ma le loto e ofoina atu atoatoa, fa’atasi ai ma le
naunau e fai le mea sa’o ma taofiofi i le fa’amoemoe ola; o mea ia manaomia e
tetee atu ai le fefe e fa’atupu e tagata tau fa’aleaga ma tala pepelo.
E masani sui tauvā i faiga fa’aupufai ona faia fa’amatalaga e fa’aleaga ai
isi sui tauvā, e fa’atupu ai le fefe i tagata palota. Ae moni ai le saunoaga a le
isi sui tauvā sa fai i le ‘au palota: “Palota lau fa’amoemoe, ae le o lou fefe.”
Tatalo: Le Atua o le sa’olotoga, fa’atuputele lou naunau i le ola sa’oloto, ma
lo’u lototele e tetee atu ai tagata tau fa’afefe ma tala pepelo, Amene.
Aso o le Fu’a Manu’atele Aso Tofi - Iulai 16: “Mavae atu le tasi augatupulaga” (One generation dies)
Tusi Faitau - Numera 14:10-24
Matua - ff.20-22: “Ona fetalai mai ai lea o le ALII, ‘Ua ou fa’amagaloina atu
e tusa ma lau upu; ae peita’i, o loo ola a’u, e fa’atumuina lava le lalolagi uma
lava i le mamalu o le ALII;”
Ua faula atoa le fa’amoemoe o Isaraelu mo le nu’u folafolaina. Ua pa’ū le
to’asā o le Atua ia Isaraelu ona o lo latou fa’atuatua itiiti. Ua folafola ai e le
Atua le lē o’o o le augatupulaga lea sa omai mai Aikupito i le nuu folafolina,
ae na o le tupulaga fou lea sa fananau a o femalagaai Isaraelu i le vao.
O le ata lea o le Atua to’asā. Masalo o se fa’amamafa lea a le tusitala i le
taimi na tuu fa’atasia ai ia tala i le taimi na foi mai ai le tafeaga i Papelonia, e
fa’amatala le mafuaaga o le tafeaga: o le to’asā o le Atua i lona nuu ona o lo
latou fa’atuatua itiiti. Ae fa’amata e sa’o lea tulaga i nei ona aso: o le fasiotia
o se tupulaga atoa ona o lo latou fa’atuatua itiiti? E le faigofie le ata o le Atua
lea e aumai i le tala lea. Ae e i ai taimi e manaomia ai ona fa’ailoa le itu lea o
le Atua, aemaise mo tagata agasala, ina ia salamō ai ma fulitua mai le leaga.
Tatalo: Le Atua e, a’oa’i mai i matou ina ia matou iloa ona tautala atu i lou
alofa, ma fa’atino i lo matou ola i aso faiso’o, Amene.
Aso Faraile - Iulai 17: “I le mana o ai?” (By whose power?)
Tusi Faitau - Numera 20:1-13 Matua - ff.10-11: “Ona aofa’i lea e Mose ma Arona o le fa’apotopotoga i
luma o le papa, ona fai atu ai lea o ia ia te i latou, ‘Ina fa’alogologo mai ia o
outou ē ua fouvale, ma te fa’atafeina mai ea le vai a’i lenei papa mo outou?’ Ona sii ai lea e Mose o lona lima, ma ta fa’alua atu i le papa i lona tootoo...”
Ua mavae atu le tala i le mafuaaga na le o’o ai le augatupulaga a Isaraelu sa
omai mai Aikupito, i le nuu folafolaina. A o le tala lenei, o loo fa’amatala ai le
mafuaaga na le o’o ai Mose, le ta’ita’i o le augatupulaga lea. Faimai le tala, e
lei fiafia le Atua i le mea na ta fa’alua ai e Mose le papa, a ua le tautala atu i le
papa e pei ona fa’atonuina ai e le Atua. Ua manatu ai Isaraelu, o Mose lea e
ona le mana lea na tafe mai ai le vai mai le papa, ae le o le Atua.
10
Soo se ta’ita’i lava ua filifilia e le Atua, e tatau ona manatua le mea e pogai
mai ai lona mana fa’a-ta’ita’i. Auā o le ta’ita’i lava ia, e leai sona mana. Na o
le mana o le Atua, na filifilia ai le ta’ita’i. A o’o ina māmāsagia le ta’ita’i i ona tiute fa’a-ta’ita’i ma le manuia e maua mai ai, e faigofie lava ona
fa’asesēina lona mafaufau ma manatu ai e fa’apea: o lona mana ma lona
malosi na mafua ai. A o le galuega a le Atua, na o le Atua e foaiina le mana i
ana auauna e fa’atino ai le galuega.
Tatalo: Le Atua moni e to’atasi, a fa’amaualuga o’u lagona i tofiga ou te galue
ai, aumaia se fa’amanatu mo a’u, ua na o le efuefu pe a aunoa ma oe, Amene.
Aso Toona’i - Iulai 18: “Fa’asaga a’e” (Facing up)
Tusi Faitau - Numera 21:4-9
Matua - f.8: “Ona fetalai mai ai lea o le ALII ia Mose, ‘Ia e faia se gata uogo,
ma tu’u a’e i luga i se laau, ona ta’itasi ai lea mo ola o ē ua ūtia pe va’ava’ai
atu i ai.’”
O le sa’i pea o Isaraelu ma lo latou fa’atuatua itiiti i le Atua, na fa’asala ai
e le Atua e ala i le auina atu o gata uogo, ua feūtia ai le to’atele ma feoti ai.
Ona tatalo lea o Mose i le Atua e fa’ailoa le salamō o le nu’u, lea na fa’atonu
ai e le Atua e fausia se gata apamemea e tu’u i luga o se laau. O tagata uma e
feūtia, ia fa’asaga a’e i le gata apamemea ona fa’aolaina lea. E leai se tāua tele
o le gata apamemea i le tala. A o le mea tāua lea o loo aumaia e le tala, o le
gaioiga e ‘fa’asaga a’e’. O le fa’asaga a’e, o le fa’asaga lea i le Atua. A o le
fa’asaga i lalo, o le fa’asaga lea i le agasala. Ua leva ona fa’asaga i lalo
Isaraelu a o femalagaai i le vao, e ala lea i lo latou sa’i ma lo latou fa’atuatua
itiiti. A o le “fa’asaga a’e,” o le fa’asaga lea i le Atua ma le fa’atuatua.
Fa’asaga i le mea o loo afio ai le Atua. Fa’asaga ese mai le ola pologa, ae
fa’asaga a’e i le ola sa’oloto. O le finagalo lea o le Atua ma lona nu’u. Ua
iloa tausaga o fa’asaga pea i lalo. A o le finagalo o le Atua, ia fa’asaga a’e i le
ola fa’atuatua ma le talitonu ia te ia.
Tatalo: Le Atua o fa’amalologa, aumaia le loto manino ma le loto tele ou te
mafai ai ona ou fa’asaga a’e i lau afio, ma fa’asaga ese mai le agasala, Amene.
TAPENAGA MO SE FA’AMOEMOE FOU
40 Tausaga o le EFKAS
Aso Sa - Iulai 19: “Ne’i galo ia te oe le Atua” (Lest you forget God)
Tusi Faitau - Teuteronome 8:11-20 Matua - f.11: “Ia oe, ne’i galo ia te oe le ALII lou Atua, i lou le tausi i ana
poloaiga, ma ana fa’amasinoga, ma ana tulafono, ou te fai atu ai ia te oe i le
aso nei.’”
O le tausaga 1980 na faia ai le ulua’i Fono Tele i Tutuila na fanau mai ai le
EFKAS. O lenei tausaga, 2020, aemaise o lenei Aso Sa sa fa’apea e amata ai le
11
Fono Tele XXXIII, e atoa i ai le 40 tausaga o le EFKAS. Ua le fa’ataunuuina
lea fa’amoemoe talu ai le fa’ama’i o le coronavirus. Ae o le a fa’amanatuina le
atoaga o le 40 tausaga o le EFKAS i faitauga o aso ta’itasi o lenei vaiaso.
O le 40 tausaga e le o se taimi itiiti. I le amataga mai o le EFKAS, sa tele
lu’itau ma vao filifili sa feagai ma le Ekalesia. E to’atele foi Tamā ma Tinā ua
taooto mai i atu tia, sa latou asaina le vao filifili lea. E le tatau ona fa’agaloina
a latou galuega, auā o lo latou tautigā, lea ua tatou manuia ai. E pei o upu a
Mose, a o sauni Isaraelu e ulufale i le nuu folafolaina e talitaoto fa’amanuiaga
e leai so latou malosi na alu ai, “Ia oe, ne’i galo ia te oe le ALII lou Atua...”
Tatalo: Le Alii e, ia matou manatua lou agalelei mo i matou e ala i galuega sa
faia e o matou matua ua mavae atu, lea ua matou sapi ai i le manuia, Amene.
Aso Gafua - Iulai 20: “Ua o’o i le taimi e tu’ua ai le mauga”
Tusi Faitau - Teuteronome 1:1-8 (Time to leave the mountain)
Matua - f.6: “Na fetalai mai le ALII lo tatou Atua ia te i tatou i Horepa, ua
fa’apea mai, ‘Ua leva lo outou nonofo i lenei mauga.”
40 tausaga o tapena ma sauniuni e le Atua lona nu’u o Isaraelu mo le
ulufale atu i le nu’u folafolaina. O le mae’a ai o le 40 tausaga, e amata ai le
tusi faitau o lenei aso: o le apoapoa’iga a Mose i lona nu’u ina ua o’o i le taimi
ua tatau ai ona latou ulufale atu i le nu’u folafolaina. Amata le apoapoa’iga a
Mose i le fa’amanatu ia Isaraelu le fetalaiga a le Atua sa faia i luga o le mauga
o Horepa, “Ua leva lo outou nonofo i lenei mauga.”
O le masani o le tagata, a umi ona nofonofo i se mea ua fiafia ma masani
ai, na te le toe fia alu ese ai, e tusa lava pe afai e le o sona nofoaga moni lea. E
peisea’i o le tulaga lea ua o’o ia Isaraelu. 40 tausaga o nonofo i le vao, ma ua
fiafia ai lava ma masani ai. Ae lilo ia Isaraelu, e le o le vao lo latou nofoaga
moni. Aumai e Mose le fetalaiga a le Atua sa faia i Horepa, e fa’amanatu ai ia
Isaraelu, ua tatau nei loa ona fa’atino le fa’amoemoe ua ala ai ona nonofo i le
vao i le 40 tausaga: o le saunia o i latou mo le ulufale atu i le nu’u folafolaina.
O le a se feau o aumai mo le EFKAS i le atoa ai o lona 40 tausaga?
Tatalo: Le Atua e, fa’ailoa mai lou taimi ua tatau ai ona matou tu’ua mea tuai
ua matou saofafa’i ai, ae saili lou finagalo i mea fou, Amene.
Aso Lua - Iulai 21: “Ta’ita’i e le Agaga Paia” (Led by the Holy Spirit)
Tusi Faitau - Luka 4:1-13
Matua - f.1: “Ua fo’i a’e Iesu mai Ioritana, ua tumu o ia i le Agaga Paia,
ona ta’ita’iina lea o ia e le agaga i le mea tu’ufua.’”
Molimau le ‘au Sinopi (Mataio, Mareko, Luka), e sosoo fa’atasi tala i le
papatisoga a Iesu ma le tala i lona fa’aosoosoga. O tala ia o loo fa’atomua ai
le amataga o le galuega tala’i o Iesu. O lana papatisoga, na fa’amautūina ai
lona ta’u, o ia o le Mesia le Alo o le Atua. A o le tala i le fa’aosoosoga, na
tapena ai ma saunia ai o ia e le Agaga Paia mo lana galuega tala’i.
12
Molimau foi le ‘au Sinopi, faimai e 40 aso sa fa’aosoosoina ai Iesu i le
vao. E pei o le “40” tasuaga sa tapena ai Isaraelu i le vao, ua aumai foi e le ‘au
Sinopi le numera 40 e fa’ailoa mai ai, o fa’aosoosoga o Iesu o le tapenaga mo
se fa’amoemoe fa’apitoa. Mo Isaraelu, o le tapenaga mo le ulufale atu i le nuu
folafolaina. Ae mo Iesu, o le tapenaga mo le amataina o lana galuega tala’i. O
le Atua sa ta’ita’iina Isaraelu i le vao. A o Iesu, sa ta’ita’iina e le Agaga Paia.
O le aulia o le 40 tausaga o le EFKAS, e mafai ona fa’atusa ia Isaraelu i le
vao ma le fa’aosoosoga o Iesu – o le tapenaga o le EFKAS, e ala i le ta’ita’iiga
o le Agaga Paia, mo se fa’amoemoe fa’apitoa. A o le fesili, “O le a lea
fa’amoemoe fa’apitoa?”
Tatalo: Le Agaga Paia e, ta’ita’i lau Ekalesia ma ou tagata ina ia matou
manino ai i le fa’amoemoe ua e valaauina ai i matou, Amene.
Aso Lulu - Iulai 22: “Va’ai i lugā, ae galue i ‘autafa” Tusi Faitau - Galuega 1:6-11 (Look vertically, but work horizontally)
Matua - f.11a: “Ua la fai mai, ‘O outou tagata Kalilaia e, se a le mea tou te
tutū ai ma va’ava’ai i le lagi?’”
O le toe fa’aali lea o le Iesu Toetu i lona ‘ausoo, a o lei afio a’e i le lagi.
Molimau le ‘aufaievagelia, e 40 aso e va a’i le toetu o Iesu, ma lona afio a’e i le
lagi. O lona uiga, o aso ia e 40 na fa’aali ai Iesu i lona ‘ausoo, e i ai le fa’amoe-
moe fa’apitoa sa tapena ai e Iesu lona ‘ausoo: o le fa’aauauina o lana galuega.
O le tusi faitau o lenei aso, o loo fa’ailo mai ai e le tusitala o Luka se tasi o
‘auala e fa’aauau ai e le ‘ausoo le galuega lea. Ina ua afio a’e Iesu i le lagi, na
fa’aali agelu i le ‘ausoo, “Se a le mea tou te tutū ai ma vaavaai ai i le lagi?”
O le faitioga a agelu i le ‘ausoo, talu ai, o le galuega lea ua tuuina mai e Iesu
latou te fa’aauauina, e le o se galuega e fa’atino i le tūtū ma va’ava’ai i lugā i
le lagi. E leai se mea e leaga ai galuega e autu i le va’ava’ai i lugā (vertically)
– o le feso’otaiga a le tagata ia ma le Atua. Ae manatua, o le galuega foi e
autu i le va’ava’ai i ‘autafa (horizontally), e fa’atino i tagata o loo moomia le
fesoasoani. Fa’amata e le o le tulaga lea e tatau ona i ai le misiona a le
EFKAS? Po ua tele i galuega e va’ava’ai i lugā, ae itiiti galuega e fai i ‘autafa?
Tatalo: Keriso toetu, a’oa’o mai ina ia matou iloa o la matou mafutaga ma lau
afio, matou te iloa atili ai la matou mafutaga ma isi, Amene.
Aso Tofi - Iulai 23: “O le a o’o mai le suiga” (A change is gonna come)
Tusi Faitau - Filipi 1:19-26
Matua - f.19: "…auā ua ou iloa e i’u lea mea i lo’u lavea’iina, ona o la outou
fa’atoga, ma le fesoasoani mai o le Agaga o Iesu Keriso."
O upu a Paulo, “auā ua ou iloa e i’u lea mea i lo’u laveaiina,” o loo
fa'ailoa mai ai lona mautinoa, e i ai le mea lelei e tupu mai i lona tulaga
fa'aletonu o loo i ai nei. O le manatu lea a Paulo e aumai i le tusi o Iopu 13:16,
lea na fa’apea ai Iopu i ana uo, na te le tuulafoa’ia lana talitonuga i le lelei o le
13
Atua, e ui i faigata o loo feagai ai. O le tala lea ia Iopu na maua ai e Paulo le
lototele ma le mautinoa i lona laveaiina, a o saisaitia ai i le falepuipui.
E pei ona ta’ua i le f.19, e lua mea na fa'avae ai le mautinoa o Paulo. Mua-
mua, o le fa’atoga o le ‘au uso i Filipi mo ia; auā o le fa’atoga na te suia ai mea
e tutupu i le lalolagi. Lua, o le ‘au fa'atasi mai o le mana o le Agaga Paia ia te
ia. E ui ina talia gatā i nei ona aso le ituaiga mautinoa lea sa atagia ia Paulo, ae
telē se a’oa’oga o loo aumaia ai, e fa'apea: o le valaauina o le Kerisiano, e lē na
o le nofonofo ma fa'amoemoe ia tupu mai se mea lelei. Ae tatau ona fa’atoga
atu i le Atua ma galue ma le loto atoa, e fa'atupu lea mea lelei. Afai e moomia
ni suiga fou, e lē maua pe a nofonofo. Ae tatalo i le Atua ina ia maua le malosi
ma le loto tele, e galue e fa'atino ai ia suiga.
Tatalo: Le Alii e, foa’i mai i o matou tagata ma lau Ekalesia se suiga fou e
tāua ma lelei, ia tusa ma lou finagalo, Amene.
Aso Faraile - Iulai 24: “Fa’atino i ala o le Atua” (Doing it God’s way)
Tusi Faitau - Numera 23:1-12
Matua - f.8: “Pe fa’apefea ona ou fetuu i lē ua le fetu’uina e le Atua? Pe
fa’apefea foi ona ou fa’afano i lē ua le fa’afanoa e le ALII?”
Ua taunuu Palaamo i Moapi ma ua feiloa’i ma le tupu o Palako. Ua mua-
mua fa’atutū fata faitaulaga ma sauni le osiga o taulaga i le Atua, e pei o faiga
masani pe a o’o i le taimi e sailia ai se finagalo o le Atua. Sa manatu Palako o
le a fetu’u e Palaamo le fanauga a Isaraelu e pei ona aami ai o ia. Ae na
fa’ate’ia Palako, ina ua saunoa Palaama i le upu fa’amanuia, ae le o upu fetu’u.
Ua fa’atino e Palaamo lana galuega i ala o le Atua. Poo le a le naunau mai
o le tupu o Palako e faia nisi ala, a o le auauna moni o le Atua, e le mafai ona
alo ese mai i ala o le Atua, e tusa lava pe inosia ai o ia.
E le o tagata uma e fiafia i ala o le Atua, aemasie pe a feteena’i ala ia ma
mea o loo mafaufau i ai. Ae mo le auauna moni o le Atua, e le mafai ona alo
ese ma ala o le Atua. O se lu’itau lea mo i tatou, le ‘aufaigaluega filifilia a le
Atua. O tatou fa’atino ala o le Atua, e tusa lava pe inosia ai i tatou e isi? Poo
tatou faia ala e manuia ai na’o le tagata ia, ae le o le finagalo lea o le Atua?
Tatalo: Le Atua fetalai, taofi mau i a’u upu, ina ia ou tautala i ala ma ou
fa’atinoa ou ala i mea uma ou te faia, Amene.
Aso Toona’i - Iulai 25: "O fuafuaga a le Atua e pei o le aniani."
Tusi Faitau - Ioane 20:10-23 (God’s plans are like an onion)
Matua - ff.18-19: "Ua alu atu Maria le Makatala, ua fa’apea atu i le au soo,
‘Ua ou iloa atu le Alii, ua ia fa’ailoa atu foi ia te i latou ua fetalai mai e ia o
ia mea ia te ia…Na potopoto ai le au soo, ua maliu atu Iesu ua tu i totonu."
O fuafuaga a le Atua pe a fa'aali mai, e mafai ona fa'atusa i le aniani: e
lē fa'aalia uma mai i le taimi e tasi, ae auaua'i lona fa’aali mai i vaega, e pei o
le aniani pe a fofo'e. I le tala a Ioane, sa fa'ateletelegese le fa'aali atu o Iesu i
14
ona soo. E o'o foi ia Maria le Makatala, na te lei iloa Iesu i le taimi na fa'aali
mai ai. E tele isi taimi na toe fa'aali ai Iesu i ona soo, ae taualuga ia Peteru i
le vai o Kalilaia. O le uiga o le manatu, e lei fa'aali atoa Iesu i lona 'ausoo i le
taimi e tasi, ae na fa'aali 'auaua'i. Aisea? Ina ia mautinoa le 'ausoo, e lē na o
le amataga ma le fa'aiuga latou te fetaia'i ai ma Iesu – a o taimi uma! O taimi
uma latou te galulue ai e fa’atino le galuega, e fa'atasi Iesu ma i latou. E
auaua'i le fa’aali mai o ana fuafuaga paia, e fa'atupu ai le mautinoa i le tagata,
e i ai foi lona ia pito laau tauave i fuafuaga ia a le Atua.
Tatalo: Le Atua e, fa'amalamalama i ai matou le tāua o au fuafuaga, ina ia
matou iloa la matou sao e tatau ona galuea’iina, Amene.
TAMO’EGA O LE TU’UGA
1 – Fa’afouina i le Agaga
Aso Sa - Iulai 26: “Tali atu fa’a-Tasi” (Answering as one)
Tusi Faitau - Esoto 19:1-9
Matua - f.8: “Ona tali fa’atasi mai lea o le nuu uma, ‘Matou te faia lava mea
uma ua fetalai mai ai le ALII...”
O le tali atu fa’atasi o le nuu ia Mose ma le fetalai mai o le Atua, o le ata
manino lea o le nuu ua tasi! O se amataga lelei lea mo Isaraelu talu ona
malaga ‘ese mai i Aikuptio, aemaise i le osiga o lo latou feagaiga ma le Atua.
O le tali atu fa’atasi, o le ata manino lea o le nuu ua loto gatasi ma galulue
fa’atasi i le fa’atinoina o se fa’amoemoe. E lei leva atu ona latou molimauina
le fa’aolataga tele sa faia e le Atua ina ua laveaiina i latou mai i Aikupito. E
leai la se tali e sili atu mo Isaraelu e fa’atino ai lo latou loto atu fa’atasi i le
Atua ma lana feagaiga, nai lo le ifo ma tapuai atu i le Atua.
O le Aso Sa lenei sa fa’apea e tapunia ai le Fono Tele XXXIII. E le gata o
se taimi lelei lea e toe tepa ai le Ekalesia i le 40 tausaga lea sa aga’i mai ai, a o
se avanoa lelei foi e tepa taula’i ai poo fea o le a aga’i ai i le isi 40 tausaga o
lumanai nei. E le faigofie. E le mailoa foi poo fea a i’u i ai. Peita’i, ua aumai
e le tusi faitau o lenei aso le fa’amoemoe ola mo le Ekalesia: A tatou tutū
fa’atasi ma aga’i atu fa’atasi o le Ekalesia e tasi, e le tuulafoaiina e le Atua
Lana Ekalesia i le fa’atinoina o Lona Finagalo.
Tatalo: Le Tama e, ta’ita’i mai lau Ekalesia i le fa’atinoina o lou finagalo i le
lalolagi. O fea lava o le a aga’i ai, tautai folau lau Afio i mea uma, Amene.
Aso Gafua - Iulai 27: “E le faigata mo oe” (Not too hard for you)
Tusi Faitau - Teuteronome 30:11-20 Matua - f.14: “Ae matuā lata mai lava le upu ia te oe, o i lou gutu, ma lou
loto, ina ia e faia.”
O lenei fuaitau o loo a’oa’o mai ai le Atua: o a tatou gaioiga e faia i le
taimi nei, e fuafua ai mea e tutupu mai i le olaga. Ae le gata i lea, e o fa’atasi a
15
tatou gaioiga e fai, ma lagona o loo nofoa’i i o tatou loto. Ioe, o lagona o le
loto e mafua ai gaioiga tatou te faia. A sa’o le loto, e sa’o foi a tatou mea e fai.
Ae a eleelea le loto, e fa’apena foi ona eleelea a tatou gaioiga e fai. O le mea
lea e le fa’atauvaa ai i le Atua le loto o le tagata. O le tagata moni lava, e iloa i
lona loto, ma o iina e silasila ai le Atua e tusa ai ma gaioiga a le tagata e fai.
E le o se mea faigata la le sa’o o le loto o le tagata, auā o iina e afio ai le
Atua ma lana Upu. E pei ona faimai le matua, “e matuā lata lava ia te oe” le
Upu o le Atua, “o i lou gutu ma lou loto.” Pau le mea, o le fa’atino loa.
Tatalo: Le Atua e, fesoasoani mai ina ia matou usiusita’i ma fa’alogo i lau
Upu o loo i totonu o matou loto, Amene.
Aso Lua - Iulai 28: “Se Agaga fou” (A new Spirit)
Tusi Faitau - Esekielu 36:22-32
Matua - f.27: “Ou te tu’uina atu lo’u Agaga i totonu ia te outou, toe te savavali
ai i a’u tulafono, toe te anaana foi i a’u fa’amasinoga ma outou faia.”
E le faigofie le tulaga ua o’o i le nu’u o le Atua a o aumau ai i le tafeaga i
Papelonia. A o le alofa mutimuitvale o le Atua, ua fa’ailoa atu ai e le Atua
lona finagalo mo i latou, fa’atasi ai ma le mea o le a Ia faia e laveaiina ai i
latou. O le a fa’amamā e le Atua lona nu’u, ma tu’uina atu se loto fou ia te i
latou. O le a toe fa’afoi e le Atua lona nu’u i ona laueleele, ma tu’u atu le
Agaga fou i o latou loto, e mafai ai ona ‘autasi lo latou fa’amamafa ia te Ia. O
le galuega laveai atoa lea a le Atua mo lona nuu o Isaraelu.
E pei i tatou o Isaraelu i le tele o taimi. E i ai taimi tatou te sesē ese ai ma
le ala e finagalo ai le Atua mo i tatou. Ae ona o lona alofa, e toe fa’asa’o ai e
le Atua o tatou ala, pe a tatou salamō ma lagona lo tatou sesē. E fai e le Atua
le ‘auala e tu’u ai le Agaga fou i totonu o tatou loto – le Agaga e fa’amuamua
ai o Ia i mea uma tatou te faia, tatou te sapi ai i ana fa’amanuiaga
Tatalo: Le Fa’aola e, ua ou agasala; fa’amagalo mai a’u. Fa’amama mai ma
fai se loto fou mo a’u, ou te auauna atu ai i lau afio e le aunoa, Amene.
Aso Lulu - Iulai 29: “Momo’e i le ala o le Tulafono” Tusi Faitau - Salamo 119:25-32 (Running the way of the Commandments)
Matua - f.27: “Ia e fa’ailoa mai ia te a’u le ala o au feau; ona ou mafaufau
lea i ou vavega.”
O fuaiupu ta’itasi o lenei Salāmo, o loo fa’atāuaina ai le Afioga a le Atua –
o ana Tulafono. I le f.27, ua silafia e le fai-salāmo le leaga o lona olaga ua i ai,
ma ua augani atu i le Atua ina ia fesoasoani mai e toe fa’aleleia lona olaga, e
ala i lona mulimulita’i i ana tulaono. E le o ta’ua pe na agasala le fai-salāmo pe
leai. A o lona augani atu, o le tagi talatala lea a le tagata ua fia suia lona olaga.
O le tagata ua ifo ‘au ma tu’u atoa atu lona loto i le Atua ma le tausiga o ana
tulafono, ina ia suia ai lona olaga ma vāvā lalata ai lona mafutaga ma Ia. O le
tele o tagata i nei ona aso, seiloga ua tupu se fa’alavelave e aafia ai lona olaga,
16
ona fa’atoā augani lea i le Atua i le fia suia o lona olaga ma mafuta atu ia te Ia.
Ae leai. E mafai ona suia o tatou olaga ma tatou mafuta vāvā lalata ma le Atua
i soo se taimi, e oo foi i taimi e solosolo lelei ai le soifuaga. O le tatalo
fa’afetai i le Atua mo ana fa’amanuiga, o le isi lea auala.
Tatalo: Le Atua e, ia ou alofa ia te Oe e lē ona o mea ua e faia mo a’u, ae ona
o lau afio o le Atua silisili ese e tatau ona matuā viia, Amene.
Aso Tofi - Iulai 30: “Iesu fa’aosoosoina” (Jesus tempted)
Tusi Faitau - Mareko 1:9-15 Matua - f.11: “Ua o’o mai foi le si’ufofoga mai le lagi, ua fa’apea mai, ‘O
lo’u Atalii pele oe, ou te fiafia ia te oe.’”
O le fesili e tula’i mai i le uiga o lenei fuaitau, “O le a ea le mea na faia e
Iesu ua ala ai ona ta’ua o ia o le Atalii pele o le Atua?” Auā o le olaga lea
tatou te ola ai, o le va’aiga e masani ona va’ai mai ai tagata ia te oe, e fua i au
galuega na fai. O tala e feavea’i e isi tagata ia te oe, e fua i au mea na fa’atino.
Peita’i, o le fetalai mai o le siufofoga mai le lagi ma valaau Iesu o le “Atalii” o
le Atua, e le ona o se galuega na ia faia, ae ona ua alofagia o ia e le Atua.
E masani tagata i nei ona aso ona fa’amasino atu ma fua la latou va’aiga i
isi tagata, i luga o a latou galuega e fai. Afai o se tagata e le tutusa ma i tatou
ma tatou le fiafia i ai, ua tatou taumafai e ‘eu’eu ese pe le amanaia foi. Sa
fa’aosoosoina Iesu, ma o loo fa’aosoosoina foi i tatou i nei ona aso, e fulitua i
tagata e le pei o i tatou. Ioe, o le manatu fa’apito ma le fa’aitu’au i isi tagata, e
fa’aosoosoina ai i tatou i le tele o taimi.
Tatalo: Aumaia lou alofa tunoa matou te iloa ai ona alolofa atu i isi, Amene.
Aso Faraile - Iulai 31: “Tu’uga a Paulo” (Paul’s race)
Tusi Faitau - 2 Timoteo 4:1-8
Matua - f.8: “O lenei, ua teuina mo a’u le pale o le amiotonu, e foai’ina mai
ia te a’u i lea lava Aso e le Alii le fa’amasino amiotonu, e le gata foi i ia te
a’u, a o i latou uma lava o e fiafia i lona fa’aali mai.”
I le ta’aloga o le tu’uga momo’e, e tasi lava le tagata e mua ma fa’apineina
i le pine auro. E ese la mai le tu’uga fa’ale-fa’atuatua. Apoapoa’i Paulo ia
Timoteo, ia taumafai e faia mea uma e fa’amaonia atoatoa ai lana galuega
tala’i mo le Alii. O lona uiga, e pei o le tagata momo’e, e tatau ona lava se
taimi e koleni ai. E lua mea tāua e tatau ona aga’i ai le kolegina ina ia maua le
‘pale o le amiotonu’ – le pine auro lea o le tu’uga fa’ale-fa’atuatua. Muamua,
ia fa’amaoni ma tu’u atoa o tatou loto i le galuega, auā o le galuega e faia mo
le Atua. Lua, a fa’atino lo tatou pito la’au o le galuega, tatou te manumalo
fa’atasi uma i le tu’uga, ae le na o se tagata e toatasi. Manaia tele le tu’uga
tatou te manumalo fa’atasi ai.
Tatalo: Ia moni lo matou ofoina atu, e maua ai le pale o le amiotonu, Amene.
17
Aso Toona’i - Aokuso 1: “Tamo’e i le tu’uga ua i o tatou luma”
Tusi Faitau - Eperu 12:1-13 (Run the race set before us)
Matua - f.12:“O le mea lea ina fa’amalosi ai ia i lima ua gagase ma tulivae
ua vaivai;”
O le tusi lenei i lona mataupu 12, o loo manino ai le fa’a-falepuipuiina,
sauāina, ma le fasiotia o le ‘au soo, poo le ‘au Aposetolo, i Asia Itititi. Ae o
faigata ma fita o loo a’oa’oina ai le ‘au paia i le onosai ma le ola tauivi, ae o le
filigā ma le naunau e tamo’e pea i le ala tanu. Galue pea ma aga’i i luma.
Avea le lē solomuli o Iesu i le satauro, e fai pea ma vaaiga, a o se taiala
manino mo le au paia ma i tatou uma e tamomo’e pea, fa’amalolosi pea i lima
ua gagase ma vae ua vaivai.
O le lima gagase ma vae ua vaivai, o le fa’ailoga lea o le fa’atuatua ua mate
ma ua matūtū. Ae o le fa’amalosi a Eperu, ina ia alu pea i luma, taula’i ia
Keriso manumalo le tamo’ega. Na a’oa’oina ma fa’alogo i lona Tamā. Ua ia manumalo i lana tamo’ega, auā sa fa’alogo ma usitai ma faia le finagalo o lona
Tamā o i le lagi. E ta’itasi tatou ma lima gagase ma vae ua vaivai o le olaga
nei, ae ia taulai lava le sini ia Keriso na manumalo i le tamoega.
Tatalo: Le Atua Paia e, fa’amalosi mai o matou loto pe a tauau ina mate lo
matou ola taumafai, Amene.
TAMO’EGA O LE TU’UGA
2 – Ia Tasi Mālō uma
Aso Sa - Aokuso 2: “ Fifilemu ma iloa” (Be still and know)
Tusi Faitau - Salamo 46
Matua - ff.5-6:“O loo i totonu ia te ia le Atua, e le fa’ageetia lava ia, e
fesoasoani le Atua ia te ia i le vave ao. Ua vāvāō nuu ese, ua fa’agaeetia
malo; ua tūlei mai lona siufofoga, ona liu suāvai lea o le lalolagi.”
I le ta’aviliga o le kelope ma mea o loo tutupu ai, e leai se filemu. Na
amata lava le lalolagi i taua ma fevaevaea’iga. O fa’ama’i oti ma mala
fa’alenatura, e afua mai i le fa’atamala o le tagata. Ua le maua ai se filemu ma
se nofo lelei o le lalolagi. Ua o’o mai lava i nei ona po, ua fa’aali le malosi o
isi malō i isi malō. Ua fa’ailoa i fuā va’a o le sami, ma fitafita ta’i afe ma afe,
a o mea tau o le eleele. Ua tupu ai le atuatuvale ma le fememea’i o le lalolagi.
Ae ‘aua tatou te popole ai, auā ua tatou iloa ma malamalama i le Atua o
loo tatou tapua’i ai. Pei ona pese le fai-Salāmo: o lo tatou ‘olo ma lo tatou
papa. O lē gauia aufana ma lē na te vavae tao tau. O lona siufofoga e liu
suāvai ai le lalolagi. O le tāua foi lea o le fifilemu ma fa’alogo i le
musumusuga a le Agaga o le Atua e iloa ai. E tasi le Atua e ao ina fifilemu ma
iloa. E tasi lava le pule aoao, ua na o le Atua lava.
Tatalo: Le Atua e, lo matou olo ma lo matou papa, fesoasoani mai ia matou
maua lou filemu ma lou paia i taimi maninoa ma le fifilemu, Amene.
18
Aso Gafua - Aokuso 3: “O le poto mo malō uma” (Wisdom to the nation)
Tusi Faitau - Teuteronome 4:1-8 Matua - f.7: “Auā o ifea se nuu mamalu ua latalata i ai lo latou atua, e pei o
le ALII lo tatou Atua ua latalata mai i mea uma lava ua tatou valaau atu ai ia
te ia?”
E tāua le usita’i ma le fa’alogo. O le fa’amanatu lea a Mose i le nuu o le
Atua, o i latou o le a ulufale atu i le nuu folafolaina. Usita’i ma fa’alogo i le
fa’atonuga a le Alii e popoto ma atamamai ai. I le fuaiupu e 5 ma le 6, o loo
fa’amanatu mai e Mose i le nuu, ia totō ma ia tusi i papa ma’a o latou loto
tulafono ma fa’amasinoga i o latou tagata, pe afai e ulufale atu i lea nuu. A o’o
la ina lauusiusi ma matua le tulafono ma fa’amasinoga i o latou loto, ona atagia
lea o le poto ma le atamai o le pupula o le mamalu o le Atua i nuu ese ma
fa’alologo taliga o tagata ua galala i le fia maua o lea poto. O le latalata mai o le
Atua, o lona tali mai i le valaau atu a lona nuu. O le latalata mai o le Atua, o le
alāfua ma le taialaina o lona nuu e ala i le tulafono ma le fa’amasinoga tonu. O
le poto mo malō uma e fa’avae i le usita’i ma le gaua’i o le malō i le Atua.
Tatalo : Le Atua e, aoao mai ina o matou maua le loto maulalo e saili ai le
poto ma le atamai moni mai lau afio, Amene.
Aso Lua - Aokuso 4: “Fusifusia i le leo fiafia” (Uniting in a joyful noise)
Tusi Faitau - Salamo 100 Matua - ff.1-2:“Ia alalaga i le ALII le lalolagi uma. Ia outou auauna atu i le
Alii ma le fiafia; o mai ia outou i ona luma ma le alaga fiafia.”
O le vaitau lenei sa fa’apea e fa’ataunuuina ai le Olimipeka i Iapani.
To’atele tagata ta’a’alo ma tagata tapua’i mai atunuu eseese o le lalolagi sa
fa’apea o le a ‘auai. Tumu foi le ‘au fa’asalalau ma le au fia iloa, e fa’atalitali
ma tālia tali/i’uga o taaloga. O le mea mata’ina i taimi o le Olimipeka, o le
mata’alia ma fiafia o tagata e matamata ma tapuai i o latou atunuu. E masani
ona tumu-tumu le lalolagi, e tapua’i ma patipatia le taumafaiga a le ‘au ta’aalo
O le fa’avae ma le fatu foi lea o le Salamo e 100. O le fa’afetai ma le viiga
a le lalolagi i le Atua ona o ana fa’amanuiaga. O lona alofa ua le gata ona
magalo ai agasala, ae ua fa’aolaina ai tagata. Fusi laia o lou sulugatiti ma fiafia
aua ua tatou maua le ola ma maua atili ai lava ona o le Atua.
Tatalo: Fa’afetai tele le Atua i le tele nauā o au meaalofa ma lou tamaoaiga mo lo’u nei ola. Foai mai le fiafia ou te fa’asoa atu ai mo isi, Amene.
Aso Lulu - Aokuso 5: “Latou te lē toe a’oa’oina ni taua” Tusi Faitau - Isaia 2:1-4 (Neither shall they learn war any more)
Matua - f.4: “..ona latou tu’i ai lea i a latou pelu e fai ma uamea o suotosina,
o latou tao foi e fai ma polo e teu a’i vine; e le sii atu le pelu e le tasi nuu i le
tasi nuu, latou te le toe a’oa’oina foi i taua.”
19
E iai le talitonuga o le ‘au popoto e fa’apea: o le maualuga ma le maoa’e o
le a’oa’oina, e afua ai fa’aiuga lelei ma sootaga lelei i va o mālō e atia’e ai le
leleiga mo le lalolagi atoa. Na a’e le Taua Lona Lua o le Lalolagi i le tausaga
1945, ae talimalo Peretania i le Olimipeka i le 1948. E ui ina mafatia Peretania
ma tele ona manu’aga mai le taua, ae na tali malō lava i le tauaofiaga o le
lalolagi. E maualuga le vaai i le agaga o le fa’asoa ma le a’oa’oaina o tagata,
o le liliuina o le pelu e fai ma suotosina, ae o le tao e fai ma polo teu la’au. Ia
fa’aaoga aupega o le taua e fa’aola ai tagata. O le poto i taua, ua suia i le aga
alofa e totō ai se fatu fou o le lumana’i. O le naunau foi lea o Isaia, ia
fa’aoloaina ona tagata i le Upu mai le Atua.
Tatalo: Le Atua e, sei e a’oa’oina malō o le lalolagi i ala o le filemu ae le o taua. Ia fa’aaoga aga o taua e fai ma aga o le fa’aolataga, Amene.
Aso Tofi - Aokuso 6: “Mata’itūina a latou galuega” Tusi Faitau - Salamo 33 (Observing their deeds)
Matua - ff.13-14:“O loo silasila mai le ALII mai le lagi; e silafia e ia le fanau
uma a tagata. O loo matuā silasila mai o ia mai le mea o loo afio ai o ia ia i
latou uma o e nonofo i le lalolagi.”
I le amataga o le tausaga, e masani i Ekalesia, Malō ma Kamupani, ona
fa’ataoto ma fa’atulaga se kalena mo le tausaga atoa, e gasolo lelei ma taunuu
manuia ai ana porokalama ma fuafuaga fa’ale-tausaga. O loo tapua’i aiga,
Ekalesia, ma faigamalo, ia taunuu manuia galuega fa’agasolo o le tausaga. E
vaavaai maualuga, ma mātau mai e le lalolagi, le gasologa o a tatou fuafuaga.
Ae fai mai le molimau a le fai Salamo, tepa a’e i le lagi o loo sisila mai
fofoga o le Atua. O le finagalo o le Atua ua taunuu ai mea uma ua tatou maua.
O le ola, manuia, oloa, poto ma mea uma ua tatou maua, e mafua ona o le
finagalo o le Atua. O le Atua ma lana manavaga paia na maopoopo ma fau ai
le lalolagi lea ua tatou ‘ae’ae ai nei. O loo sisila le Atua i mea uma o loo tatou
faia. O le tāua foi lea o le galulue ma le vaai toto’a i Lē e ona mea uma.
Fa’afoi laia o le fa’afetai i le Atua auā e silafia e le Atua mea uma.
Tatalo: Le Atua e, puipui i matou mai i mea o lo’o fai ma fa’alavelave o lenei
lalolagi; fa’amalosia pea o matou mata e tepa taula’i atu i lau Afio, Amene.
Aso Faraile - Aokuso 7: “Tupua auro, siliva ma ma’a”
Tusi Faitau - Galuega 17:16-31 (Deities of gold, silver and stone)
Matua - f.29: “O lenei, ona o le fanau a le Atua i tatou, e le tatau ona tatou
manatu ua tusa le Atua i se auro, poo se ario, po o se maa, ua talaiia i le faiva
ma le fuafua a le tagata.”
I le Esoto 20:3-6, o loo manino ma fa’amatala auiliili ai le tigā o le Atua i le tagata e ifo ma auauna i atua ese. O atua ese ia e aofia ai tupua ua ta, o maa
ma laau o auro ma ario, e le o i ai se ola. O fa’atagata ma fata faitaulaga e fau i
lima o tagata, ua fa’atuatua ma ave i ai le ‘ato’atoa o le tagata Iutaia. O le
20
molimau a Paulo, o mea ia e atagia ai le vaivai ma le soifua soloitua
fa’aleagaga o Iutaia. O le ifo i tupua, o le tapua’i lea i atua mamate ma le leai
se ola. Ae fa’amanatu Paulo, o le Atua ia o le ola o loo soifua pea. O Lē na
faia mea uma, ma manava i ai le ola. Na saunia e Ia le fa’aolataga e ala i le
toto o lona Alo Pele. O le Atua lena e ao ona tapuai ai.
Tatalo: Le Atua foafoa, totō i o matou loto le pule e soli ai atua ese, ma le
malosi e tetee atu ai i fa’aosoosoga, Amene.
Aso Toona’i - Aokuso 8: “Mo le fa’amaloloina o malō”
Tusi Faitau - Fa’aaliga 22:1-7 (For the healing of the nations)
Matua - ff.2b-3a: “…ma itu taitasi o le vaitafe le laau o le ola, o loo fua mai
i fuata e sefulu ma le lua, e taitasi le masina ma fua mai ai lona fuata; o lau
foi o le laau e fa’amalolo ai nuu. E leai foi se toe fa’afano e e tasi.”
I le evagelia a Mareko 22:17, o loo fa’apea ai le fetalaiga a Iesu, “E le
mana’omia e le tagata malosi se foma’i se’i vagana ai le tagata ma’i. Ou te
lei sau mo ē amiotonu, ae mo ē ua agasala ia fa’aolaina.”
O le fa’aaliga na va’aia e Ioane i Patamo, o loo ta’ua ai le silisili ese o le
Atua. O le Etena fou, ua molimau ai e Ioane i lona matagofie ma lona mamalu.
O le nofoaga o loo i ai le malamalama o le Atua. O loo auauna ai tagata ua
tusia i papa maa o latou agaga le upu a le Atua i o latou loto. Ae o le fa’atoaga
e tafe ai le vaiola ma puna, e mamā e malolō ai nuu ma malo o le lalolagi. O le
naunautaiga o le fia oo i lea nofoaga pei ona tusia e Fa’aaliga, ma molimau ai
Ioane. I le fetaua’i ma le vāvāō o le lalolagi i le pule. O le pepesi o fa’ama’i ua
lofia ai le lalolagi, ua moomia le fa’amalologa fa’aleagaga e ala i le tafe ma
puna mai le lagi e ala i le toto o le tama’i mamoe e ola ai malo uma.
Tatalo: Le Alii e, matou te tatalo mo le fa’amaloloina o malō, se i e alofa ia
fa’atafe mai le vaiola e fa’amalolō ai matou ma’i o le Agaga, Amene.
O LE TUSI PAIA I LE MATĀFAGA
1 – Malōlōga
Aso Sa - Aokuso 9: “Malōlō ane teisi” (Rest awhile)
Tusi Faitau - Mareko 6:30-32
Matua - f.31b: “Ina o mai ia, tau lava o i tatou, i se mea tu’ufua, se’i tou
mapu a’e te isi.”
E ese le tāua o le malologa ma saili malosi e maua ai le manino ma le
atoatoa o se fa’aiuga fai. E fa’alagolago le alualu i luma o se aiga, nuu, ma le
ekalesia, i le sologa lelei o fa’aiuga fai e fa’avae i le malosi ua atoatoa. O le
silasila mamao la o Iesu i ona soo ma le gasologa o le galuega, o loo fa’avae ai
lana fa’aiuga e mapu ane i se nofoaga tu’ufua e malolō ai. Toe iloilo ma toe
afuafua se manatu e ala i le tatalo ma le anapogi, ae toe manatunatu ma
mafaufau loloto i le finagalo paia o le Atua ma lana valaau. Ua silafia e Iesu le
21
motu o tagata ua fetuleni mai ma ua le mautonu po o le a le mea e tatau ona
fai. Ua fia taumamafa le motu o tagata atoa ma le au soo. O le tali la, o le
mapu ane te isi, se’i saili i le Matai o le galuega.
Tatalo: Le Atua silisili ese, foai mai le malosi e mafai ona matou tu’umuli ai i
se nofoaga tu’ufua e fa’alogologo ai ma le manino i lou fetalai mai, Amene.
Aso Gafua - Aokuso 10: “Lotomalie” (Contented)
Tusi Faitau - Salamo 131
Matua - f.2a: “E moni, na ou fifilemu ma ou fa’alologo, fa’apei o le tama ua
te’a ma le susu o lona tinā.”
Ua matua le soifua o le tupu o Tavita. Ua leai se losilosi vale, ua leai se fia
iloa ma se manatu fa’amaualuga poo se fia sili. Ua leai se naunau i oa ma mea
fa’afiafia o le olaga. Ua na ole ta’oto’oto i lona moega ma fa’anaunau atu lona
loto i le Alii. Ua na tu’utu’u le upega i le loloto ma saili i le Atua mo lana
fa’amasinoga tonu, ae maise lana ta’ita’iga mo lona nuu. Ua mamao ese o ia
mai ona lava viiga, ae ua saili i le Atua i ala e mapu ai le nuu. Ua fīfīlemu ma
ua fa’alologo i le finagalo o le Atua. Ua pei o se tama ua te’a ese ma le susu o
lona tina. E te’a ese, ae le galo lava le a’oa’oga. O le loto maulalo, e ala mai
ai le finagalo o le Atua ae le o le finau vale ma le fa’amaualuga.
Tatalo: Le Atua e, a’oa’o mai i matou ina ia matou iloa ona pulea o matou
loto, ma ia saili i le loto maulalo, e afio tumau ai oe lo matou fa’aola, Amene.
Aso Lua - Aokuso 11: “’Aua le popole” (Don’t worry)
Tusi Faitau - Luka 12:24-31 Matua - f.29b: “O outou foi, aua tou te saili pe ni a tou te aai ai, ni a foi tou
te inu ai;”
Ua fa’amatala e Luka le eseesega o le fa’asoa ma le tufa a le Atua i le lau
telega o lana foafoaga, ae fa’apitoa i le tagata le palealii o ana foafoaga. O le
tāua lea o le tagata i le Atua. Ave i ai lona atoatoa ma le fa’atumutumuga o
mea sili. ‘Aua le popole i mea e inu ma mea e ai. O mea e tua i ai pei o manu
ma laau, ua ia ta’ua i le faitauga. Ua fa’ataoto e le Atua le fa’afanua manuia
mo tagata e soifua ma ola ai. Fa’alagolago laia ma fa’amoemoe i le Atua i
mea uma. Silisili o ia mea uma: mafaufau loloto i le afioga a le Atua. Saili le
Atua ma lana amiotonu ona fa’aopoopo mai lea o mea uma ia te i tatou.
Tatalo: Le Atua e, matou te fa’afetai pea i lou alofa ma lau foai. Fa’afetai mo
mea tāua ua matou maua mai i lau foafoaga, Amene.
Aso Lulu - Aokuso 12: “Fa’alavelaveina” (Distracted)
Tusi Faitau - Luka 10:38-42 Matua - f.39:“O lona uso foi e igoa ia Maria, ua nofo o ia i lalo i tafatafa o
vae o Iesu, ma fa’alogo i lana fetalaiga."
22
O le taimi ma le mea e tupu ai, e ese lona tāua i le tala’aga o le tagata. O
le avanoa e fai ai se mea ae fa’alavelaveina e se isi mea, e afaina ai ma lē toe maua ai le avanoa e fa’alogo ma molimau ai i se mea tāua. Fetalai Iesu ia
Mareta, “Mareta e, Marieta e, ua e pulunaunau i mea e tele.” O mea e pala
ma lē aoga. Ae galo ia te oe le mea e tasi ua filifili i ai Maria. E tāua le
tapenaga ma le va fealoaloa'i, ae sili le Upu o le ola ua liutino tagata lea ua
fesaga'i ma Maria, ma ua valaau atu ia Mareta. Ae paga lea, ua ‘aloese fofoga
o Mareta, ua naunau o ia i mea fa’atauvaa. Ua manuia Maria ona o le sa’o o
lana filifiliga. O le nofo i lalo i tafatafa o Iesu, o le fa’ailoga o le tagata ua
gālala ma fia pu’epu’e mau mai mea uma mai ia Iesu.
Tatalo: Le Alii e, fa’amagalo mai, ina ua pupū o matou loto ma ta’ina sesē i manaoga o le lalolagi nei, Amene.
Aso Tofi - Aokuso 13: “Malōlōga paia” (Divine Rest)
Tusi Faitau - Kenese 2:1-3
Matua - f.2b: “ ... ona malolo ai lea o ia i le aso fitu i lana galuega uma na
faia e ia.”
O le aso 7 o le aso na malolo ai le Atua. E le ona ua fia malōlō. Ae ona ua
silafia e le Atua le atoatoa o lana foafoaga. O le malōlōga, o le taimi e saili
malosi ai le tagata ma toe amata ai le porokalame o le isi aso.
O le naunautaiga o le tusitala o Kenese, o le aso 7 ua atofa e le Atua mo
lana malōlōga. O le malōlōga e paia. O le malologa o le toe fuataiina ma le
molimauina o le matagofie o le fesoota'i, ma le lau olaola o le foafoaga a le
Atua. E tali fa’apena se moomooga o loo i le Kenese: malolō se'i toe fetuuna'i
ma toe saili i le Matai o le galuega, pe talafegai mea uma ua faia e le tagata.
Malōlō se'i utufia le malosi fa’alētino, ae silisili la le agaga e fa’aauau ai tiute
masani o le aso. O le leai o se malōlō, e fa’atupu ma'i ma fa’atupu vevesi ai,
ae sili ona latalata mai ai le tiapolo e fa’aosooso i le tagata taumafai.
Tatalo : Le Tamā e, fa’afetai i lau meaalofa paia o le malōlō. Ia mafai ona
matou fa’asoa atu le tāua o lea meaalofa mo isi o loo matou galulue, Amene.
Aso Faraile - Aokuso 14: “Tausiga ma le puipuiga” Tusi Faitau - Salamo 23 (Provision and protection)
Matua - ff.2-3a: “ ... na te ave a’u i le mea e i ai le vao mu’a ou te taoto ai.
Na te ta’ita’i ia te aui tafatafa o vai e tafe lemu;”
O le Salamo masani o loo atagia ai le mafanafana o le Atua, o le leoleo
mamoe sili. E tele manu fe’ai ma fili i le lafu mamoe. Ae peita'i, ua fa’amautu
mai e le fatu pese “na te ave a'u i le vao mu'a ou te taoto ai”. O le fa’ailoga o
le ta'ita'i mataala ma le alofa. E saili i mea lelei mo le manuia o ana mamoe.
“Na te ta'ita'i ia te a'u i tafatafa o vai tafe lemu.” E le so’ona ave e le leoleo
mamoe i soo se vai, ae o vai lelei ma le mamā. “Na te fa’afoisia mai lou
agaga.” O le saili i se nofoaga malu ma saogalemu e fa’aosofia ai manatu
23
lelei. E mapu mai ai i tiga ma faigata o le malaga. Ae totogo ai le malosi fou
ma fa’afouina ai mafutaga ua tauau ina motusia ona o le fili ma ana mailei.
O le Atua o le leoleo lelei. E saunia e ia ta’iala mo le puipuia o i tatou mai
faigata o le malaga. E silafia e le Atua faigata o ananafi, le asō ma a taeao.
Fa’amoemoe laia i le taiala ma le puipuiga a le Atua Soifua.
Tatalo: Le Alii e, fa’afetai i lou alofa ma lau puipuiga le mavae mo i matou,
matou te tatalo ia matou fa’ataua le lanumeamata o le lanulau’ava, Amene.
Aso Toana’i - Aokuso 15: “Ifo ma Tapua’i” (Bow down and worship)
Tusi Faitau - Salamo 95:1-6
Matua - f.3: “Auā o le ALII o le Atua sili lea, o le Tupu tele lava o ia e sili i
atua uma lava.”
E ese le tāua o le tulafono muamua a le Atua, “Aua e te ifo i atua ese....
Auā o le ALII o le Atua sili lea, o le Tupu tele lava o ia e sili i atua uma lava.”
O le Atua na foafoaina mea uma, o le papa o lo tatou olataga. O mauga, le
sami ma le laueleele, o loo taoto ai lana mau fa’ailoga o ia lava na na faia. O ai
la se a le vivii ma ifo i le ona le malosi uma? O lana pule lea e au tupulaga, ma
e le fa’amatalatalaina esē tagata.
Mai i Aikupito i le 40 tausaga i le vao, mai le 70 tausaga i Papelonia e oo
atu i le toe fausia o le pa o Ierusalema ma le malumalu o Siona, sa iai lava ma
lotolotoi le Atua i ia mea uma. O mai laia, tatou te to’otutuli ma punonou ma
vivii i Lē na faia i tatou. O le tāua lea o le soifua fa’afetai ma fa’amanu i le
Atua lo tatou matai, auā ana le seanoa le Atua, ua leai i tatou.
Tatalo: Le Atua e, fa’afetai mo lau Upu mo i matou i lenei vaiaso, ia e alofa
ma fesoasoani mai ina ia matou tapuai i le moni ma le fa’amaoni, Amene.
O LE TUSI PAIA I LE MATĀFAGA
2 – I le Matāfaga
Aso Sa - Aokuso 16: “O le mea na amata ai” (Where it began)
Tusi Faitau - Luka 5:1-11
Matua – f.10b: “Ona fetalai atu lea o Iesu ia Simona, ‘Aua e te fefe, e amata
i nei ona po, ona e maua tagata.”
Na faia e le Atua le lagi ma le lalolagi i le amataga. E amata mea uma i le
Atua, e taunuu foi mea uma i le Atua. I le faitauga o lenei aso, o loo taoto i le
vai tuloto o Kalilaia o va’a ma tautai fagogota popoto o le vai tuloto. O loo
molimauina e Iesu ia faiva ma ia silafia ai le naunau o tautai. Fautuaina e le
Alii e tu’utu’u le upega i le loloto, ae sau le tali, ua alu le po o galulue ae leai
se i'a, ae ona o lau fetalaiga o le a faia ai. Tali a le tautai masani i ‘oga vai
tuloto. Ae iai lava le masalo. Ua a'e le faiva ma tali goto le vaa, ae lagona ai le
ma ona o le lē talitonu. O le tali la o le masalosalo, o le fa’atoese ma mulimuli
i le Alii. Ua manino ia Peteru ma le au soo, e amata mea uma ia Iesu. O le Alii
24
na foafoaina mea uma, o ia foi lea na faia le vavega i le vai tuloto. O se
a’oa’oga foi lea mo i tatou i le Atua amata mea.
Tatalo: Ia avea meaalofa, o le poto ma le iloa, o taleni eseese ua e foaiina mai,
e fa’aaogaina i a matou tapuaiga mo lou viiga, Amene.
Aso Gafua - Aokuso 17: “Vala’auina Levi, tafatafa o le sami.” Tusi Faitau - Mareko 2:13-14 (By the sea, calling Levi)
Matua - f.14: “Ua maliu ane o ia, ona silafia lea e ia o Levi o le atalii o
Alefaio, ua nofo i le fale e tali ai lafoga, ona fetalai atu ai lea o ia, “Mulimuli
mai ia te au.” Ona tulai lea o ia ua mulimuli atu ia te ia.”
O Kapanaumi o le nofoaga o fefa’ataua’iga, e latalata i le sami, e tu ai le
laulau a Levi le ao lafoga. O se nofoaga e pisi ma tumutumu ai tagata. I lea
tumutumu, o loo lotolotoi ai ma Iesu. E tele tagata e fa’amata e tauoloa ma
atamamai. E tele foi a’oa’o o le tulafono e ono valaaulia e Iesu. Ae ua filifili
lava e Iesu Levi le ao lafoga. Le tagata inosia ma itagia e ona tagata ona o lona
fai togafiti. O lona natura gaoi ma le tau fa’asesē e tuufa’atasi ai o ia ma telona
ma tagata agasala. A o lea ua valaauina e Iesu e fai ma ona soo.
Vala’au i tafatafa ane o le sami. Vala’au i le taimi o galue ma le
tumutumu o tagata. Vala’au i le tele o le tamaoaiga ua ia maua, ae o le
fesootaiga ma le malō o Roma e galue ai. O mea uma ia e iloilo ai le valaauina
o lenei soo. Ae silasila le Alii i le loloto ma le tāua o lenei tagata, ma lona sao
i le liliuina o ona tagata mai le olaga tuai ma le saisaitia i le tulafono i le
saolotoga e ala i le fa’aola ua valaauina o ia. O Levi o le tagata faitogafiti, ae
ua fa’aoga e le Alii e avea ma vaa ma ipu o le talalelei. E le o le olaga o loo
ola ai i le taimi nei, a o le olaga e mafai ona ola ai i le lumanai.
Tatalo: Le Atua e, fesoasoani mai ina ia ou manatu i le isi tagata fa’apei ona e
alofa ai i soo se tagata, mo le leleiga lautele o tagata uma, Amene.
Aso Lua - Aokuso 18: “Matāfaga tumutumu” (A crowded beach)
Tusi Faitau - Mareko 3:7-11
Matua - f.9: “Ua fetalai atu foi o ia i ona soo ia fa’atali mai se vaa laitiiti ia
te ia, auā o le motu o tagata ina ne’i fetaomi mai i latou ia te ia.”
E tele ni mafuaaga e tumutumu ai tagata i nofoaga faitele, e ese mai i
tulaga masani e pei o sauniga lotu, o maliu, fa’aipoipoga, ma isi lava mea e
tatau ai ona tumutumu, e pei o le falema’i, fa’apea foi le lē ofi o le ofisa o le
food stamp. Ae sili ai le tumutumu, ona o le fia iloa.
Molimau Mareko, ua tumutumu tagata ona ua latou maua tala i galuega a
Iesu, ma ua mafai e Iesu ona fa’amalōlō ma'i. To’atele ē ua mapu i tiga ona o
lana galuega ma ana vavega. Ae silafia e Iesu, o le naunauta’iga o i le motu o
tagata, e le o le fia iloa le moni o ana a’oa’oga, ae ua naunau e fia fa’amalolo
ma fa’amatu’u ese tiga o latou tino. E fa’apea foi i tatou i nei ona aso. E
tumutumu i mea o loo i ai le mea’ai ma le mea e malie ai le loto. E latalata i
25
tagata e maua ai le filemu, ae galo ai le saili o le amiotonu a le Atua e maua ai
le malologa ma le mapusaga moni.
Tatalo: Foa’i mai le malosi matou te fa’asalalau ai lou finagalo, Amene.
Aso Lulu - Aokuso 19: “Misiona i le matāfaga” (Beach mission)
Tusi Faitau - Mareko 4:1-9 Matua - f.1: “Ua toe amata o ia ona a’oa’o atu e latalata i le vai, ua
potopoto mai ai ia te ia le motu o tagata e toatele; o le mea lea na maliu ae ai
o ia i le vaa, ua nofo ai i le vai; ao le motu o tagata uma sa i le auvai i latou.”
O le vai tuloto o Kalilaia, o lo’o lauga atu ai Iesu i le motu o tagata. O
tagata mai vaega eseese o Palesitina, o i latou e le mafai ona o i sunako ma
fale fetafa'i, ae ua lolofi mai sei fa’alogologo i lauga a Iesu i fafo mai. Auā lea ua le a’oa’o ma lauga atu Iesu i totonu o le malumalu, ae ua iai foi le suiga, ua
ia lauga ma a’oa’o atu i fafo o le malumalu, i le mea o lo o iai le toatele o
tagata e fia fa’alogologo i ana a’oa’oga.
Ua le lauga i mataupu silisili o loo talatalanoa ai faresaio ma satukaio ma
tusiupu, a ua lauga i le fai fa’atoaga ma lana lulu saito. Lauga i mea o le olaga
nei, ae loloto lona uiga. Lauga fa’alaua’itele i aso fai so’o, ae fesootai ma le
siosiomaga o loo ola ai tagata i aso uma. O le misiona a Iesu, o le sau i fafo i
le mea o loo ola ai le tagata ma fa’aolaina mai i lona siosiomaga.
Tatalo: Le Atua e, a’oa’oa mai i matou ina ia mafai ona matou talai i le mea o
loo i ai le tagata lotu ma lavea'i i latou mai le fa’afanoga, Amene.
Aso Tofi - Aokuso 20: “O le afā i le sami” (A storm at sea)
Tusi Faitau - Mareko 4:35-40
Matua - f.38: “A o ia sa i le taumuli, ua tofa i le aluga; ona latou fafagu lea
ia te ia, ma fai mai ia te ia, “Le a’oa’o e, e te le manatu mai ea ia te i matou a
fano?”
E ese le faigata pe a o’o mai mala fa’alenatura ma fa’alavelave tutupu
fa’afuase'i, e pei o fa’ama'i pepesi sa afaina ai tatou i le amataga o lenei
tausaga, ae le faitaulia ai foi matagi malolosi. Ua le fa’aitiitia le atuatuvale ma
le popole o le tagata. E pei o le ‘ausoo i le tusi faitau. Ua leai se fa’amoemoe.
Ua uma le poto a’oao’aina ma le poto masani o le au fai faiva. Ua na o le tapa
i le matai o le galuega. E maofa soo ina ua fa’atonu e le Alii le matagi ma le
afā e taofia ma toe foi i le malū. E aoao le pule a le Atua. Ae silisili ona taua
ona tatou galulue i le tatou pito laau i le fa’amauina o le fa’atuatua ma le
fa’amaoni i le Atua i taimi uma, auā e fa’amaoni o ia e tali ia i tatou.
Tatalo: Fa’afetai tele Iesu, auā o lou ‘auai ma i matou ua e aveesea ai le
matagi; sei e aumaia le filemu i lo matou lē mautonu ma le fefe, Amene.
Aso Faraile - Aokuso 21: “Mai i fafo o le afā (From out of the storm)
26
Tusi Faitau - Iopu 38:1-11 Matua - ff.1-2: “Ona tali mai ai lea o le Alii ia Iopu mai le afā, ua fa’apea
mai, O ai ea lenei ua na fa’apouliuligia la’u pule i upu e le o i ai le poto?”
O le mataupu e 38 o Iopu, ua tali faitau mai le Atua ia Iopu mai totonu o
le afā. Ua ma'ea ona fa’alogologo le Atua i finauga ma faitioga a Iopu e uiga i
ona mafatiaga. Ua tali la le Atua, e le ona o faitaioga a Iopu, ae ina ia fa’aalia
lona silisiliese ma le faatauvaa o Iopu ma ona mafatiaga. “O ai ea lenei ua ia
fa’apouliuligia la'u pule i upu e le o iai le poto.” (f.2) O le tali a le matai i le
sa'i a le palealii o lana foafoaga. O le fa’ailoa i le tagata le tuaoi lē sopo, auā e
paia ma tapu. Lea la ua tali le Atua ma fesiligia Iopu – Sulu lou sulugatiti!
Fa’ailoa e le Atua le natura o le oso ae o le La ma le masina, gasologa o le po
ma le ao, o le tuaoi o le oneone ma le sami, o le fafati o galu, o le taamilosaga
o le lalolagi ma ona suiga e fa’atonutonu folau mai le Atua i totonu o le afā.
‘Aua laia tatou te popole i faigata o le olaga auā e le galo i tatou e le Atua.
Tatalo: E ui lava ina tetele afā o le olaga le Alii e, sei e alofa ma fa’atumu lo
matou gaogao i aupega fa’aleagaga e tauivi ai ma ia faigata, Amene.
Aso Toona’i - Aokuso 22: “Mālū taeao i le matafaga”
Tusi Faitau - Ioane 21:15-19 (Breakfast on the beach)
Matua - f.15a: “Ua uma ona latou aai, ona fetalai lea o Iesu ia Peteru,
“Simona e, le atalii o Ioane, pe sili mai lou alofa ia te au, i o latou nei?”
E ese foi le mālū ma le matagofie o le matafaga i le taeao segisegi. E leai se
pisa, e leai se vevesi, na o le tai suasua mai ma le pa’o o galu i papa pei ni
tagipalau. Ae o lea lava taeao i le matafaga, molimau Ioane na fai ai le mālū taeao a Iesu ma ona soo. Ma'ea le taumafataga ae fesili fa’atolu Iesu ia Simona
Peteru. Tali Peteru, ou te alofa ia te oe.
O le mālū taeao e toe fafagu ai ia Peteru le moni o lona valaauina. O le
taeao o le toe fa’amanatu ia Peteru lona fa’afiti fa’atolu ma lona fa’amagaloina
e lona matai. O le toe fa’amautuina ia Peteru lona taimi ma lona maliu. E ave
fa’amalosia foi ia ma fasiotia e aunoa ma le manao o lona loto. Ae o le avanoa
foi lea e fa’amanatu mai mo i tatou, e le faigofie le valaau, ma e ao lava ona
tatou iloa o loo iai manuia i tua o puapuaga o le galuega fa’aso’o.
Tatalo: Fesoasoani mai Agaga Paia ina ia maua pea i matou le olioli loloto, a
o matou feagai pea ma le talaiina o lou finagalo i ala eseese, Amene.
ROMA 9-16
1 – O le Fa’amaoni o le Atua
Aso Sa - Aokuso 23: “Filifilia o Isaraelu” (Choice of Israel)
Tusi Faitau - Roma 9:1-5
Matua - ff.4-5: “… o sa Isaraelū i latou, o tamafai i latou, ua i ai foi le mamalu, ma feagaiga ma sauniga o le tulafono, ma le tapuaiga, ma upu na
27
folafolaina; o ia te i latou tupuaga, mai ia te i latou foi le Keriso i la le tino, o
lē pule aoao ia, o le Atua e viia e fa’avavau. Amene.”
E ese foi le matagofie o fa’amanuiaga pe a manumalo i le lotto ma isi
taaloga e maua ai fa’ailoga tupe. E tele ni mea sa e moemiti ai o le a mafai ona
faia. Ae fa’alagolago lava nei fuafuaga uma i le lelei o le filifiliga. E i ai taimi
e leaga ai le filifiliga ma afaina ai mea uma. Poo le naunau foi i ai, ae lē lelei
ona fa’asoasoa, ma toe foi ai lava i le mativa.
O le tusi faitau o lenei aso, o loo fautua mai ai Paulo i faigā filifiliga a
Isaraelu – ia lava le onosa’i, ia lava papale auā o i latou na fai feagaiga ma le
Atua. O i latou o le nuu na vavaeeseina e le Atua. Na fafaga ma tu’u i ai e le
Atua le tulafono lea ua ta’ialaina ai o ia. Sa fa’aaunu’ua ma fa’atafea, ae na
fa’aa'e lava e le Atua. O le fa’amanatu la a Paulo mo Isaraelu, onosa'i ma
fa’amoemoe i le Atua o le ola ma le puna o fa’amanuiaga. Ia tutumau, ‘aua le
fa’alogologo tigā, ae tepa i le Atua o le autu o le fa’amoemoe.
Tatalo: Le Atua e, fesoasoani mai ma aveese ma i matou le le talitonu ma le
femoumoua’i, ae ia avea i matou ua e filifilia e faia lou finagalo, Amene.
Aso Gafua - Aokuso 24: “O le fa’amaoni o le Atua” (God’s faithfulness)
Tusi Faitau - Roma 9:6-18 Matua - ff.16, 18: “O lenei, e le mai le ua manao, e le mai le ua tausinio, a e
mai le Atua o lē alofa mai…O lenei, e alofa ia i le ua ia finagalo i ai, ae
fa’amaaa e ia i le ua ia finagalo i ai.”
So’o se kamupani, pisinisi, poo se Ekalesia foi, e masani ona tapena lana
kalena fa’ale-tausaga, e porokalama ma fa’agasolo ai le fa’atinoga o ana
galuega ma fuafuaga mo le tausaga atoa. Ae peita'i, ua fa’amanino mai e
Paulo i lana tusi ia Roma, e leai so tatou malosi e fa’apolokalame ai ni mea,
ma fa’ataunuuina ai, ona e saisaitia pea i tatou i le taufa’asesē o le agasala ma
le tu’inanau. O le tulafono foi, e taotaomia ai lava a tatou fuafuaga.
Ae ui i lea, ua fa’amaonia e Paulo i le Ekalesia i Roma, ua maliu Iesu ma
tanumia ai o tatou agasala, ua tatou le toe pologa ai ona o le fa’amalumalu mai
o le tulafono. A o lea ua avea i tatou ma auauna o le amiotonu. Ua fa’atauina i
tatou i le toto o Keriso, ma ua le toe pologa i tatou i le agasala. O le fa’atuatua
la, o le meaalofa a le Atua mo lana fanau ua toe fuata’iina ma toe amatalia i le
li’o o le fa’aolataga ia Keriso.
Tatalo: Le Alii e, foai mai le malosi e tetee atu ai i faiga tau fa’asesē a le tiapolo ma lona taumafai e taofi pea i matou i le pologa o le agasala, Amene.
Aso Lua - Aokuso 25: “O tagata fou o le Atua” (The new people of God)
Tusi Faitau - Roma 9:19-33 Matua - ff.30-31: “O lenei, se a ea sa tatou upu? Ua maua le amiotonu e nuu
ese na latou lē saili i le amiotonu...A o Isaraelu na saili i le tulafono o le
amiotonu, e lei oo i latou i le tulafono o le amiotonu.”
28
E ese le matagofie o ta’iala fa’aonapo nei, e pei o masini ua fa’afaigofie ai
‘auala o femalagaaiina; e le gata ina vave, ae sefe le taimi ma saogalemu. E
fa’apea le mataupu a le Atua ma lona nuu o Isaraelu. O le nuu na osi feagaiga
ma le Atua. Na ave uma i ai le fa’amoemoe o le Atua, ma fa’amanuia i ai. Ae
paga lea, e le mamafa i lona nuu le Atua ma lona alofa taumulimuli mo i latou.
Ua liua le fingalo o le Atua i nuu ese, ona sa latou saili le amiotonu e ala i le
fa’atuatua. A o lona nuu, na latou saili le amiotonu e ala i le tausiga o le
tulafono, ma, e lei maua lava. Manatu Isaraelu, o a latou galuega i le tulafono e
fa’aolaina ai i latou. Peita'i, ua suia e le Atua le ata, ma toe amata le galuega
fou, e ala i le fa’asafua atu o le fa’aolataga i nuu ese.
Tatalo: Le Alii e, fa’amanino i o matou tagata le aoao o lau pule, Amene.
Aso Lulu - Aokuso 26: “O le amiotonu fou” (The new righteousness)
Tusi Faitau - Roma 10:1-13 Matua - ff.12-13: “Auā e le eseese le Iutaia ma le Eleni; auā o le Alii e toatasi o tagata uma, e faulai lona alofa ia te i latou uma lava o e valaau atu
ia te ia; auā e fa’aolaina i latou uma o e valaau i le suafa o le Alii.”
O le va’aiga a Paulo i le tusi faitau o lenei aso; muamua, o le maopoopo
ma le filigā o Isaraelu i lana tapuaiga i le Atua, ma lona naunau i lo la va tu’u
nonofo e ala i le tausiga o lana tulafono ma ana poloaiga. Ae pa’ū lava i le
Isaraelu, o Iesu o le tulafono ma le poloaiga a le Atua ua liutino tagata. Ua
a’oa’o na o le fa’ava’a, ae tia’i atoa le a’ano moni o le talitonuga.
Lona lua, e le taliaina e Isaraelu le fa’aolataga na saunia e Iesu. Talitonu
Isaraelu, e fa’aolaina i latou i ā latou galuega. E talitonu i latou o le amiotonu
lea. Ae fai mai Paulo, e le mafai ona tineia le Keriso Iesu lea ua toetu mai ma
fa’aolaina le lalolagi agasala.
O mau nei e tolu e fa’amaonia ai le lagona o Paulo. Muamua, e lei filifilia
e Iesu nu’u ese, a o nuu ese ua latou filifilia Iesu ona e i ai le amiotonu i lana
tala’iga. Lua, ua maopoopo gagana ma nuu ese ona o le mau ia Keriso Iesu.
Tolu, o lenei lava galuega, ua fa’ailoa ai le alofa tunoa o le Atua, ma e moni
lava, o Iesu o le Alo o le Atua. Ai se talia o ia, e fa’aolaina i lona suafa. O le
amiotonu moni lea.
Tatalo: Le Atua e, totō i o matou loto lau amiotonu e ala ia Iesu, Amene.
Aso Tofi - Aokuso 27: “Leai se ‘alofaga” (No excuse)
Tusi Faitau - Roma 10:14-21
Matua - f.14: “O lenei, pe fa’apefea ona latou valaau atu i le ua latou le
fa’atuatua i ai? pe fa’apefea foi ona latou fa’atuatua i le ua latou le fa’alogo
atu i ai? pe fa’apefea foi ona latou fa’alogo atu, pe a leai se tala’i atu?
E tele matua e fa’aseā i fanau ona o le leaga o togi ma ripoti mai a’oga. E
fa’apea le mau a Paulo e uiga i le nuu o le Atua. Toa’tele e fai mai e lei
fa’alogo pe fa’atuatua i se talaina e lei auina atu lava ia i latou. Ae fai mai, “E
29
matagofie naua o latou vae, o e aumai le tala lelei e manuia ai”(f.15). O le
talalelei ua aumai ae le fia fa’alogologo iai. Fa’amaonia i upu a Isaia, “Le
Alii e, o ai ea ua talitonu i la matou upu ua taulogologo atu? (f.16)”
Ua fa’amatuu mai e le Atua lana tulafono, o perofeta, ma ana poloaiga.
Tele le avanoa sa ave i lea tupulaga ma lea tupulaga. Ae ‘alo lava le tagata.
Si’o lava lona nuu i lea mea ma lea mea, ae paga lea, na i’u lava ina auina mai
le Alo o le Atua e fa’aola le tagata le fa’alogo.
Tatalo: Le Alii e, fa’amalosi mai ina ia mafai ona matou tauivi pea i le
folafolaina o lau Upu, ae ‘aua ne’i matou fiugofie, Amene.
Aso Faraile - Aokuso 28: “O ē ua totoe” (The remnant)
Tusi Faitau - Roma 11:1-12
Matua - ff.5-6: “O lenei, e fa’apea foi i nei ona po, ua i ai ē ua totoe e tusa
ma le filifiliga o le alofa tunoa. Afai foi o le alofa tunoa, ua le o galuega; ana
fa’apea, po ua le toe ta’ualofatunoaina le alofa tunoa.”
I le faitauga o lenei aso, o tagata o le nuu o le Atua, o ni tagata e tete’e i le
Atua. O ni tagata e le fia fa’alogo, ae fai lava o latou loto. Sa tuu avanoa i ai
le Atua. Ae faamata sa tatau ona toe tuu avanoa i ai le Atua? Ioe. E le o le
natura lea o le Atua o le taui ma sui i le vaivai o ē na totoe. A o le alofa.
Fa’afetai i fa’ataitaiga lelei e liliu ai le vaivai e avea ma mea malosi. O le
suiga la o le upu mo tagata ua totoe i le feagaiga fou pei ona fa’aaogaina e
Paulo, o e ua totoe ua taumafai mo le Alii ma lana talaiga. O le mau tauave foi
lea e mafai e le Atua ona fa’aaoga le to’a itiiti e fa’atupu ai mea tetele. A o le
malosi fou foi lea mo e ua totoe e mautinoa e fai paaga i latou ma le Atua.
Tatalo: Le Atua e, fa’afetai ona o lou onosa'i e ui lava i lo matou tete’e ma le
lē usita'i i lau afio, Amene.
Aso Toona’i - Aokuso 29: “O la’au olive” (The olive trees)
Tusi Faitau - Roma 11:13-24 Matua - ff.20b-21: “… a ua gauieseina i latou ona o le le fa’atuatua, a o loo
tumau oe ona o le fa’atuatua; aua e te fa’amaualuga, a ia e fefe. Auā afai ua le fa’asaoina e le Atua o la na tupu mai ai, o le a le fa’asaoina foi oe.”
O se mea faigata le saoasaoa o le poto fou i nei ona aso, ua su’esu’e ai le
moni o mea ua leva ona masani ai. Ua o’o i fa’avae o aiga, o nu’u ma aganuu,
ua su'esu’e le moni e nei augā tupulaga. Ua fia tavavae ese lalā mai le pogai, ma ua tete’e i faiga na sau a’i. E fa’apea le molimau a Paulo i le amata mai o
le Ekalesia Kerisiano. O Isaraelu o le ulua'i nu’u o le Atua, ae latou te lei talia
Iesu o le fa’aola. Ua fa’atusaina ai i le la’au o le Olive. O Iesu o le pogai, a o
Isarelu o ona la. Ua motusia lālā laau ona ua le fia pip’ii i le pogai. O tagata o
nuu ese lea ua fa’atuatua moni i le pogai o le Olive ma ola ai. Ua aveese lalā tuai ma motusia ai lo latou fa’asinomaga i le laoai o le Matai. Ae amata e
tagata o nuu ese manuia o le sua ma le aano o le Olive fou o le laau a le Atua.
30
Tatalo: Le Atua amiotonu e, fesoasoani mai ia avea i matou ma la e pipii pea
i le pogai e maua ai le ola, Amene.
ROMA 9-16
2 – O Mea Alofa Eseese
Aso Sa - Aokuso 30: “O ala o le Atua” (The ways of God)
Tusi Faitau - Roma 11:25-36
Matua - f.33: “Auē! le loloto o le tamaoaiga o le poto atoa ma le silafaga a le
Atua. E le masu’esu’eina ana fa’amasinoga; e le mafai foi ona iloa ona ala.”
“Auā o o'u manatu e le o outou manatu ia, ma o'u ala e le o outou ala ia’, ua
fetalai mai ai le Alii.” O upu ia a le perofeta o Isaia o loo fa’amatala ai le
silisiliese o le Atua ma le faatauvaa o le tagata. E felanulanua'i le lalolagi. E
tele foi tu ma aga a lea atunuu ma lea atunuu. O le saili la i le finagalo o le
Atua, e ese foi lona faiga. E ta’ialaina i tatou e lana Afioga Paia. A o le tatalo,
o le gagana lea o fesootaiga ma lo tatou Matai. Tatou te fa’asoa ma fa’ailoa i
le Matai o tatou vaivaiga, aemaise manaoga fa’apitoa. O le toaga e faitau ma
mafaufau i le Tusi Paia, e fa’ailoa mai ai le Afioga Paia a le Atua, aemaise o
ana meaalofa mo lana fanau. Tatou te le mafaia ona masu’esu’eina le finagalo
o le Atua, ae ao ia i tatou ona faia lona finagalo.
Tatalo: Fa’amalamalama i matou i lou finagalo matou te savavali ai, Amene.
Aso Gafua - Aokuso 31: “O meaalofa eseese” (Different gifts)
Tusi Faitau - Roma 12:1-8
Matua - ff.5-6a: “ … e fa’apea i tatou nei le toatele, ua tino e tasi ia Keriso,
ma ua fefa’afeagaiai itu tino. O loo eseese foi a tatou mea e tufaina mai i le
alofa tunoa ua foaiina mai ia te i tatou;”
I le maoa'e o le saosaoa o le poto fou, ua naunau tupulaga ia pei o isi foi
tupulaga o lo’o i Amerika ma atunuu o Europa ona o a latou ata, pese, ma uiga
fa’aalia. O telefoni ma la’ei, o teuga ua taumafaiga ia pei o papalagi ma isi
atunuu. O le gagana ma tu a Samoa, ua natia ma vaai maualalo i ai.
Fa’amanatu Paulo, e eseese i tatou, a o tatou uma o le tino o Keriso. E
eseese a tatou taleni mai le Atua. O nisi e fai perofetaga, folafola, inisinia ma
kamuta. Pese ma fai fa’aili nisi. E eseese uma lava taleni ua tuuina e le Atua i
tagata. O nisi o taaloga ma fa’afiafiaga, a o nisi o le taleni o le kuka. O le
eseese o taleni, o le tele foi lea o fa’amanuiaga mai le Atua. O le eseese ma le
felanulanua'i foi lea o le tunoa ole alofa ole Atua mo tagata uma.
Tatalo: Le Atua le Tama, fa’amagalo i matou i lo matou vaai fa’aatauvaa i ou
tagata ona o le ese o a latou meaalofa, Amene.
Aso Lua - Setema 1: “Ia le fa’atoilaloina” (Never flag)
Tusi Faitau - Roma 12:9-13
Matua - f.9: “Aua nei fa’atagā alofa, ia inoino i le leaga, ia pipii i le lelei”
31
Ua tuuina mai e Paulo ia i tatou se fua fa’atatau o le alofa, ma e mafuta
atu i le lelei i le tasi i le isi. Ua ta’utino Paulo, o le alofa e iloa ai le mamalu,
naunautai, auauna atu, fa’amoemoe, onosaʻi, fa’amaoni ma le talimālō. E
manino le uiga o le alofa pe a lu’itauina i tatou e nonofo fealofani. O le alofa o
le gaioiga e mafai ona e amataina, pe tali atu i se talanoaga, pe matauina se
fefa’asoaaiga i le va ma isi tagata. I le avea ai ma soo o Keriso e tala’i le Tala
Lelei, ia lagona le tāua o upu e fa’aleo atu ai le alofa, ina ia mafai ona lagona e
tagata le uiga moni o le alofa i le Atua. Tatou te taumafai ina ia foliga lo tatou
alofa i le alofa fa’ale-Atua. E ui i lo tatou fa’atuvaa, ae aumai e le Atua ‘auala
e fa’aalia ai lea alofa i tagata. O le alofa e tatau ona fa’amaoni, e pei ona fai
mai ai Paulo ia Roma. Auā o ala na o le Atua.
Tatalo: Le Atua e, ia fa’aalia lou lelei i mea matou te faia ina ia mafai ai ona
matou olaina lou alofa, Amene.
Aso Lulu - Setema 2: “Aua le taui ma sui” (Never avenge)
Tusi Faitau - Roma 12:14-21
Matu - f.17: “Aua le taui atu le leaga i le leaga i se tasi, ia sauniuni mea e
tusa i luma o tagata uma lava.”
O le faitauga o lenei aso ua faʻamalosia ai i tatou e saili ni ‘auala e mafai
ona fo’ia ai feteenaiga e tupu ai le femisaa’i ma le taui ma sui. Peita’i, ua
aumai mo i tatou e le tusi o lenei aso le tāua o le fausia o mafutaga e mafai ai
ona tatou maua le lelei ma le loto gatasitasi e tetee atu i le taui ma sui.
O le alofa tunoa o le Atua, e le mafai ona aveesea ma i tatou; tatou te
mafai ai ona maua le toafilemu i o tatou loto. E ui ona o le natura o le tagata o
le taui ma sui, peita’i, e mafai ona aveesea ia uiga, pe a tatou tatalo mo le alofa
tunoa o le Atua e fesoasoani mai mo i tatou.
Tatalo: Le Atua e, o lou agalelei e mafai ai ona matou iloa lou alofa e aveesea
ai le taui ma sui i ai matou. Amene
Aso Tofi - Setema 3: “O le Atua ma pulega fa’alemālō”
Tusi Faitau - Roma 13:1-7 (God and the civil authorities)
Matua - f.7: “O lenei ia avatu i tagata uma lava a latou mea, o le lafoga i e
ua tatau i ai le lafoga, o le tiute i e ua tatau i ai le tiute, o le matau i e ua tatau
i ai le matau, o le fa’aaloalo i e ua tatau i ai le fa’aaloalo.”
O le fesili taatele lava, ‘O tatou ola ea o ni tagatānu’u lelei o le mālō ma le
lalolagi a le Atua?’ O nisi taimi, ua taumafai tagata e fa’atulaga le mālō i o
latou lava manatu ma lagona fa’aletagata, ma ua avea ai faigamālō, ma mālō e
le fa’atuatuaina. Peita’i, o ala o le Atua, e tatau ai ona usita’ia e tagata uma
tulafono a le mālō, e laugatasia uma ai.
Ua fa’amanatu mai e Paulo ia i tatou, le avatu o mea e tatau mo le mālō,
ma mea e tatau mo le tagata. O vaega uma ua aumai e Paulo, o loo matua
manino ai le va feagai ai o le tagata a le Atua ma pulega a atunuu, auā o le va
32
feagai ai lea o le tagata ma atunuu. E iloa ai, o i tatou o tagata ua valaauina e
le Atua e usiusitai ma fa’alogo, ma tausia tulafono mo le manuia o tagata uma.
Tatalo: Le Alii e, tuuina i matou i totonu o faigamālō, ina ia mafai ai ona
matou usitaia tulafono mo le manuia o tagata uma. Amene
Aso Faraile - Setema 4: “Alofa ma le tulafono” (Love and the law)
Tusi Faitau - Roma 13:8–14 Matua - f.10: “E le agaleaga atu le alofa i le la te tuaoi, o le alofa o le
atoatoa lea o le tulafono.”
Ua fa’amatalaina e Paulo le tulafono o se ‘auala e mafai ona toe fa’alelei
ai le tagata ma le Atua. Sa fa’alagolago tagata o le Atua i le tulafono ma
taumafai e mulimuli i ana poloaiga. O le tulafono na saunia ai le auala e
ta’ita’iina ai i latou i lo latou mafutaga ma le Atua. Manatu le aposetolo, o le
afio mai o Iesu, o le alofa e sili atu i le tulafono. Tatou te faia le mea e tatau
ona tatou faia ona tatou te iloa le mea e finagalo ai le Atua.
O lenei fuaitau i le Roma, e fa’amanatu mai o le alofa e le gata o se mata-
upu o le malamalama, ae o se mataupu o le poto masani. O le alofa e taʻitaʻiina
i tatou e mafuta ma le Atua, ina ia tumau lona alofa e luitauina ai i tatou, e tali
atu ma le fiafia i mea o finagalo ai le Atua, e ala i lana fa’asinomaga.
Tatalo: Le Atua e, tatala o matou loto ina ia iloa ona alofa atu i nisi, Amene.
Aso Toona’i - Setema 5: “Aua le ola fa’amasino” (Don’t judge)
Tusi Faitau - Roma 14:1-12 Matua - f.10: “O oe na, se a le mea e te fa’asala ai i lou uso? O oe na foi, pe
se a le mea e te taufa’atauvaaina ai lou uso? Auā tatou te laulaututū uma lava i
luma o le nofoa fa’amasino o Keriso.”
O le fa’amanatu, e tatau i ai tatou ona ogatotonu le Atua i soo se mea tatou
te faia. E toatele tagata e fiafia e fa’amasino atu. Peita’i, ua uma ona saunia e
le Atua auala e mafai ai ona fa’alatalata mai ai tagata tatou te le malilie i ai
(ff.1-4). Ua le gata i lea, ae ua fa’amanatu mai, e tatau i tagata ta’ito’atasi ona
mafaufau pe fa’apefea ona faʻaaloalo i le Atua (ff.5-6). Na maliu Keriso mo
tagata uma, ma o le Atua o loʻo i ai le pule e fa’amasino ai, ae le o i tatou
(ff.7-10). O nisi taimi tatou te le iloa lo tatou faʻamoemoe i le lalolagi, pe a tatou gaua’i atu i fa’aosoosoga, ma leiloa ai pe fa’apefea ona maua le tasi.
Tatalo: Avea i matou ma Savali o Keriso e tutū ma galulue fa’atasi, Amene.
ROMA 9-16
3 – Talia e le Tasi le Isi
Aso Sa Tala Lelei (Aso Sa o Tamā i Niu Sila, Ausetalia)
Aso Sa - Setema 6: “Aua le fa’apa’ū le tasi i le isi”
33
Tusi Faitau - Roma 14:13-23 (Don’t trip one another)
Matua - f.13: “O lenei,‘aua nei tatou toe fefa’amasinoa’i, ae lelei ina ia
manatu i lenei lava mea,‘aua nei tu’u ane e se tasi se mea e tausuai ai, po’o se
mea e tau tevateva ai lou uso.”
Ua valaauina i tatou e Paulo ina ia mulimuli i o tatou loto fuatiaifo, ma
‘aua le fa’avaivai. O le alofa atoatoa e aveesea ai le fefe. O le alofa lea e mafai
ai ona tatou talia isi tagata i le ola fefa’amagaloa’i. O le soifua i se olaga
eleelea, e avea ma ‘auala o le a fa’avaivai ai lou ola taumafai, ma e mafai ai
ona galo ai le Atua. Peita’i, o le ola fefa’asoaai, tatou te mautinoa ai le
mafanafana o le Atua e pa’i mai i o tatou loto, e mafai ai ona tatou talia isi
tagata i le ola ua iloa le matagofie o le agalelei atu ma le fa’amagalo atu. O lo
tatou olaina o nei olaga, e manino ai la tatou vaai i le Atua, ma tootutuli ai o
tatou tulivae ma ta’uta’u e o tatou laulaufaiva le mamalu o le Atua.
Tatalo: Fesoasoani mai lo matou Atua, ina ia matou iloa ona tausia le va lelei
ma isi tagata, auā o lou lava lea finagalo mo i matou, Amene.
Labor Day (Amerika)
Aso Gafua - Setema 7: “Talia e le tasi le isi” (Accept one another)
Tusi Faitau - Roma 15:1-13 Matua - f.7: “O lea ia outou talia ai le tasi e le tasi fa’apei o Keriso foi ona
talia o i tatou e oo ai i le viiga o le Atua.”
O le alofa i le tuaoi o se itu tāua lea, ma e mafai ona avea o tatou lagona
mo i latou ma ‘auala tatou te talia ai i latou. O ‘auala tatou te talia ai isi tagata,
o ‘auala na e mafai ai ona tatou masani ma fegalegalea’i ai ma ē o loo moomia
oe ma a’u i se ‘auala e mafai ai ona ofoina atu le fesoasoani.
Ua aumai e Paulo i lenei faitauga le tāua o le taliaina o tagata uma. Ua
a’oa’o mai, ia le gata i le talia o tagata uma i le loto fiafia ma le onosai ma le
fa’apalepale, ae ia mafai ona ofoina atu i ai o tatou meaalofa e pei ona fa’asoa
mai e le Alii. E le mafai ona tatou iloa o i tatou o ni tagata lelei ma alolofa, pe
afai tatou te le mafai ona talia isi i o tatou loto. E le o le talia ona ua alofa
mai, ae ia talia ona o le alofa fa’ale-Atua o loo ia i tatou, e mafai ai ona tatou
iloa atu le uiga moni o le finagalo alofa o le Atua, o lē na mua’i alofa mai.
Tatalo: Le Tamā alofa e, fesoasoani mai ina ia matou iloa le uiga o le alofa e
talia ai soo se tagata, e pei ona e taliaina i matou, Amene.
Aso Lua - Setema 8: “Fa’amaoni le taliaina o tagata ese!”
Tusi Faitau - Roma 15:14-22 (Welcome outsiders genuinely!)
Matua - f.21: “Ae peita’i e fa’apei ona tusia, “E va’ava’ai i latou o e na le
talaina i ai le tala ia te ia e lagona e i latou o e na le fa’alogo atu i ai.”
E foliga mai sa faitioina Paulo ona o le avea o ia ma auauna a Keriso Iesu
i nu’u ese, nai lo le fa’amuamua o ona uso Iutaia. O le natura masani o le
tagata, e fiafia e fa’afeiloai tagata e masani ai; ae a o’o atu i tagata e le masani
34
ai, ona ‘alo lea. I nei ona aso, e telē se a’oa’oga e mafai ona maua e le tagata
Kerisiano i lona feiloa’i atu i tagata ese e le masani ai. E le gata o se avanoa e
mafai ona fou ai le talaiina o le Tala Lelei, a o se avanoa foi e mafai ona
lagona ai le moni o le alofa o Iesu ma le fou o mea na te faia i lo tatou ola. O
le taula’i atu o Paulo i nu’u ese, e le fa’apea ua te’ena ai e ia tagata Iutaia, a o
se itu tāua na mautinoa ai ua maua e le Ekalesia atoa le va’aiga fou ma le
malamalama fou, e ala i le mana o le Tala Lelei.
Tatalo: Le Atua e, fesoasoani mai ina ia matou fa’alogo i nisi leo fou ma
mafaufauga fou e viia ai lau Afio, Amene.
Aso Lulu - Setema 9: “O se tauiviga faigata” (An uphill struggle)
Tusi Faitau - Roma 15:23-33
Matua - f.30: “Le au uso e, ou te aioi atu ia te outou ona o lo tatou Alii o Iesu
Keriso, ma le alofa o le Agaga, ia outou matua finafinau fa’atasi ma au i
talosaga i le Atua mo au.”
Ta’ua e Paulo lona olaga, o se tauiviga faigata. I ana tusitusiga, fa’apea
foi le tusi o Galuega, o loo fa’amatala ai tulaga lamatia, ma osofa’iga faifaipea
sa feagai ma ia i lona olaga atoa i le talaiina o le Tala Lelei.
O le poloa’iga ia alofa atu i lē lua te tuaoi e pei o oe lava ia te oe, e le
faigofie lona fa’atinoina. E aofia ai le tatalo atu mo isi, aemaise i latou ua sili
atu ia te i tatou. E aofia ai foi ma le tatalo o le tagata mo ia lava. E le aanoa a
tatou talosaga mo isi, pe a le tatalo le tagata lava ia mo ia. O le tagata ua
manatu, ‘O le tatalo o le mea e fai mo isi,’ e le o faalagolago o ia i le Atua i
mea o loo tauivi ai. E leai se mea e mafai ona tatou ofo atu mo isi, se’i vagana
ua tatou mua’i maua mai i le Atua. Fa’amanatu mai e Paulo le tāua o le maua
mai mai i le Atua, ma le ofo atu mo isi. O le paleni i le va o le ofo atu ma le
maua mai, o le tatalo ma le tauivi, e fiafia ai tagata e ‘auai i le Ekalesia.
Tatalo: Fesoasoani mai le Atua, ina ia matou iloa ona tauivi ma le loto atoa
mo lau Afio ma lou finagalo, Amene.
Aso Tofi - Setema 10: “Pele tagata ma tagata uma”
Tusi Faitau - Roma 16:1-16 (Dear each and everyone)
Matua - f.15: “Ua ou alofa atu ia Filoloko ma Iulia, o Nereu foi ma lona
tuafafine, ma Olumepa, ma le au paia atoa uma o ia te i latou.”
Manatua e Paulo nai tagata sa pele ia te ia, o i latou sa latou galulue
fa’atasi, ma sa fesoasoani ia te ia a o nofo ai i le falepuipui. Sa tatalo Paulo mo
tagata uma sa alolofa mai ia te ia. I ana tusitusiga, e le gata sa fa’afeiloa’i e
Paulo tagata i o latou igoa, ae sa ta’ua foi suafa o i latou sa latou fa’atasi: e pei
o ona uso faigaluega, o le tusiupu na tusia ana tusi, fa’apea le tagata e ona le
fale sa nofo ai. Na talia e Paulo nei tagata uma, ona o tagata sa tuʻuina e le
Atua i luma o lona ala a o feagai ai o ia ma le talaiina o le Tala Lelei. E le
fa’apea o le a tatou fiafia i tagata uma tatou te fetaia’i ai. E i ai foi tagata ua
35
tatou masani ai, ae tatou te lē fiafia i ai. O le finagalo o le Atua, ia tatou
alolofa i tagata uma e pei o oe lava ia te oe.
Tatalo: Le Alii e, fesoasoani mai ina ia matou tatalo mo nisi o loo latou talia i
matou, ma i latou foi o loo teena i matou, Amene.
Aso Faraile - Setema 11: “Aua le fa’avaleaina” (Don’t be duped)
Tusi Faitau - Roma 16:17-20
Matua - f.19b: “…ou te olioli ai ona o outou “Ou te manao foi ia popoto
outou i mea lelei, a ia valea i mea leaga.”
E le o se uiga lelei le valea. Na fetalai Iesu, ia tatou fifilemu e pei o lupe
ae ia atamamai pei o gata. E tatou te lagona le alolofa i tagata o le Atua, ma e
tatau ona tatou vaavaai totoa i tagata uma. E toatele tagata e le alolofa i ai
latou lava, ma e iloa i a latou fa’aupuga ma amioga e fai. I le soifuaga o Iesu,
o loo manino ai na ia talia tagata uma, ae na te lei fa’atuatua i ai. E tatou te
alolofa i tagata uma, auā o tagata na faia e le Atua, e pei ona alofa Iesu mo i
tatou. O le manao mai o lou atalii poo sou afafine i se mea, e talia i taimi uma,
ae tāua lo tatou vaavaai totoa i o latou manaoga pe talafeagai. Ua tatou manino
i le fetalaiga a Iesu, ina ia fa’apei i tatou o tamaiti, i le fa’atuatua ia te Ia.
Tatalo: Lo matou Tamā, fesoasoani mai ia matou ‘alo ‘ese mai le agasala o le
taufa’avalea, ina nei aafia ai lo matou ola fa’atuatua, Amene.
Aso Toona’i - Setema 12: “Ua nao le tasi lava” (The one and only)
Tusi Faitau - Roma 16:25-27 Matua - ff.25a, 27: “..e tusa ma le fa’aaliga o le mea lilo sa natia i tausaga
o le vavau...o le Atua ia e toatasi ia iā te ia le viiga, ia Keriso Iesu e fa’avavau. Amene”
E to’atasi le Atua, e tatau ona tapua’i ai tagata uma. E na’o le Atua e ao
ona fa’aneeneeina, auā o loo ia te ia le pule ma le mamalu. O le fa’aalia o le
mea lilo, e na’o le Atua e mafai ona fa’aalia ia te i tatou ta’itoatasi. O mea foi
ua folafolaina e le Atua, o mea lava ia e fa’aalia ai lona silisiliese. Ua a’oa’o
mai le faitauga o lenei aso, ia tatou manino i lona alofa. O le atoaga o le Tala
Lelei o loo aumaia ai le feau: e na’o le Atua e lelei. Soo se vaega e aofia ai le
lelei ma le leaga, o le filifiliga lava lea a le tagata e talia ai, auā e le mafai ona
talia mea uma e lua.
Tatalo: Aumai le loto tele e iloa ai ua nao oe lava le Atua e to’atasi, Amene.
TALA PEPELO MA LE TALA LELEI
1 – Tala Pepelo
Aso Sa - Setema 13: “Moni pe sesē” (True or False)
Tusi Faitau - Teuterenome 18:18-22 Matua - ff.21-22a: “Afai foi e te fa’apea ifo i lou loto, ‘Pe fa’apefea ona matou
36
iloa o le upu e lei fetalai i ai le ALII.’ A tautala se perofeta i le suafa o le ALII,
afai e le oo le mea, e le taunuu foi, o le upu lea na lē fetalai ai le ALII.”
I lenei vaiaso, o le a tatou va’ava’ai i uiga o tala e fa’asalalauina, aemaise
o tala pepelo. Tatou amata i le ‘au perofeta, aemaise o perofeta e taufa’asesē
ma a latou fa’asalalauga pepelo. O le a tatou va’ai i le i’uga o ia perofeta,
fa’apea tagata o loo fa’alogo i a latou fa’asalalauga pepelo.
O le fa’atosinaga a ala o fa’asalalauga i nei ona aso, e le masalomia. O le
tele o talitonuga a tagata i nei ona aso, e fa’avae mai ai. Ua mafai e so’o se
tasi ona faia ana ia lava fa’asalalauga. Ua tatou leiloa ai poo fa’asalalauga e
moni, ae poo fea faasalalauga e pepelo. Tatou te fiafia i fa’asalalauga e ta’u ai
le manuia, le filemu, ma isi mea manaia. A o le tele o mau a le Tusi Paia o le a
tatou va’ava’ai ai i lenei vaiaso, o mea e manaia ma fiafia ai le fa’alogo o
tagata, o mea ia e masani ona fa’asalalau e perofeta pepelo.
O le tusi faitau o lenei aso, o loo fetalai mai ai le Atua i le i’uga o le
perofeta pepelo: e i’u i le oti. O le fesili: e faapefea ona tatou iloa faasalalauga
moni ma faasalalauga pepelo? E le faigofie. Ae tusa ai ma le faitauga o lenei
aso, “afai e le oo le mea, e le taunuu foi,” o lona uiga, e pepelo.
Tatalo: Le Atua e, fesoasoani mai ina ia matou iloa le sao ma le sesē o
valoaga ma faasalalauga ua tele nauā i nei ona aso, Amene.
Aso Gafua – Setema 14: “Ta’ita’i ma le amio sa’o” Tusi Faitau - 1Tupu 13:11-24 (Leading with integrity)
Matua - f.18: “Ona fai atu lea o ia ia te ia, ‘O au foi o le perofeta e pei o oe,
ua fai mai foi le agelu ia te au i le afioga a le ALII ua fa’apea mai, ‘Ina e toe
fa’afoi mai ia ia te ia fa’atasi ma oe i lou fale, ina ia ‘ai o ia i mea e ‘ai, ma
inu i le vai.’ A ua tala pepelo o ia ia te ia.”
O le perofeta talavou mai Iuta sa tautala atu i le mea moni ia Ierepoamo.
Na ia tautala faʻamaoni e uiga i mea o le a tutupu i le lumanaʻi, ma aumai ai
ma le fa’ailoga. Sa usita’i le perofeta talavou, ma faia mea uma na fa’ailoa mai
e le Atua ia te ia. Ae fa’asalalau e le perofeta matua o tala pepelo i le perofeta
talavou, ona talitonu lea i ai, ma oti ai ona o lona le usitaʻi. Ua oti le perofeta
talavou ona o lona talitonu i tala pepelo. Ua fai foi si vavevave ona talitonu le
perofeta talavaou, a ua le saili muamua le moni ma le sesē o fa’asalalauga a le
perofeta matua. Masalo o se a’oa’oga foi lea mo i tatou i le i’uga e o’o ai le
tagata e talitonu gofie i tala pepelo, ma le tagata e fa’atupuina ia tala. E tāua
le fuafua o a tatou tala e faia. O le soona lafo o tala poo le fa’atupu o tala sesē,
o le fa’ailoga lea o le leai o se tofa ma se fa’autaga.
Tatalo: Le Alii e, fa’afou mai se vaega o lo’u olaga o fa’aletonu, ina ia mafai
ai ona ou tautala i le fa’amaoni, Amene.
Aso Lua - Setema 15: “Tu ‘ese mai le motu o tagata”
Tusi Faitau - 1Tupu 22:4-28, 34-35 (Standing out from the crowd)
37
Matua - f.14: “Ona fai mai ai lea o Mekaio, ‘O loo soifua le ALII, o le mea e
fai mai ai le ALII ia te a’u, o le mea lena ou te fai atu ai.”
E talitonu gofie tagata i tala pepelo, aemaise o tala e suamalie i le faalogo,
poo tala e faatatau i se mea ua e naunau lava ina ia tupu. Sa naunau lava Aapo
e talitonu na te le oti i le taua, ma taumafai e ta’u pepelo le perofeta o Mekaio.
Peita’i, sa i ai lava le popolega ia Aapo ne’i mo’i le perofetaga a Mekaio, o lea
na aveesea ai ona ofu tau i le taimi o le taua, ina ia le iloa ai o ia e le fili, o ia o
le tupu. Ua faia nei mea e le tupu, ona o le naunau e ta’u pepelo Mekaio.
Sa tu ‘ese lava Mekaio mai le motu o tagata e tautala fa’amaoni i le mea
sa’o. Sa le fefe. Sa tu ‘ese mai le mea masani sa faia e isi perofeta o lena
vaitau, o le faia o tala e viivii ai le tupu. Silafia e Mekaio le i’uga e o’o i ai le
tagata e tetee i le mea ua masani ai ma faia tala e leaga ai le tupu. Ae na le
solomuli ai. O le tele o faiga pepelo o loo i ai i lenei lalolagi, e taumafai e
fa’avaivaia ai i tatou mai le tautala i le mea sa’o. Ua valaauina i tatou e le Atua
e tautala i le fa’amaoni, e tusa lava poo le a lona taunuuga.
Tatalo: Fesoasoani mai le Atua ina ia matou fiafia e tautala i le mea sa’o e
viia ai lau Afio, ae le o tala pepelo e viia ai le tagata, Amene.
Aso Lulu - Setema 16: “O le upu moni e tu’u saoloto ai oe” Tusi Faitau - Ieremia 23:16-32 (The truth makes you free)
Matua - f.16: “O loo fa’apea mai o le ALII o ‘au, ‘Aua tou te fa’alogologo i
upu a perofeta o e vavalo ia te outou, ua latou fa’asesē ia te outou e fai mea
fa’atauvaa, ua latou tautala atu i le fa’aaliga mai o latou lava loto, ae le mai
le fofoga o le ALII.”
O le tele o tala fou ua talitonu ai tagata i nei ona aso, e sau mai le social
media, poo aga fou o fesootaiga fa’ale-tagata i nei ona po. O nei aga fou ua
suia ai le olaga ma ‘auala o fesootaiga sa tatou masani ai. Ua faigofie ai i
tagata ona potopoto ma fuafua fa’atasi se fa’asalalau o le a fai, e tusa lava pe
talafeagai pe leai. I le tusi faitau o lenei aso, ua potopoto ma fuafua fa’atasi e le
‘au perofeta a latou tala pepelo o le a fa’asalalauina. Ua fafau lelei a latou
fa’amatalaga, ina ia avatu ai le faamoemoe ia Ierusalema o le a lavaeiina i
latou e le Atua mai ia Papelonia. Ae ua ta’u ai fua ma le suafa o le Atua, a o
tala e le mai le Atua. Tatou te fiafia e faalogo i tala e tupu ai le fa’amoemoe,
aemaise i taimi o loo feagai ai i tatou ma puapuaga ma faigata o le soifuaga.
Peita’i, e i ai taimi e le sa’o ai ia tala. E sili ai le ta’u mai o le tala moni, e tusa
lava pe faigata i le fa’alogo, ona mafai lea fai ai se fa’atatauga i le aga’i i luma.
E pei o upu a lo tatou Alii o Iesu, “o le upu moni e tuu sa’oloto ai oe.”
Tatalo: Le Atua fesoaosani mai ina ia matou iloa le upu moni, nai lo le
pelogia o i matou i tala sesē, Amene.
Aso Tofi - Setema 17: “Leo, leo, leo” (Voices, voices, voices)
Tusi Faitau - Ieremia 28
38
Matua - f.9: “o le perofeta ua vavalo i le manuia, a taunuu le upu a lea
perofeta, ona iloa ai lea, e moni, o le perofeta lea, ua auina mai e le ALII.”
E tele leo eseese i nei ona aso o loo taumafai e gaua’i mai oe. O ai le leo
e te faalogo i ai? O Hanania le leo sa vavalo pepelo i le vaitau o Ieremia, ma
sa taumafai ina ia talitonu ma gaua’i mai tagata ia te ia.
E tele leo tatou te fa’alogo ai pea i aso uma. Ae tatau ona tatou iloatino
poo ai e ona ia leo, ina ne’i fa’asesēina i tatou. Ia tatou iloa moni le siufoifoga
o le Atua, e le mafai ai ona fa’asesēina i tatou. O isi e masani ona ola i
mafatiaga, ona o le faia o mea e ta’u atu e leo ia te i latou. O nisi leo ua faigata
ona tatou talitonuia, poo leo o se manuia, poo leo o se malaia. Peita’i o lenei
faitauga, ua fa’amanatu mai ai pe tatou te talitonu ia Ieremia, poo Hanania. O
Hanania sa ta’ita’ieseina tagata, o ana valoaga na le taunuu. A o Ieremia, e ui
ina talia gata lana feau, a o le mea moni sa tupu. Tatou fa’atuatua i le mafuta
mai o le Atua, tatou te iloa ai le leo sili ua nao le Atua lea.
Tatalo: Le Atua e, fesoasoani ma ina ia sa’o le leo matou te fa’alogo iai, ae
aua ma le leo o le taufa’asesē, ma le taufa’a’ole’ole, Amene.
Aso Faraile - Setema 18: “E lē fa’atau atu le Tala Lelei” Tusi Faitau - Mika 3:5-12 (The gospel is not for sale)
Matua - f.5: “O loo fa’apea mai le ALII i perofeta o ē fa’asesē i lo’u nuu, o ē
feū i o latou nifo ma alalaga atu, ‘O le manuia,’ a o le ua lē avane mea i o
latou gutu latou te sauni lava le taua ia te ia.”
O upu a Mika sa aga’i tonu lava lea i ta’ita’i, ina ua latou fa’apologaina
tagata matitiva, ae tele ai lo latou tamaoaiga. O se tasi o itu faigata, ona o nisi
o nei ta’ita’i o loo ola i se olaga e sili ma le tamaoaiga, ae le mafai ona maua
le lagona o le foai atu. O nisi tagata i aso nei, ua foliga mai e mafua ona tala’i atu, ona e fa’amoemoe ia maua mai se taui. O nisi taimi ua le mafai ona tala’i atu seiloga e muamua maua mai le taui, a o nisi taimi e fuafua le tala’i atu i le
mea e maua mai. Ua a’oa’o mai mo i tatou lenei faitauga, o le tala lelei o le
tala’i atu e aunoa ma le fa’alagolago i se taui, ma ofo fua atu.
Tatalo: Le Atua alofa e, fesoasoani mai ina ia matou talai atu lou finagalo, e
aunoa ma le manao i se taui, Amene.
Aso Toona’i - Setema 19: “Fa’afitauli o amioga” (Tricks of the trade)
Tusi Faitau - Galuega 13:1-12 Matua - ff.6-8: “Ua latou soo i le motu, ua oo atu i Pafo, ua iloa ai e i latou
le tasi taulaitu, o le perofeta pepelo, o le Iutaia, o Paiesu lona igoa, sa i ai o
ia i le suikonesula, o Sekio Paulo, o le tagata fa’autauta lea, na aami lenei
tagata ia Panapa ma Saulo, ua manao i le fia fa’alogo i le afioga a le Atua. A
o Elima le taulaitu (auā o le uiga lea o lona igoa) ua tetee mai o ia.”
O le perofeta pepelo o Paiesu, e taufa’asesē i togafiti fa’ataulaitu. Ua avea
o ia ma faufautua leaga i tagata. Sa ia faia ni valoaga pepelo ina ia talitonu ai
39
tagata ma liliuese ai mai le mea moni. I le mau o lenei aso, ua tatou mautinoa
ai o loo taumafai le tagata taufa’asesē e liliu ‘ese tagata mai le Atua.
O nisi taimi e fa’aaoga ai e tagata faiga fa’avae, o fuainumera, ma tulafono
e fa’asesēina ai tagata. E faʻapefea ona tatou iloatino i le va o le tala moni ma
tala faʻanoanoa i se mea taua i le olaga? Peita’i, poo a ia tala sesē ma tala
moni, a o le itu tāua o le auala tatou te taulimaina ai nei tala uma.
Tatalo: Le Alii e, fesoasoani mai ia matala o matou mata e iloa ai mea moni
mai lau Afio, Amene.
TALA PEPELO MA LE TALA LELEI
2 – Tala Lelei
Aso Sa - Setema 20: “Aisea e uia ai le ala faigata?”
Tusi Faitau - Luka 4:14-21 (Why take the risky way?)
Matua - ff.14-15: “Ona foi atu lea o Iesu i le mana o le Agaga i Kalilaia, ua
logo atu foi le tala ia te ia ua soo ai lava itu uma. Ua a’oa’o o ia i o latou
sunako, ua viia ai o ia e tagata uma.”
Ua foi ane Iesu i Kalilaia ma ua logotala ma ta’uta’ua o ia e tagata i le
ofoofogia o ana a’oa’oga ma fa’amalologa. Ua laulauovivilu Iutaia atoa. Mo
Iesu, aemasie le fa’atinoina o lona valaauina fa’a-Mesia, e le faigofie le tulaga
lea ua i ai. Peita’i, e lei uia e Iesu ni ala faigata, pe aloalo mamao ma tagata. O
le finagalo o Iesu, ia alu i le mea o i ai tagata, ina mafai ona latou manino i le
fa’aolataga a le Atua. E lei a’oa’o Iesu ona o sona fia viia. Ae sa ia a’oa’o ina
ia fa’ataunuu le finagalo o lona Tamā, o auala manino ia ma le mamā.
Ua tatou iloa i le tusi faitau o lenei aso, e lei uia e Iesu ni auala faigata e
tala’i ma fa’ataunuu ai lana galuega. Sa ia uia auala faigofie, ma auala e mafai
ai ona manino tagata i le uiga o le fa’aolataga. O le alo ese ma auala faigata, o
le faigofie foi lena ona manino le Tala Lelei ma lona uiga, auā o le soifuaga
fa’a-Iesu e le uia ai auala faigata. E faigata le auala, ona o le tagata lava ia.
Tatalo: Le Alii e, fesoasoani mai lou Agaga i o’u ala, Amene.
Aso Gafua - Setema 21: “Faigata ona talitonu” (Hard to believe)
Tusi Faitau - Luka 24:13-27 Matua - f.24: “O isi foi o i matou, na latou o i le tuugamau, ua fa’apea foi ona
iloa e i latou, pei ona fai mai ai o fafine, ae lei iloa e i latou o ia.”
Faigata i le ‘ausoo ona talia le maliu Iesu, ona ua oti atu ai ma lo latou
talitonuga i le Mesia ma le malo o le Atua na ia afio mai e fa’atuina. Ina ua
maliu Iesu, na toe foi lava le tagata ia i le nofoaga sa fa’amautu ai. Peita’i, sa i
ai pea le faamoemoe itiiti sa natia i le loto a le ‘ausoo. Ana leai, se manū latou
te le faalogo i le tagata ese sa latou faatasi i le ala i Emau, ma lona talanoa mai
ia Mose, le ‘au Perofeta, ma le fa’amatalaina o Tusi. O le fa’amoemoe i le
toetu, o le fa’aaliga o le alofa tunoa o le Atua i ona tagata, ina ia talitonu
40
tagata o le malamalama e mumū pea le fa’amoemoe o le Atua mo le tagata
fa’atuatua. E tatau ona tatou tutū i le fa’amoemoe, e aunoa ma le atuatuvale. A
o savavali so’o i Emau, sa auai ma Iesu, le fa’ailoga o le mafutaga le motusia
ma le Alii. O se tala e fa’ailoa ai le fa’amoemoe ola, o lo tatou manumalo
‘aia’i fa’atasi ma Iesu i le oti ma le tu’ugamau.
Tatalo: Le Alii e, le leoleo mamoe lelei, taitai i matou i le fa’amoemoe fou e
talitonu ai i lou mafuta mai, Amene.
Aso Lua – Setema 22: “Molimau i le agaga ma le fa’amaoni”
Tusi Faitau - Ioane 4:21-29, 39-42 (A witness in spirit and truth)
Matua - f.25: “Ua fai mai le fafine ia te ia, “Ua ou iloa o le a maliu mai le
Mesia (o lē ua igoa ia Keriso) “Pe a maliu mai o ia, e fa’ailoa mai mea uma
ia te i matou.”
O le fafine Samaria e le pei o isi fafine. Sa ia fa’alogologo ia Iesu – le
tagata e le masani ai – ma mafaufau loloto i ana upu, ma tuu fesili ia te ia. O
loo atagia mai i le fafine Samaria, le tagata ua fia inu i se olaga fou, lea na ia
toe fo’i ai i lona nuu ma le agaga ua sa’oloto mai ona mea sesē sa faia i le
tuanai. O le alofa tunoa o le fa’aolataga na tupu i le vaieli, na suia ai le loto o
lenei fafine. Sa fesoasoani Iesu i le ola o lenei fafine, e tapuai i le Atua i le
agaga ma le upu moni, e aofia ai ma le malamalama i le fa’atasi mai o le Atua.
Na avea o ia ma tina e talitonu ma fa’atuatua, ma sa ia ta’ita’i nisi tagata e
fa’ailoa atu ai le alofa tunoa o le fa’aolataga mai ia Iesu.
Tatalo: Le Atua fesoasoani mai ina ia matou fiafia e ta’ita’i tagata i le upu
moni e ola ai, Amene.
Aso Lulu - Setema 23: “Tala Lelei o le alofa tunoa” (Good news of grace)
Tusi Faitau - 1Korinito 15:1-11
Matua - f.2b: “...afai tou te taofi mau i le mataupu na folafolaina e a’u ia te
outou, pe afai ua outou lē talia fua.”
O le fa’amanatu ina ia lagona e le Ekalesia i Korinito le tāua o le upu na
folafolaina e Paulo. O le upu e fa’atatau i le Tala Lelei o le alofa tunoa. O le
liliuina ma le tumau o le tagata fa’atuatua i lea Tala Lelei, o le manino foi lea i
le atoatoa o le alofa tunoa o le Atua e mafai ai ona fa’asaoloto i tatou mai
faigata ma puapuaga o le olaga.
Na iloa lelei e Paulo le suiga o le a i ai le ola o tagata, o lea na toe ta’u atu
ai e Paulo ia Korinito, le tāua o le taofi mau ma iloa moni le uiga o le Tala
Lelei o le alofa tunoa. O Iesu o ia o le ogatotonu o le Tala Lelei, o lona alofa
lē mavae na te fa’asaolotoina i tatou.
Tatalo: Ia matou iloa lou alofa e lē mavae e maua ai le ola, Amene.
Aso Tofi - Setema 24: “Tasi le tagata mo tagata uma” Tusi Faitau - Ioane 11:49-52 (One man for the people)
41
Matua - f.50: “tou te le mafaufau foi, e aoga ia te i tatou, ona oti o le tagata e
toatasi ma sui o le nuu, ina ia le oti le nuu uma lava.”
Ina ua ta’utino atu e Iesu o ia o le toetu ma le ola, na ia fa’aolaina ai ona
tagata, fa’apea tagata na lamatia lo latou ola, ma ia tuuina atu lona soifua atoa
mo ona tagata. Ae le gata i lea, na avea o Ia ma ositaulaga i ona lava tagata,
ma toe fa’apotopoto mai i latou na fa’ataapeapeina.
O le toetu o Iesu Keriso, ua manino ai ua ia Iesu le mana e tutū fa’atasi ai
e na fa’ataapeapeina, i le loto talitonu ua saunia e Iesu le fa’aolataga mo tagata
uma. O lona maliu, o le fa’ailoga lena o le fa’amoemoe ma le malamalama ua
manino ai le lalolagi i le fa’ataunuuina o le finagalo o le Atua. Ia iloa ai, e
tatau ona tasi tagata uma i le finagalo alofa o le Atua, tusa lava poo le a le
tapuaiga ma le talitonuga.
Tatalo: Le Atua mamana e, ia e fesoasoani mai ina ia matou iloa ma talitonu,
na e maliu mo i matou ina ia matou maua le ola, Amene.
Aso Faraile - Setema 25: “Tula’i i luga ma tu i ou vae!”
Tusi Faitau - Galuega 26:1-20 (Get up and stand on your feet!)
Matua - f.16: “Ae tulai o ia i luga o oe vae, auā o le mea lea ua fa’aali ai a’u
ia te oe”
Na molimau Paulo i le suia o lona olaga ina ua mavae le fa’aaliga i le ala i
Tamaseko. O iina na fa’alogoina ai e Paulo se leo o fa’apea mai, ‘Tu i luga ma
tu i ou vae,’ ma o iina na ia talia ai le luitau e avea ma tagata e molimau i le
mana ma le alofa tunoa o le Atua. E tele Ekalesia na fa’atu e Paulo, e afua
mai i le leo lea e tu i luga ma alu e fa’ataunuu ona tiute ua valaauina ai. O ia
Ekalesia, ua latou lagonaina le tāua o le galuega a Paulo, e le gata mo i latou, a
o nisi o ē na fa’alogo ia Paulo, ua latou o atu foi ma tala’i atu.
O le atoatoaga o le olaga o Paulo ma lana galuega tala’i, na amata ina ua
tula’i i luga ma tu i ona vae e fa’atino le galuega a le Atua. O lana galuega ua
suia ai le olaga o tagata, e oo mai lava i nei ona aso, ina ua latou manino ma
talitonu i le alofa tunoa o le Atua.
Tatalo: Aumai mo i matou lou Agaga le Atua, e mafai ai ona matou tutū i o
matou vae ma faia lau galuega, Amene.
Aso Toona’i - Setema 26: “Laveaiina e le Tala Lelei” Tusi Faitau - Roma 10:1-15 (Saved by the good news)
Matua - f.15: “Pe fa’apefea foi ona latou talai atu, pe afai ua le auina atu i
latou? Pei ona tusia “E matagofie nauā o latou vae o e aumai le tala lelei i le
manuia”
O le avea ma Kerisiano, o le agai lea i luma e ta’u atu, ma fa’asoa atu,
fautua, ma fa’ailoa atu, o loo fa’atasi Iesu ma i tatou. O Ia o le Alii o le toe tu,
ma le manumalo. O le mafuaaga lea e ala ai ona matagofie o tatou vae, i luga
o mauga, auā e ui ina feagai ma fa’afitauli, ae tatou te taumafai pea e talai atu
42
le Keriso manumalo. Ua moomia ona tatou tulai i luga e avatu le tala o le ola
ina ia fa’asaoina ai nisi tagata. Ia tatou folafola atu ma le naunauta’i ina ia
maua ai se viiga o le Atua a o tatou ola.
Tatalo: Aumai mo i matou vae malolosi le Atua e mafai ona matou fa’avave e
talai lou Tala Lelei. Amene
EVAGELIA A MATAIO (3)
1 – Malōlō ma Iesu
Aso Sa - Setema 27: “O le valaaulia” (An invitation)
Tusi Faitau - Mataio 11:25-30 Matua - ff.28-30: “Ia outou o mai ia te au, o outou uma o e tigaina ma
mafatia i avega, o au foi e malolo ai outou. Ia outou amoina lau amo, ma ia
outou fa’aaoao ia te au, aua o au le agamalu ma le loto maulalo ona maua
lea e outou o le malologa mo outou agaga.”
“Ia fai ma koma” – o le fa’aupuga masani o loo faamanatu mai ai le lelei o
le malolo – ma e tele ‘auala e mafai ona tatou malolo ai. Poo le faitauina o se
tusi, tafafao ma uo, malolo ma le aiga, ma isi. “Sau ia te a’u.” Ua valaauliaina
i tatou e Iesu ina ia tatou malolo. Peitaʻi o lenei malologa e le pei o malologa
ua tatou masani ai. Ae pei o se valaaulia i se fa’aipoipoga, poo se aso fanau.
O le malologa tumau lenei, e pei o se amo, o le mafutaga ma le Atua, o se
mafutaga e aumaia ai le toomaga mai le tauaveina toatasi o avega o le olaga.
I le faitauga i lenei vaiaso, tatou te iloa ai ma le fa’atuatua, Iesu e afio i
totonu o le loto o le tagata soifua, ae o loo i ai pea le malosi e fa’alogo ai i le
valaau, “Sau ia te a’u.” Tatou te feiloai i le mafutaga ma le Atua, i auala e
mafai ai ona tatou fa’aogaina lena amo paia ona lagolagoina i tatou, a o tatou
tauaveina mea uma o le lalolagi.
Tatalo: Aumai mo i matou le filemu e mafai ai ona matou tali atu IOE i lou
vala’au mai, Amene.
Aso Gafua - Setema 28: “Leai se taimi e pei o le taimi nei” Tusi Faitau - Mataio 12:1-14 (No time like the present)
Matua - f.7b: “Ou te loto i le alofa, ae le o le taulaga”
E le fou i le fa’alogo le fa’aupuga, “E leai se taimi sili e pei o le taimi
nei.” Atonu na tiga le Au Faresaio ina ua fa’amalolo e Iesu le ma’i i le sapati.
Peita’i, o le tulafono i le manatu o Iesu, o le faia muamua lea o le mea lelei ma
le galuega alofa. E taua ia Iesu le faia o le galuega alofa i le taimi nei nai lo le
tulafono, aemaise mo e o loo matua manaomia le fesoasoani.
E le mafai ona tatou tuua le tagata fia ai, poo se tagata o loo fia maua se
soifua maloloina i se taimi mulimuli. Auā poo le a le aoga e toe fa’atino ai se
alofa ina ua tatou vaaia ua le toe aoga le fa’atinoga, ina ua tuanai manaoga sa
faia maua ai le ola? O nei fa’atinoga uma ma galuega alofa, o le fa’atinoga o
43
le alofa mutimutivale, e manaomia ai lo tatou gauai ina ia fa’atino mea lelei
uma, auā e leai se taimi sili ona lelei nai lo le taimi nei.
Tatalo: Le Atua paia e, aumai le lototele matou te tulai atu ai e fa’atino
galuega lelei mo le taimi nei, Amene.
Aso Lua - Setema 29: “Tāua o fa’ailoga” Tusi Faitau - Mataio 12: 38-50 (The importance of signage)
Matua - f.38: “Ona tali mai ai lea o isi o le au tusiupu ma le au farasaio, ua
fa’apea mai. “Le aoao e, ua matou fia iloa se fa’ailoga ia te oe.”
O le masani o le tagata, e mana’omia ni fa’ailoga na te fa’amaonia ai le
sa’o ma le sesē. O le fa’ailoga, na te aveina i tatou i le itu sa’o o se mataupu.
O le ata lena o loo aumai e le faitauga o lenei aso. O tagata na siomia Iesu, ua
latou fesili i se fa’ailoga, pe moni ana a’oa’oga. Peita’i, na tautino Iesu, e leai
ni fa’ailoga, a o a’oa’oga ua latou fa’alogo i ai ma fa’atuatua i ai, o le fa’ailoga
sili lena. E tele luitau na tu’uina atu e Iesu ia i latou na fa’alogo i ana
a’oa’oga. Peita’i, o le moni o ana a’oa’oga, o loo atagia i lana ta’ita’iga ma
ana mea e fai, auā e savali lava Iesu i ana upu e fai. O le faitauga o lenei aso, o
se lu’itau mo i tatou, ina ia avea i tatou ma fa’ailoga o le fa’amoemoe e ala i le
suia o tatou olaga i le fa’amaoni ma le fa’atuatua.
Tatalo: Fesoasoani mai le Alii e, ina ia avea i matou ma fa’ailoga tāua o lou
alofa i le lalolagi, Amene.
Aso Lulu - Setema 30: “O le lūlū o le galuega e fa’avaitau” Tusi Faitau - Mataio 13:1-9, 18-23 (Sowing is a seasonal thing)
Matua - f.23: “A o le mea sa lūlūina i le eleele lelei o ia lea ua fa’alogo i le
upu ma lagona, ua fua mai lava ia, e taiselau i nisi, e taionogafulu i nisi, e
taitolugafulu foi i nisi.”
O tatou olaga e faatusaina i le eleele, e tatau ona saunia ma tapena lelei e
talia le lūlūina o le Upu a le Atua, ma le seleselega e fua mai i o tatou loto.
Peita’i, e i ai taimi e lūlū mai ai le Upu, ae ua tatou le taliaina, talu ai, e le o
lelei le tapenaina o le eleele, o tatou olaga lea, aemaise i vaitau e feagai ai i
tatou ma fita ma faigata. O le avea o tatou olaga ma eleele lelei, e le faigofie.
E manaomia ona galuea’ina le eleele ma tapena lelei, e lūlū ai le Upu a le
Atua. Se manū le lūlū o le galuega e faavaitau ona fai. O vaitau e le lūlū ai, o
vaitau ia e tatau ona tapena lelei ai le eleele. O le lelei foi o le eleele, o le a
mafai ona fua mai ai le tāua o le ola ua fa’alagolago ma fa’amoemoe i le Atua.
Tatalo: Le Atua e, ia avea a’u ma tagata e totōina le alofa ma le fa’amaoni ina
ia fua mai ai lou finagalo, Amene.
Aso Tofi - Oketopa 1: “E tatau ona fai se mea” (Something has to be done)
Tusi Faitau - Mataio 13:24-30
44
Matua - ff.28b-30a: “Ona fai mai ai lea o auauna ia te ia, e te finagalo ea
matou te o atu e vele’eseina ia mea? Aua; ina ne’i outou lia’i ma le saito pe a
outou vele ese le titania. Tu’u ia, ia tupu lua pea se’ia o’o i le seleselega...”
E i ai vao o le laufanua e lē aogā. E i ai fo’i vao aogā e mafai ona avea ma
vao lē aogā i nofoaga e le masani ona ola ai, e avea ma fa’afitauli i laufanua
fou. O le popolega, e mafai e nei vao ese ona fa’atama’ia la’au masani o le
fanua. Ma o le mea e tatau ona fai, e tatau ona puipui a tatou laufanua, e ala i
le lia’iina o le vao leaga ina ia ola lelei la’au o le fanua.
Ua tatou molimau i le tele o fa’afitauli i totonu o fa’alapotopotoga, e pei o
aiga, faigamalo, ma Ekalesia; ona i fa’ai’uga le amiotonu. Ma, e tatau ai ona
tatou tutū fa’atasi ma filifili e taofi i mea aogā, ae lia’i ese tu ma aga le pulea
ina ia tatou maua pea le ola filemu e pei ona masani ai. Le taimi lea o le
seleselega o lea e manatu ai le Atua mo i tatou, ina ia tatou maua le alofa ma
le filemu o le Atua mo le lalolagi.
Tatalo: Fesoasoani lau afio ina ia matou iloa ona fa’asa’oloto i matou mai nei
amioga le lelei. Ina ia matou iloa ma manino i lau foafoaga mamana, Amene.
Aso Faraile - Oketopa 2: “Va’aia le Atua i mea masani”
Tusi Faitau - Mataio 13:44-58 (Seeing God in the familiar)
Matua - f.57b: “E leai se perofeta e le mamalu, ua na o lona lava nu’u ma
lona aiga e le mamalu ai.”
Ua fa’amanatu mai e le faitauga le faigata ona tatou iloa o mea tatou te
sailia ia i latou o e latalata ia i tatou. E pei ona aumai i le fetalaiga a Iesu e
uiga i perofeta, i le amana’ia o i latou i so’o se mea e galulue ai; se’i vagana ai
i totonu o latou lava lotoifale. E pei fo’i ona fa’amaonia i le va’aiga o tinā i
totonu o le lotu. Ua le mafai ona sopo atu le va’ai mai va’aiga masani i totonu
o tatou si’osi’omaga, ma ua pogisa ai i tatou i le Atua o lo’o galue ma i tatou.
O nei fa’ataoto ua fai ma fa’amanatu ia i tatou, ne’i o tatou le amanaiaina
le tulaga o le Atua. Tatou te tatalo mo se filemu i le lalolagi. Ae paga lo tatou
naunau, e avea ma mea e galo ai i latou o e fa’atupuina le filemu: Ua tatou
masani ma le to’atele. Ua avea i tatou ma penina o le talalelei ia i latou, upega
e tumu i le lelei o le Atua, ina ia fa’aalia ai Lona Malo i se mea tatou te i ai.
Tatalo: Le Atua o le foafoaga, fa’ailoa mai ia te i matou le mea o galue ai lou
Agaga. Fa’ailoa mai ou ala matou te fa’atinoina ai a matou galuega. Amene.
Aso Toona’i – Oke. 3: “Malologa a le Atua – O le mea moni e ola ai”
Tusi Faitau - Mataio 14:1-12 (God’s rest - a lived reality)
Matua - ff.9-10: “Ona tigā ai lea o le tupu; a ona o le augani, ma e ua
tao’oto e a’ai fa’atasi ma ia, ua ia poloa’i atu e avatua. Ona auina atu ai lea
e ia se tasi, ua vavave mai le ulu o Ioane i le fale puipui.”
O faitauga o lenei vaiaso, ua tatou molimau ai i lu’itau ese’ese sa feagai
ma Iesu, aemaise le te’ena e tagata o ana a’oa’oga ma fa’amalologa. Peita’i, o
45
le malosi lilo o le Agaga, na te aumaia le malosi e tumau ai, poo a faigata e
feagai ma i tatou. Atonu o le Agaga fo’i lea sa fa’alototele ia Iesu ma le ‘ausoo
ina ua maua tala fa’anoanoa e uiga i le maliu o Ioane. Ioe, a o’o ina feagai i
tatou ma fa’afitauli o le olaga, tatou te lagona le fa’anoanoa ma le loto ita.
Peita’i, o le malosi o le Agaga o le Atua e maua ai le fa’atuatua e tatalo ai, ina
ia fa’aalia ai le fa’amoemoe ola o i le Atua tatou te fa’atino ai le alofa i o tatou
tuaoi ma tagata uma, e tusa lava po o le a lona tau.
Tatalo: Fa’atele e lau afio le ola talitonu ia te a’u, ina ia ou iloa ona alofa atu i
so’o se tasi e pei fo’i ona faia e lau afio, Amene.
EVAGELIA A MATAIO (3)
2 – O Oe o le Mesia
Aso Sa - Oketopa 4: “O outou e fai!” (You do it!)
Tusi Faitau - Mataio 14:13-21
Matua: ff.15-16: “Ua o’o i le afiafi, ona o mai ai lea o ona so’o ia te ia, ua
fa’apea mai, ‘O le mea tu’ufua lenei, ua leva fo’i le aso; ia e tu’uina atu le
motu o tagata, ina ia latou o i a’ai e fa’atau ni mea e ‘ai ma latou.’ A ua
fetalai atu Iesu ia te i latou, ‘E le aoga ona latou o; ia outou avane ni mea e
‘ai ma latou.”
O faitauga o lenei vaiaso mai le Evagelia a Mataio, o le a molimau i
vavega ofoofogia a le Mesia. O lo’o feagai Iesu ma fa’anoanoaga ona o le
maliu o Ioane, ma ua manatu ai, e alu i se mea tu’ufua e mapu ai. Peita’i, ua le
mafai ona vaoia le motu o tagata o loo galala e fia fa’alogologo pea i le Mesia.
E ui ina vaivai ma fa’anoanoa, ae na aapa Iesu i le mea e tasi na te maua ai le
malosi e ofo atu ai i taimi faapenei – o le alofa. O le alofa o le naunau loloto e
fa’alatalata, tali mana’o, saunia, ma fafaga i fanau o le Atua. O le alofa o
gaioiga ia o le loto e una’ia ai le tagata e fa’atino galuega lelei.
Masalo sa manatu le ‘ausoo o le a fa’aali e Iesu lona mana fa’a-Mesia e
fafaga ai le motu o tagata. A ua fa’ate’ia le ‘ausoo ina ua fetalai Iesu, ‘O
outou te fai!’ Ma sa faapea ona latou faia. Ua tatalo faafetai Iesu i areto e
lima ma i’a e lua, ma tuu atu i le ‘ausoo e fa’asoasoa i le motu o tagata. O ai
na faia le vavega? Ioe, o Iesu o le Mesia ua afio mai e lavea’i ma fafaga ona
tagata, e ala i lona fa’aaogaina o tagata masani e pei o oe ma a’u.
Tatalo: Ia ou lagona le mafatia o isi, ma ou faia lou finagalo alofa, Amene.
Labor Day (Ausetalia)
Aso Gafua - Oketopa 5: “Ua vala’au mai le Mesia…Ina sau ia!” Tusi Faitau - Mataio 14: 22-36 (The Messiah calls…come!)
Matua - ff.28-29: “Le Ali’i e, afai o oe, ia e fetalai mai ia te a’u, ou te alu atu
ia te oe i luga o le vai.’ Ona fetalai atu lea o ia, ‘Ina sau ia’. Ona alu ai lea o
Peteru na i le va’a, ua savali i luga o le vai e alu ia Iesu.”
46
O le Mesia fa’amalosi ‘au! O ananafi, na fetalai Iesu i lona ‘ausoo, ‘O
outou e fai!’ ma sa fa’apea ona latou faia. O nei, a o savali o ia i luga o le vai,
fetalai Iesu ia Peteru, ‘Ina sau ia!’ ma sa fa’apea ona faia e Peteru. Ua valaau
mai le Mesia! O le valaau a Iesu, ‘Ina sau ia!’ ua faamalosi ‘au ai Peteru e oso
i fafo o le vaa, ma ua talia e Iesu le mana’o o Peteru e sau ia te ia.
O le fefe ma le faatuatua, e i ai mea e tutusa ai: o lagona e afua mai ona o
mea e lei tutupu. O le fefe la, o le faatuatua ua na fa’amamafaina le i’uga e
sesē lona taunuuga. E i ai taimi e avea ai le fefe ma mea ua sesē ai fa’aiuga
fai, ma galo ai, o le Mesia o le faaola. Na a’apa le Mesia e lavea’i Peteru i le
taimi na mana’omia ai le fesoasoani. O le faailo foi lea a Mataio i ona tagata
Iutaia, o le Atua o Isaraelu ua afio tumau mai. E le’i galo i le Atua lona nu’u
ma i tatou uma, ma e fa’amaoni le Atua i le faataunuuina o ana folafolaga.
Tatalo: Le Mesia e, fa’ailoa mai le ‘auai mai o lou Agaga. Ou te le fefe, auã e
i ai fa’atasi lau afio ma a’u, liua lo’u fefe e avea ma fa’atuatua, Amene.
Aso Lua - Oketopa 6: “O Peteru, o oe ma a’u”
Tusi Faitau - Mataio 15:1-20 (Peter, you and me).
Matua - ff. 10-11: “Ona vala’au atu lea o ia i le motu o tagata... “Fa’alogo
mai ia, ma ia outou lagona. E le o le mea ua tu’u i le gutu e leaga ai le tagata,
a’o le mea e sau mai le gutu, o lea ua leaga ai le tagata.”
I le vaaiga mai i le itu i fafo, e faigofie le fa’afoliga. Ua faigofie foi ona
tatou talitonu, o galuega lelei tatou te faia e vava lalata ma atoatoa ai lo tatou
leleiga ma le Atua. Peita’i, e le mafai e ni galuega lelei, o tu ma aga, poo le
tausia foi o ni tulafono, ona fa’asaolotoina i tatou. Ua na’o galuega a le Mesia
e mafai ona tatou sa’oloto moni ai. O lea na fetalai ai Iesu i le ‘au Faresaio, o
le mea e alu i totonu o le gutu o le tagata, e le tele sona a’afiaga nai lo le mea e
sau ai i fafo, auā o foliga ia o le loto.
Tatalo: Iesu ua e faia mea uma. O oe o le Mesia. Ia atagia le alofa o lau afio i
lo’u loto i mea uma ou te faia ma tautala ai, Amene.
Aso Lulu - Oketopa 7: “Fa’atuatua ma fetuuna’i”
Tusi Faitau - Mataio 15:21-28 (Faith and reason)
Matua - f.28: “Ona tali atu ai lea o Iesu, ua fa’apea atu ia te ia, ‘Funa e, ua
tele lou fa’atuatua; e pei o lou mana’o, ia fa’apea lava ona faia ia te oe’. Ona
malolo ai lea o lana tama teine i lea lava itu aso.”
E faitau eseese le to’atele i le uiga moni o lenei tala. Ae lua ni mea tāua o
loo aumaia e tatau ona faamamafaina. Muamua, o le fa’atuatua gofie o le
fafine i le mana fa’aola o le Mesia na u’una’ia ai o ia e alu ma le loto atoa. E
le tele se iloa o le fafine ia Iesu, a o lona fa’atuatua tele ia Iesu ma lona mana,
o le mea sili lea.
Lua, e pei o lenei fafine, e mafai ona e fetuuna’i ma le Atua. E pei o
Aperaamo i lona fetuuna’i ma le Atua mo Sotoma (Ken18). O Iakopo, Mose,
47
Iona, Tavita, Iopu, Tanielu, ma isi...sa latou fetu’utu’una’i ma le Atua. O le
fetu’utu’una’i ma le Atua, o se vaega lea o le tatou malaga fa’ale-faatuatua ma
Ia. E fiafia le Atua pe a tatou omai ia te ia, e tauivi ma fetuuna’i. E leai se
mea e le mafaia e le Atua, na te onosa’ia foi ma lavātia lo tatou vaivai.
Tatalo: Mesia e, a’oa’o mai ina ia ou iloa ona ola mo lau afio, tusa lava po o
le a le tele o fa’aoso’osoga, Amene.
Aso Tofi - Oketopa 8: “O le fesili o le fa’asinomaga”
Tusi Faitau - Mataio 16:13-20 (A question of identity)
Matua - ff.15-16: “A o outou, pe se a la outou upu ia te a’u, po o ai? Ona tali
mai ai lea o Simona Peteru, ua fa’apea mai, O oe o le Keriso, o le Alo o le
Atua soifua.”
I le totonugalemu o le tusi o Mataio, na fesili ai Iesu ia Peteru i se fesili
tāua e uiga i lona fa’asinomaga. O le a se tali a Peteru? Ae pe sa’o foi lana
tali? O fesili e uiga i le fa’asinomaga a Iesu e le fou i le tusi o Mataio, e pei o
le tali sa maua i lana papatisoga (O lo’u Atali’i pele lenā); o le fesili a Kaiafa
(Ta’u mai ia te i matou, po o oe le Mesia?); le ta’utinoga a le ‘ausoo i totonu o
le va’a (E moni, o Oe o le Alo ole Atua); ma le molimau a le fitafita Roma i le
satauro (E moni, o le Alo lava lenei o le Atua).
O le tali a Peteru, o Iesu o le Mesia/Keriso, e le gata o loo faailo mai ai le
taunuu mai o Iesu, a o le o’o mai foi o le malo o le Atua! I lea malo, e aveesea
mea leaga, fa’amalōlō i ē mama’i, amanaia e fa’atauva’a, fafaga i ē o fia a’ai
ma fa’atutū e ua oti! O le fa’amoemoe ua taunuu! O le Tala Lelei lava lea.
Tatalo: Le Atua, o a’u o le tagata agasala ua lavea’iina e lou alofa. O Oe o le
Mesia, le Alo o le Atua. Tatalo ina ia fausia lou malo, Amene.
Aso Faraile - Oketopa 9: “O le afio ifo” (The descent)
Tusi Faitau - Mataio 17:1-13
Matua - ff.7-8: “Ona maliu atu ai lea o Iesu ua pa’i atu ia te i latou, ua
fa’apea atu, ‘Inā tutū ia outou, ‘aua fo’i tou te matata’u.’ Ona tetepa a’e ai
lea o latou mata, ua latou le iloa atu se tasi, ua na o Iesu lava.”
Taumafai Peteru e taofi ma fa’amaufaailoga le afio a’e ma le liua o Iesu i
luga o le mauaga, e ala i le fa’atuina o ni fale ‘ie se tolu mo Mose, Elia ma
Iesu. Peita’i, o fuafuaga mamana a le Mesia, e le o le afio a’e, a o le afio ifo, e
mau fa’atasi ma ona tagata. O le iai o le Atua i luga o le mauaga e pei ona
ta’ua i le Tusi Paia, o le faailo lea o le afio ifo o lona alofa tunoa, e tafe ifo i
mea malifa o le mauga, ma tafe atu i le foafoaga atoa. Afai tatou te fetaia’i ma
le Atua i le mauga, e tasi lava le ala e mafai ona tatou uia: o le alu ifo i lalo ma
alu atu i le lalolagi, ma atagia ai lona mamalu i lo tatou alu atu.
Tatalo: Le Mesia e, fesoasoani ina ia tumau la matou va’ai i le tunoa o lou
alofa, ma tatou savavali fa’atasi ma lau afio, Amene.
48
Aso Toona’i - Oketopa 10: “Le sa’olotoga o le malo”
Tusi Faitau - Mataio 17:22-27 (The freedom of the kingdom)
Matua - ff. 25b-26: “Simona e, pe ni a fa oe? E ao tiute po o lafoga mai ia te
ai e tupu o le lalolagi? O a latou fanau ea, po o tagata ese?” Ona fai mai ai
lea o Peteru ia te ia, “O tagata ese.” Ona fetalai atu lea o Iesu ia te ia, “O
lea fo’i ua sa’oloto ai le fanau.”
E ese le fa’auigaina e tagata o le upu ‘sa’olotoga’. E i ai le manatu, o le
sa’olotoga e faia ai so’o se mea, i le taimi e te finagalo ai; ma e pule fo’i oe
poo ai e faia i ai. Peita’i, e faigata lea ituaiga sa’olotoga, auā e tupu ai le
saisaitia ma le fa’aitu’au. E tapulaa ai foi le va’ai i le sa’olotoga a isi. E ese
lea mai le sa’olotoga fa’ale-Atua; o le sa’olotoga e ola ai i le malo o le Atua.
Fetalai le Mesia ia Peteru, e leai ni lafoga mo i latou ē nonofo i le malo o
le Atua, ae aisea e totogi ai lafoga a i latou e tapua’i ai i totonu o le malumalu?
E ui i lea, o lo’o taumafai Iesu i se auala e molimau ai Peteru e uiga i le Mesia
i le va’aiga masani i le aganu’u: Ua fai e Iesu aiaiga e totogi ai lafoga atoa ai
ma Peteru, e fa’aali atu ai o i la’ua o atali’i o le malo. E tatau ona tatou
molimau i le sa’olotoga mai ia Keriso i totonu o tatou aganu’u, ma fa’ata’ita’i i lea sa’olotoga e ala i le alofa ma tautua i isi.
Tatalo: Fa’afetai i le Mesia mo le sa’olotoga moni e ola ai i lou malo. A’oa’o
mai ina ia ou iloa ona onosa’i a o matou saili e fa’ailoa Oe, Amene.
EVAGELIA A MATAIO (3)
3 – O le Poloaiga Sili
Aso Sa Lotu a Tamaiti
Aso Sa - Oketopa 11: “Vala’aulia i le tausamaaga”
Tusi Faitau - Mataio 22:1-14 “Wedding invitation”
Matua - f.9: “O lenei, ia outou o atu i ala tele, o i latou uma tou te iloa ai,
tou te tala’i i ai le tausama’aga.”
E le faigofie le tusi faitau ua amata ai lenei vaiaso, ona ua fa’aaogaina e
nisi e fa’amatala ai ni tulaga e le lelei, aemaise tagata valaaulia ua manatu ua
ia te i latou le pule e filifili ai poo ai e talia, a o ai e te’ena. Ae galo ai, o lē
talimalo e filifilila poo ai e talia ma valaaulia.
E tulaga ese foi le vaaiga i se tagata na te te’ena se valaaulia faapitoa, po o
ni tagata latou te fasiotia le avefeau o le tupu, e pei ona ta’ua i le tala. E ese
foi le vaai i se tupu e muamua valaaulia tagata, ae mulimuli ane auina lana vae
ga ‘au e fasiotia i latou sa te’ena le valaaulia. Ae le gata i lea, ina ua amata le
tausamaaga, na iloe e le tupu se tasi na talia le valaau e le o laei i ofu o le
tausamaaga, ona lafoaiina le i fafo o le pogisa. E atagia ia Iesu le tagata lea sa
lafoaiina i fafo, i lona le gagana i luma o e sa tuuaina o ia.
Tatalo: Iesu le uo, fesoasoani i la’u sailiga ina ia ou maua Oe, po o le a lava le
taunu’uga o le fa’amoemoe, Amene.
49
Columbus Day (Amerika)
Aso Gafua - Oketopa 12: “Alofa i le Ali’i lou Atua” Tusi Faitau - Mataio 22:15-22, 34-40 (Love the Lord your God)
Matua - f.37:”E te alofa atu i le Ali’i lou Atua ma lou loto atoa, ma lou
agaga atoa, ma lou manatu atoa.”
Atonu o maitau e nisi le ese’esega o lenei poloaiga i le tusi o Teuteronome
mai le tusi a Mataio. Mo Mataio, o le upu peretania o loo faaliliu mai i le
gagana Eleni, a o le gagana Eleni o loo faaliliu mai i le gagana Eperu, ona
maua lea o le faaliliuga, ‘lou manatu atoa’. A o Teuteronome, o le upu
peretania e faaliliu mai i le gagana Eperu, ona maua lea o le faaliliuga, ‘lou
malosi atoa’. O le eseesega lava o gagana ma talitonuga i lea itutino o le
tagata soifua. Ae o loo manino lava le feau o lenei polaiga: e mafai e tagata
uma ona alolofa i le Atua. O tatou loto ma agaga, o tatou mafaufau ma o tatou
malosi – ia tatou alolofa i le Atua ma o tatou tagata atoatoa. O le alofa na te
pulea ai o tatou lagona, o tatou mafaufau, o le ola tatalo, ma o tatou faatinoga.
Tatalo: Iesu le Uo ma le Uso, fesoasoani ina ia tatala atu atoa lo’u tagata e ola
ma alofa moni mo Oe, Amene.
Aso Lua - Oketopa 13: “Lapatai’ga e fa’asaga i le fa’afoliga” Tusi Faitau - Mataio 23:1-12 (Warning against hypocrisy)
Matua - f.5a: “Ua latou fai a latou galuega uma, ina ia iloa ai e tagata.”
O lo’o fa’aautuina lenei faitauga i le loto maulalo. A o le loto maulalo, o
se fa’atinoga e ao ina faaeteete ai. I le fetalaiga a Iesu i le ‘au tusiupu ma le au
faresaio ‘i le faia o a latou galuega ina ia iloa ai e tagata,’ o lo’o fa’atatau i le
tagata fa’afoliga. A o le fesili tatou te mafaufau loloto ai, ‘pe tatou te faia ea ni
galuega ona o se mea e ao ona tatou faia, po ua faia ina ia ta’ulelei ai i tatou?
E le faigofie, auā tatou te naunau ina ia ta’uleleia ma alofagia i tatou e tagata.
E le o taimi uma fo’i tatou te maua ai ni vi’iga ona o le faia o le mea sa’o.
E i ai taimi tatou te faia ai se mea e suia ai lagona o tagata ia te i tatou.
Ona o lea, e tāua ai le fesiligia muamua o le Atua poo le a sona finagalo i mea
o le a tatou faia, pe fiafia i ai le Atua pe leai. E tusa lava pe le fiafia mai ai
tagata, a o le mea sili, o loo finagalo ai le Atua.
Tatalo: Iesu e, fesoasoani mai ina ia ou iloa ou ala, ina ia ou iloa ona ola i
lenei lalolagi fa’atasi ma lau afio, Amene.
Aso Lulu - Oketopa 14: “Tumau fa’amaoni” (Faithful endurance)
Tusi Faitau - Mataio 24:1-14 Matua - ff.12a-13: “E maalili fo’i loto o tagata e to’atele...a’o lē tumau se’ia
o’o i le gata’aga, e fa’aolaina lea.”
E faigata ona tatou ola i le lalolagi i nei ona aso ona o le tele o faafitauli o
loo lamatia ai nei le soifua o tagata. O le mea lea e logo malie ai upu o le
matua, ‘tumau e o’o i le gata’aga.’ O le ola tumau e le o se mea e faatauvā ai
50
nisi. A o le ola e le faagaeetia e tusa lava poo a fa’afitali e faamata’u mai. O
le ola e talitonu pea o loo galue le Atua. O le ola e la’a pea i luma e tusa poo a
afā ma matagi malolosi e agi mai. O le ola foi e susulu atu pea e tusa lava poo
a pogisa e fotua’i mai. O tagata e ola tutumau, e laveaiina e le Atua. Ae le
gata i lea, o tagata e ola tutumau latou te laveaiina i tatou, auā o i latou o
sāvali o le fa’amoemoe ola e le tuulafoaiina i tatou e le Atua.
Tatalo: Iesu e, fesoasoani mai lau afio ina ia tumau lou alofa mo i matou, a o
matou feagai ai ma le lalolagi pogisa ma le faigata, Amene.
Aso Tofi - Oketopa 15: “Ia mata’ala” (Keep awake)
Tusi Faitau - Mataio 24: 33-44 Matua - f.42: “O lea, ia outou mata’ala ai; auā tou te le iloa po o le fea itu
aso e sau ai lo outou Ali’i.”
I le manatu o Mataio i le fetalaiga lea a Iesu, o lo’o faatatau i le
fa’alavelave o le a tupu i totonu o Ierusalema: o le taua i le va o Iuta ma
Roma. O lo’o taumate e tagata le ola e pei ona masani ai ina ua tutupu nei
feese’eseaiga. Ua avea lenei faitauga ma mea ua le mautonu ai manatu ona o
le oti. I totonu o nei lagona le mautonu, e le ave’esea ai o tatou manatu i
lapata’iga e mafai ona o’o mai ia i tatou. Auã o taimi faigata ia o le olaga, e
asiasi mai ai le Alo o le Atua. Ia mautinoa, auã afai e ave pe tu’u fo’i i tatou, e
i ai fa’atasi lava Iesu ma i tatou.
Tatalo: Iesu e, mai i totonu o le lalolagi le saogalemu, fa’asino ala lau afio ina
ia matou talitonu, o lo matou ola saogalemu o lo’o i ou a’ao, Amene.
Aso Faraile - Oketopa 16: “Fa’atalitali ma le fa’amoemoe lelei”
Tusi faitau - Mataio 25:1-13 (Waiting with expectant attentiveness)
Matua - f.13: “O lea, ia outou mata’ala ai, auã tou te le iloa le aso po o le itu
aso e sau ai le Atali’i o le tagata.”
O lo’o aumai e Iesu lona tulaga ma lona fa’asinomaga fa’aMesia, o Ia o
le ‘Fa’ato’āfaiavā’, ina ia tapena ai ona tagata, po o mata’ala i latou auã le afio
mai o le Mesia, po o momoe pea. Fai mai sa to’atele i latou sa o latou lagona
ma ua tula’i ma mulimuli. A o isi, sa maua atu o momoe. Ua latou le iloa ai po
o ai lē ua asiasi atu ia te i latou. Ua tatou sauni? Ia mata’ala, auā tatou te le
iloa le aso ma le itula. E le o talanoa Iesu i le fa’amasinoga mulimuli. A o lo
tatou ola fa’amoemoe ma mata’ala i le taimi nei. Ua tatou iloa e afio mai o Ia
i ona lava taimi ma ona lava ala. Ioe, o le mea mautinoa, e afio mai Iesu i lona
lava finagalo sa’oloto, ae le o taimi e manatu ai i tatou.
Tatalo: Iesu le Uo lelei e, a’oa’o mai ina ia matou mata’ala ma fa’alogo i ou
ala e te saili mai ai i lau fanau, Amene.
Aso Toona’i - Oketopa 17: “Mamoe ma ‘oti” (Sheep and goats)
51
Tusi Faitau - Mataio 25:31-46
Matua - f.37b: “Le Ali’i e, o anafea na matou iloa ai oe ua fia ‘ai, ma matou
fagaina oe? Po o fia inu, ma avane e te inu ai?”
E i ai Iesu i mea uma i totonu o lenei tusi faitau. O Ia o loo feagai ma le
fa’amatalaina o le tala. O Ia foi o loo nofo i le nofoali’i. O Ia foi o loo fia ‘ai,
fia inu, ma avea ma tagata ese. E pei o le fa’ailo lea o loo aumai e Iesu, o Ia e
le mafai ona ta’ai fa’afala i se mea e tasi. O se fa’amafanafanaga sili lea mo le
‘aukerisiano sauāina i le taimi o Mataio, ua latou mautinoa ai, o loo i ai
fa’atasi Iesu ma i latou. Malamalama lelei le Ali’i i mafatiaga o lo’o feagai ma
i latou. A o le fa’amalosi e pei ona aumai e Mataio, o loo latou fia a’ai ma fia
feinu fa’atasi ma le Ali’i. E alofagia foi i latou e ia.
Tatalo: Iesu e, fesoasoani ina ia ou maua lou filemu ma lou agalelei e fa’asoa
atu i e o le a matou mafuta i lenei aso, Amene.
UA FA’AILOA MAI E LE LAGI
1 – O le Amataga
Aso Sa - Oketopa 18: “Tapua’iga i le paneta o Mars” (Worship on Mars)
Tusi Faitau - Kenese 1:14-19 Matua - f.14: “Ua fetalai mai fo’i le Atua, ia i ai i le va nimonimo o le lagi o
mea e malamalama a’i, e iloga ai le ao ma le po; ia fai fo’i ma fa’ailoga, ma
tau, ma aso, ma tausaga.”
Ua fa’ailogaina i lenei vaiaso le misiona sa faia e le NASA i le paneta o
‘Mars’, ma, o le a tatou taga’i ai i le va’aiga a le Tusi Paia lava ia e uiga i fetu,
le lalolagi, le atulaualu, ma mea uma o i ai. O le fa’atinoga o tapuaiga i lenei
lalolagi, e fua i vaitau o le tausaga. E pei o le Eseta, e fa’atino i le Aso Sa e
fa’ailoga ai le vaitau o le Tautotogo (spring) i le itu matu o le itulagi, e fetaui
tonu lea ma le feau o le toetu. A o le itulagi i saute, e fetaui le feau o le toetu
ma timuga ma le seleselega i le vaitau o le Tautoulu (autumn).
Fa’amata o le a se foliga va’aia o tapuaiga pe a faia i le paneta o Mars, e
leai ni vaitau pei o tatou? Seiloga o vaitau, pe i ai se isi mea e sili atu e tatau
ona fa’avae ai le fa’atinoga o tapuaiga i le Atua?
Tatalo: Punavai o le ola, ua e fa’avaeina le tausaga ma ona vaitau, fesoasoani
lau afio ina ia matou tapua’i atu ma le loto atoa, Amene.
Aso Gafua - Oketopa 19: “O le misiterio o puapuaga” Tusi Faitau - Iopu 38:31-38 (The mystery of suffering)
Matua - ff.31: “E te mafai ea ona nonoa i noataga o Kima? Pe te mafaia fo’i ona tatala i fusi o Kisila?”
O le tusi o Iopu, o se tasi nei o tusi o loo su’esu’e loloto i le fa’afitauli o
faigata ma puapuaga fa’aletagata. I le mataupu muamua lava o le tusi, o loo
fa’ailoa mai ai le ata o Iopu o le tagata amiotonu, ae ua ave e le Atua le
52
fa’atagaga ia Satani na te fa’aoo ai puapuaga. O lona uiga, e amata lava le tala
ia Iopu i le fesiligia o le talitonuga masani: o le amiotonu e i’u i le manuia, a
o le agasala e i’u i puapuaga; auā o Iopu o le tagata amiotonu, a o lea ua feagai
ma puapuaga e tatau i le tagata agasala.
E to’atolu uo a Iopu ma le tagata e igoa ia Eliu, ua latou fa’amafanafana
ma taumafai e fa’amatala ia Iopu le mafuaaga a ona puapuaga. A o le mataupu
e 38, o le taimi muamua lea ua fetalai ai le Atua i le talatalanoaga lea a Iopu
ma ana uo. Ua fa’atusa ai le fa’atauvaa o le iloa o Iopu, ma le Silisili Ese o le
silafia ma le malamalama o le Atua, aemaise i mea e tau i le va nimonimo.
E ui i le ofo’ofogia o le tulaga ua i ai nei le poto fa’atenokolosi, ae gata
lava lo tatou iloa o fetu ma le ola puapuaga. A tatou fetaia’i ma i latou o loo
puapuagatia, o lo tatou ola fesoasoani ma lagolago atu, e sili lea ona tāua.
Tatalo: Le Atua fa’amaoni, ia matou talitonu i lou alofa ma le poto mai lau
afio, pe a o’o ina tofotofoina i matou ma tauau ai ina fano i matou. Amene.
Aso Lua - Oketopa 20: “E telē atu le atulaulau nai lo lou silafia”
Tusi Faitau - Salamo 8: (The universe is bigger than you think)
Matua - ff.3-4: “A ou va’ai atu i lou lagi, o le galuega a ou tamatama’i lima,
o le masina atoa ma fetu na e faia; se a ea le tagata e te manatu mai ai ia te
ia; ma le atali’i o le tagata e te asiasi mai ai ia te ia?”
E faigata ona tatou iloa le telē o le atulaulau. E 9,000 maila le mamao o
Aukilani ma Arapi, a o le vaalele e 500 maila i le itula lona saoasaoa, e 18
itula e malaga ai. E faatele i le miliona le saoasaoa o le malamalama nai lo le
vaalele; o lona uiga, e le atoa se kuata sekone e malaga ai le malamalama mai
Aukilani i Arapi. E 8 minute e malaga mai ai le malamalama mai le La ona
pa’ia lea o le lalolagi. Afai o se vaalele, e 20 tausaga. Ae 100,000 tausaga e
malaga ai le malamalama mai le isi itu o le atulaulau, e tau atu i le isi itu.
O le alofa naunau o le Atua e aofia atoa ai le atulaulau, ae fa’apena fo’i i mea na ia foafoaina i le lalolagi. Ina ua tusia le Salamo lenei, pau le mea sa
iloa e tagata e uiga i le atulaulau, nao le mamao ma le latalata o fetu e fua i le
malosi o le pupula; ae sa lagona ai e le faisalamo le maofa. Mo i tatou la, e le
fa’aitiitia la tatou lagona o le maofa, auā ua sili atu lo tatou iloa o le atulaualu i
nei ona aso nai lo aso anamua.
Tatalo: Le Atua e, ua fa’ailoa mai e le lagi le mamalu o lau afio. Ia matou
mafaufau loloto i mea lilo o lau foafoaga, Amene.
Aso Lulu - Oketopa 21: “O le tapula’a o le gagana” Tusi Faitau - Salamo 19:1-6 (The limitation of language)
Matua - f.1: “Ua tala mai e le lagi le mamalu o le Atua; ua fa’aalia foi e le
va nimonimo le galuega a ona aao.”
O le vaega muamua lea o le Salamo 19 (ff.1-6) o loo fa’amatala ai le
fa’aali mai o le Atua i le tagata e ala i le natura masani o le lalolagi. A o le
53
ff.7-10, o loo fa’amatala ai le fa’aali mai o le Atua e ala i lana tulafono. O le
“natura” ma le “Tulafono,” e i ai lo la’ua fesootaiga. Peita’i, e le mafai ona
atoatoa lo la fa’amatalaina, talu ai le tapulaa o le gagana fa’aletagata.
E leai se gagana e mafai ona fa’amatala auili’ili ai le moni o le natura. E
pei fo’i ona tatou taumafai e fa’amatala le Atua e ala i ata fa’afa’atusa – “O le
Papa tatou te sulufa’i ma mapu ai.” Peita’i, e le mafai ona atoa lo tatou
fa’amatalaina o le natura moni o le Atua i a tatou upu ma tala. Poo le a le
tamaoaiga o le gagana ma a tatou mafaufauga, e le mafai ona atoatoa le
mamalu ma le silisili ese o le Atua i sa tatou gagana.
Tatalo: Aumai le loto naunau matou te saili ai mea lilo tau lau afio, Amene.
Aso Tofi - Oketopa 22: “Eseta ma le pa na fofoa ai le atulaulau”
Tusi Faitau - Salamo 33:6-9 (Easter and the Big Bang)
Matua - ff.6-8: “O le afioga a le ALII na faia ai le lagi; ma ‘au uma o i ai, na
faia i le mānava a lona fofoga. Ia matata’u i le ALII le lalolagi atoa uma; ia
fefefe lava ia te ia o outou uma o e nonofo i le atu laulau.”
O loo ta’ua e le faisalamo le tala o le foafoaga i le tusi o Kenese ma le
fetalaiga a le Atua na foafoaina ai mea uma. O le ulua’i fetalaiga a le Atua,
“Ia malamalama,” ona malamalama ai lea. O le foafoaina muamua o le
malamalama, e o fa’atasi ma le poto fa’asaienisi i le amataga o le atulaulau.
I le manatu fa’asaienisi, o le pa na fofoa ai le atulaulau i le amataga, sa
aofia ai le malamalama vevela malosi. Ina ua mālū le vevela, ona amata lea
ona tupu ma fanau mai le ola – i la’au, o manu, e oo foi i le tagata soifua. E
mafai ona fa’atusa lea vaaiga fa’asaienisi i le Eseta. O le toetu o le Alii, o le
foafoaga fou ua avanoa ai mai le ola.
Tatalo: Le Atua o le malamalama susulu; faʻaola i matou i le mana o lou alofa, ina ia matou folafola lou Tala Lelei, Amene.
Aso Faraile - Oketopa 23: “E leai se isi Paneta tatou te sulufai ai” Tusi Faitau - Salalmo 115:14-18 (There is no other Planet to find refuge)
Matua - f.16: “O le lagi, o le lagi lava, e i le Ali’i lea; a ua tu’uina mai e ia le
lalolagi mo le fanau a tagata.”
A fa’aleagaina le lalolagi lea o loo tatou ola ma soifua ai, e leai se isi
Paneta o i ai e mafai ona tatou sulufa’i ai. E tele ata tifaga ma ata fa’asolo i le
televise e fa’atatau i le ola e maua i isi Paneta e ese mai ia i tatou. Ae peita’i, ua fa’amaonia e le saienisi, e le maua le ola i isi Paneta o le atulaulau. Ae, ua
amata le foafoaga fou a le Atua i le lalolagi, e ala i le toetu o le Ali’i o Iesu
Keriso. Ma o lo tatou ‘auai fa’atasi i lea foafoaga fou, e tatau ai ona tatou
naunau e puipui ma tausi lelei le Paneta lea ua foa’i mai e le Atua mo i tatou.
Tatalo: Le Atua e, ua e tu’uina mai le lalolagi ia matou tausi ai. Ia avea i
matou ma tausi mea lelei mo lau foafoaga fou, Amene.
54
Aso Toona’i - Oketopa 24: “O le Faifeau ma le Saienitisi”
Tusi Faitau - 1 Nofoaiga A Tupu 16:23-34 (A Priest and an astrophysicist)
Matua - ff.29b-30: “Ia outou ifo atu i le ALII i le malumalu e matagofie. Ia
outou gatete i ona luma le lalolagi uma; e fa’atumauina lava le lalolagi, ne’i fa’agae’etia.”
E eseese le va’ai o le faifeau ma le saienitisi i le tusi faitau o lenei aso. O
le va’ai a le saienitisi, o le lalolagi ma le atulaulau o loo tatou nonofo ai, o loo
aga’i atu i le fa’aleagaina i le isi piliona o tausaga i le lumana’i. A o le vaai a
le faifeau, o le Atua ma lona alofa ua ala ai ona tumau pea le ola i le lalolagi
ma ona tagata. O fuafuaga mamana o le Atua, ua ala ai ona le faaleagaina le
lalolagi i le taimi nei.
O le mea lea e tatau ai ona ifo ma tapuai tagata uma i le Atua. Ioe, afai e
moni le va’ai faasaienisi o loo aga’i le lalolagi i le fa’aleagaina i le isi piliona
tausaga i le lumanai, o le va’ai fa’amataupu silisili o le ifo ma tapua’i i le Atua
e le tupu lea mea i o tatou vaitaimi.
Tatalo: A’oa’oina i matou le Atua, ina ia matou iloa ona tapua’i i lau afio i
so’o se auala, Amene.
UA FA’AILOA MAI E LE LAGI
2 – O le I’uga
Aso Sa - Oketopa 25: “O le poto e fai ma fa’avae” Tusi Faitau - Fa’ataoto 3:19-26 (Wisdom as a foundation)
Matua - f.19: “O le poto na fa’avaeina ai e le ALII le lalolagi; ua
fa’atumauina le lagi i le mafaufau.”
O le faitauga o lenei aso o loo faʻasoa mai ai le tāua o le fa’avae mausali.
Ua fai le poto ma fa’avae e ala i le galuega foafoa a le Atua i le lalolagi. O le
poto o le Atua, na Ia iloa ai le mea sili mo le lalolagi ma le tagata na ia faia.
Ina ua sesē ma pa’u maulalo le foafoaga ona o le agasala o le tagata, na silafia
e le Atua poto le auala e toe fa’aleleia ai. O lea na auina mai ai Iesu, e togiola
agasala o le foafoaga, e ala i lona maliu ma lona toetu. O Iesu Keriso, ua fai
ma fa’atinoga poto a le Atua, o le fa’avae tatou te ulufale atu ai i Lona malo.
Tatalo: Le Atua alofa e, foa’i mai le poto o lau afio mo i matou, matou te
mautinoa ai Iesu Keriso o le fa’avae mautu i o matou olaga, Amene.
Labor Day (Niu Sila)
Aso Gafua - Oketopa 26: “Manatua lou tupuaga” (Remember your roots)
Tusi Faitau - Isaia 51:13-16 Matua - f.13a: “Ua galo fo’i ia te oe o le ALII o le na faia oe, le na fofola le
lagi, ma fa’avaeina le lalolagi.”
O le loto galo o se tulaga e masani ona molimauina i le soifuaga. Peita’i, o
le onosa’i ma taumafai e manatua se mea sa tupu, e iloa ai le naunau o le
55
tagata e alo ese mai le loto galo. O lou manatuaina o lou tupuaga, e le gata o
se taumafaiga ina ia ‘aua ne’i galo ou aiga ma le nuu na e ola aʻe ai, a o le
vala’au ina ia ‘aua neʻi galo le a’ao o le Atua sa ta’ita’iina ai oe mai le tuana’i. Fa’amanatu Isaia i tagata o lona nuu o loo aumau i le tafeaga i Papelonia,
e le gata ua latou galo le Atua o lo latou faasinomaga, ae ua latou galo foi, o le
Atua na fa’afoisia ma fa’aolaina ona tagata. E tatau i le tagata ona naunau e
alo ese mai le galo o le Atua, e ala lea i le to’aga i le lotu, tautua i le Ekalesia,
ma le tatalo i aso uma. O mea uma ia e fa’avae ai lo tatou manatuaina o le
Atua, o le na te fa’amanuia ma fa’amafanafanaina i tatou i aso uma.
Tatalo: Le Atua e, ia ‘aua ne’i galo ia te i matou lou alofa e pei ona e foa’iina
mai e ala i lou Alo oIesu Keriso, Amene.
Aso Lua - Oketopa 27: “Vi’ia le Atua i a tatou upu ma fa’atinoga”
Tusi Faitau - Sal. 148:1-14 (Praise the Lord through our actions and words)
Matua - f.14: “Ua fa’amaualugaina fo’i e ia le nifo o lona nu’u, o le vi’iga o
ona tagata amio Atua uma; o le fanauga a Isaraelu, o le nu’u o lo’o latalata
ia te ia. Ia outou vivi’i atu i le ALII.”
Ua tele vave ma auala ese’ese mai suiga o Samoa. Ma o nei suiga, ua fai
ma a’afiaga i le olaga o tagata Samoa, e pei o le soifuaga masani ma lona
aganu’u fa’asamoa. I aso ua mavae, o le afiafi o le taimi lea e potopoto ai aiga
ma faigalotu. O le taimi filemu lea mo aiga e tapua’i ma vivi’i ai i le Atua.
Peita’i, ua maitauina le mou malie atu o le faiga sa masani ai.
Ua fa’amanatu mai e le Salamo 148, o mea uma na faia i le lagi ma le
lalolagi, e tatau ona vivi’i atu i le Ali’i. Auā o le Atua na faia ia mea uma, ma
o le na togiolaina ona tagata. Poo a suiga i le lalolagi o lo’o tatou nonofo ai, e
tatau ona faʻamaoni le ola vivi’i i le Atua e ala i a tatou gaioiga ma upu e fai.
Tatalo: Fa’ailoa mai lau afio ina ia matou iloa ona ola vivi’i e ala i a matou
upu ma fa’atinoga, Amene.
Aso Lulu - Oketopa 28: “E tumau” (Timeless)
Tusi Faitau - Salamo 102:25-27
Matua - f.26: “E fa’aumatia ia mea, a o oe, e te tumau pea; e pala ia mea
uma e pei o le ofu tele, e te liua ia e pei o le ofu, ona liua lava lea.”
O le faitauga o leni aso o loo pese le faisalamo i le natura o le Atua e
tumau (timeless). O lona finagalo alofa e le mafai ona ta mauina i se vaitau
poo se vaitaimi e tasi. Sa pese le faisalamo i le mafatiaga ma puapuaga ua oo
ia te ia. Peita’i, ua na iloa e mafai ona maua le mafanafana mai le Atua, o lē na foafoa mea uma ma tumau ai e fa’avavau. Le Atua e le mafai ona ta mau pe
tapula’a lona taimi. E pei o lona Alo na auina mai e maliu e togiolaina agasala
o le lalolagi, e lei mafai e le oti ma le tuugamau ona fa’atapulaaina.
Tatalo: Ia matou manatua lau afio foafoa, e te tumau e fa’avavau, Amene.
56
Aso Tofi - Oketopa 29: “O le onosa’i o le afe o tausaga i le aso e tasi”
Tusi Faitau - 2Peteru 3:8-13 (The patience of a thousand years in a day)
Matua - f.8: “Ae aua ne’i lilo ia te outou, le au pele, lenei mea e tasi, e tusa i
luma o le Ali’i le aso e tasi ma tausaga e afe, o le afe fo’i o tausagae tusa ma
le aso e tasi.”
Ua faʻaali mai e le Atua le auala tatou te onosaʻi ai, auā o le afe o tausaga
e pei o le aso e tasi i le Atua. O le manatu o loo aumaia i le tusi faitau o lenei
aso, e pule aoao le Atua i mea uma, e o’o fo’i i le taimi e gasolo ai mea uma o
le soifuaga. E fa’atalitali le Atua ma le onosa’i i lana foafoaga ma mea na Ia
faia ina ia lelei ma sa’o atoatoa. Ina ia mafai ona toe fo’i atu i le agaga o le
salamo ma fa’atuatua ina ia toe maua le ola, e tusa ma lona finagalo. E onosa’i le Atua, a o le tagata, e le lava le onosa’i i taimi e manaomia ai ona fa’amalie
ona manaoga fa’aletagata.
Tatalo: Fa’amagalo i matou ona o lo matou ola fia fa’amalieina ma ua galo
lau afio. Ia matou iloa ona ola talitonu ma toe fo’i atu i lau afio, Amene.
Aso Faraile - Oketopa 30: “Fafo mea tuai, totonu mea fou” Tusi Faitau - Fa’aaliga 21:22-27 (Out with the old, in with the new).
Matua - f.23: “E le aoga fo’i i le a’ai ona pupula i ai o le la, po o le masina;
auā o le pupula o le Atua ua fa’amalamalamaina ai o ia, o le Tama’i mamoe
fo’i o lona lamepa lea.”
‘Ua fou mea uma’ – o le isi lea fa’aupuga e mafai ona malamalama ai le
faitauga o lenei aso. O le tusi faitau, o se vaega lea o faʻaaliga sa va’aia e le
aposetolo o Ioane a o nofo fa’aaunuua ai i le motu o Patamo. O le fa’aaliga o
loo faʻamatala ai le oʻo mai o le Aai Fou – o le Ierusalema Fou mo tagata e
fa’atuatua fa’amaoni i le Atua. E matala pea faitotoʻa o le aai mo tagata uma o
ē ua fa’afouina. E leai se malumalu, ma e le mana’omia foi, auā o le Atua ma
le Tamaʻi Mamoe la te nonofo tumau ai i le aai fou. O le mamalu o le Atua
ma le Tama’i Mamoe e fa’amalamalama a’i le a’ai, ma e le o’o i ai se pogisa.
Ulufale i lenei Ierusalema fou i le agaga o le fa’atuatua moni i le Atua, ma
fa’amamāina i tatou i le toto o le Tama’i Mamoe.
Tatalo: Le Alii e, faʻafetai mo le Ierusalema fou. Fesoasoani ina ia matou tausi lou mamalu i le lalolagi o matou nonofo ai, Amene.
Reformation Day
Aso Toona’i - Oketopa 31: “To’asā o le tama’i mamoe” (Wrath of the
lamb)
Tusi Faitau - Fa’aaliga 6:12-17 Matua - f.16: “Ua latou fai atu fo’i i mauga ma papa, ‘Mafuli mai ia ia te i
matou, ma tanuma’i i matou ai le silafaga a lē ti’eti’e i le nofoali’i, ma le
to’asā o le Tama’i mamoe.”
O le Tama’i mamoe ua ta’ua i le faitauga o lenei aso, o Keriso lea. O le
57
vaʻaiga na molimauina e Ioane: o le Atua o loo nofo i le nofoali’i, ma Keriso
le Tama’i mamoe a le Atua, o le a Ia faia le fa’amasinoga o le lalolagi i le toe
aso. E ui o se tala fa’amata’u, peita’i, e i ai le itu e lelei ai. O le ‘au fa’atuatua
uma ia Keriso, ua uma ona sausauina i latou i le toto a le Tama’i mamoe, ma
fa’asaoina i latou uma mai lona to’asā.
Tatalo: Le Atua e, ‘aua ne’i ia te i matou le to’asā o le Tama’i Mamoe, Amene.
O LE TUSI PAIA I LE TAGA’I MAI O LE LALOLAGI
All Saints Day
Aso Sa - Novema 1: “Puapuaga ma le fa’amoemoe” (suffering and hope)
Tusi Faitau - Roma 5:1–11 Matua - ff.3-4: “…a ua matou mitamita foi i puapuaga, ina ua tatou iloa o le
puapuaga e tupu ai le onosai, a o le onosai e tupu ai le mautinoa, o le
mautinoa e tupu ai le fa’amoemoe;”
O lenei vaiaso o le a tatou faitau i le Tusi Paia mai le va’aiga a tamā ma tinā sa latou suia le lalolagi e ala i lo latou fa’atuatua i le Atua. E talafeagai
ma lenei aso, le Aso o le ‘Au Paia Uma, e fa’amanatu ai e le ‘au Kerisiano i le
lalolagi i latou sa asaina le gasu o le taeao i le fa’atinoga o le ola fa’atuatua.
O le alii o Desmond Tutu, o le faifeau mai i Aferika i Saute sa taulamua i
le tetee atu o le fa’ailoga lanu sa malosi i lona atunuu mai le 1970 i le 1980. O
ituaso pogisa ia mo Aferika i Saute, i le fetaua’i o tagata ona o le fa’ailoga
lanu. E ui na puapuagatia, a o lona fa’amamafa i le ola fa’amagalo, o le alofa
atu i isi, ma le ola tatalo, na atagia ai ia Tutu upu a le Aposetolo o Paulo lea ua
fai ma matua i lenei aso.
Tatalo: A’oa’o mai ina ia ou iloa ola fa’amagalo ma le loto fuataiina, Amene.
Aso Gafua - Novema 2: “Ia olaina le amiotonu” (Living out justice)
Tusi Faitau - Salamo 9 Matua - ff.17-18: “E tulia i seoli o e fai amio leaga, o nuu uma lava o e
fa’agalogalo i le Atua. Auā e le fa’agalogaloina e fa’avavau o e matitiva; o le
fa’amoemoe foi o e ua puapuagatia e le fano lea a le tu a le tu lava.”
O le tinā ia Dorothy Day sa naunau e fo’ia fa’afitauli sa aafia ai tagata
lautele i lona vaitaimi, e pei o le ola mativa. O le tele o le olaga galue o lenei
tinā sa ofoina atu i le tausiga o tagata matitiva ma le fesoasoani i ē sa
olopalaina i lu’itau o le soifuaga. E tele fale sa fa’atūina e lenei tinā e tausi ai
tagata matitiva, ma na maliu ai lava, a o ofo pea lona ola mo tagata matitiva.
O le Salamo e 9, fa’apea le Salamo e 10, o se ta’utinoga e sili ona mauaa e
uiga i e matitiva. O le Atua o le ‘olo maualuga mo ē sauaina’. Ua folafola
mai foi e lenei Salamo i upu ia ua avea ma matua, ‘e le fa’agalogaloina e
fa’avavau o ē matitiva’. Na atagia ia Dorothy Day upu ia a le faisalamo,
aemaise le finagalo alofa o le Atua mo e matitiva.
58
Tatalo: Le Alii e, o manaoga o le Tala Lelei e le faigofie, ae moni. Ia mafai
ona matou talia mana’oga o le Tala Lelei, e fa’atino ai lou finagalo, Amene.
Aso Palota (Amerika)
Aso Lua - Novema 3: “O le Aso o le ALII” (The day of the Lord)
Tusi Faitau - Amosa 5:18-24
Matua - ff.18a, 24: ‘Talofa ia te outou o ē mananao i le aso o le ALII!...o le
pouliuli lea, a e le o le malamalama… A ia tafe ifo le fa’amasinoga e pei o
vai, ma le amiotonu e pei o le vai e tafe tetele lava’. O upu ia ua fai ma matua sa fa’aaogaina e le alii o Matini Luteru King Jr,
i lona ta’ita’iina o le Mau mo ‘Aia Tatau i Amerika i le vaitau o le 1960. I
lana lauga ta’uta’ua, “E i ai la’u moemitiga..(I have a dream)”, ma lana
tusitusiga lauiloa mai le falepuipui i Birmingham, na fa’aaoga ai e King upu ia
a le perofeta o Amosa. Mulimulita’i King i le ‘au perofeta o le Feagaiga Tuai,
e ala lea i le fa’amamafaina o le tete’e e aunoa ma le fa’atupu vevesi, i faiga le
amiotonu o le fa’ailoga lanu ma le fa’aitu’au.
Na maliu fasia King, a o le mau na ia ta’ita’iina ma ana galuega sa faia
mo le ‘aia tatau o tagata lanu i Amerika, o le ata manino lea o le ‘tafe ifo i le
fa’amasinoga e pei o vai, ma le amiotonu e pei o le vai e tafe tetele.’
Tatalo: Fa’afetai le Atua mo auauna sa le fefe e tetee atu i le amio le tonu ma
faiga fa’aitu’au, ua fai ma fa’ata’ita’i mo i matou i le ola fa’atuatua, Amene.
Aso Lulu - Novema 4: “Toe va’iliili lo tatou lumana’i” Tusi Faitau - Salamo 119:33-40 (Reimagining our future)
Matua - f.34: “Ia e a’oa’o mai ia te au, ona ou anaana lea i lau tulafono, ma
ou tausia ma lo’u loto atoa.”
O le alii o Aperaamo Iosua Heschel o se Rapi o le lotu o Iutaia ma sa
faiaoga o le Mataupu Silisili ma le Filosofia i Amerika i le vaitau o le 20
seneturi. Sa soifua mai i le taimi na fasiotia ai tagata Iutaia e fitafita o Siamani
i le Taua Lona Lua o le lalolagi, ae sa aumau ma galue i Amerika fa’atasi ma
le alii o Matini Luteru King Jr. i le Mau mo ‘Aia Tatau. E pei o King, o ana
talitonuga sa faavae mai i le ‘au perofeta o le Feagaiga Tuai, aemaise le valaau
ina ia tetee atu i faiga le amiotonu ma le fa’ailogaloga tagata.
O lona naunau i le finagalo o le Atua, e moni ai upu a le Salamo 119. E le
gata o le pese e faatatau i le matagofie o a’oa’oga a le Atua, a o le fiafia ma le
olioli e maua e le tagata e ala i ia a’oa’oga. O le olaga atoa o Heschel ma lona
soifua galue, o loo atagia i le Salamo lea.
Tatalo: Le Alii e, ia matou iloa ona alolofa moni i le Atua e ala i le olaina o le
amiotonu. Ia matou iloa ona tutū fa’atasi ma e o loo fia maua le ola, Amene
Aso Tofi - Novema 5: “O le olaga o le saolotoga” (The life of freedom)
Tusi Faitau - Kalatia 5:1, 13-25
59
Matua - ff.1, 25: “O lenei ia outou tumau i le saolotoga ua fa’asaoloto mai ai
Keriso ia te i tatou; a e ‘aua ne’i toe taofia outou i le amo o le pologa. Afai ua
tatou ola i le Agaga, ia tatou savavali foi i le Agaga.”
O le alii o Viliamu Wilberforce sa ola ma soifua i le taimi na malosi ai le
fa’apalogaina o tagata uli i le amataga o le 19 senituri. E ta’uta’ua lenei alii
ona o ia sa ta’ita’iina le Mau i Peretania e taofia ai le fefa’ataua’iga o tagata
pologa. Na ia una’ia se pili i totonu o le maota faitulafono a Peretania, e
taofia ai le olaga fa’apologaina i totonu o Peretania, ae fa’aaoga le talaiga o le
Tala Lelei e fai ma ta’iala e fa’avae ai le pili.
O galuega sa faia e Wilberforce i totonu o faiga fa’apolokiti ma le unua’ia
o tulafono mo le faia o le amiotonu, e atagia ai le tagata e le gata ua ola i le
Agaga, ae ua savali foi i le Agaga, e pei o upu a le Aposetolo ua fai ma matua
o lenei aso.
Tatalo: Le Alii e, ia avea i matou ma fa’ataitaiga lelei e fa’ailoa atu le
fa’atinoga o le saolotoga mo le tagata ma lona siosiomaga. Amene.
Aso Faraile - Novema 6: “Va’aia Iesu i ē vaivai” Tusi Faitau - Fa’ataoto 31:17-21 (Seeing Jesus in the vulnerable)
Matua - ff.17-18, 20: “Na te fusia lona sulugatiti i le malosi; na te fa’amalosi
ona lava lima. Ua iloa e ia ua lelei lana tau; e le mate lana lamepa i le po. Ua
fa’amafola lona lima i lē ua tigaina; ua tuu atu foi ona lima i lē ua mativa.”
O le tinā ia Teresa na fanau i Maketonia i le 1910, ae na avea ma taupousa
ma galue i le ‘aai i Calcutta i Initia e amata i le 1946, seia oo ina maliu i le
1997. E ta’uta’ua lenei tinā taupousa ona o lana galuega i tagata matitiva i
Initia. O lona soifua fa’apaiaina na fa’amamafa ai le alofa i tagata uma, le
puipui o le mamalu fa’aleAtua o i le soifua o tagata, tautala i le mativa o se
solitulafono o tagata uma, ma le ola i le alofa. E atagia ia Teresa le ata o le
‘tinā amio lelei’ o loo ta’ua i le tusi faitau o lenei aso.
Tatalo: Le Alii e, seia e aumaia le malosi e fa’amalolosi ai i matou e fa’atino
lou finagalo ma lau amiotonu i tagata uma, Amene.
Aso Toona’i - Novema 7: “O le alofa o le maturo” (The love of a martyr)
Tusi Faitau - Isaia 40:1-11 Matua - f.6: “Ua fai mai le leo, ‘Ina alaga ia’. Ona fai atu lea o ia, ‘Se a ea
se upu ou te alagaina?’ O tagata uma o le mutia i latou, ma lo latou lelei uma,
e tusa lea ma le fuga o le vao.’ O Oscar Romero sa avea ma epikopo sili i le aai o El Salvador, i Amerika
i le itu Latino. Na ia fa’amamafaina le fa’amasinoga tonu mo tagata matitiva,
aemaise e sa afaina ona faiga lē amiotonu o le faigamalo ma ē mau’oa.
Fa’atāua e Romero le valaau fa’aperofeta a le Ekalesia, aemaise le savali ai o
le Ekalesia i mea na te tala’iina i tagata. Na maliu fasia Romero i le 1980, a o
tala’i pea lana feau o le amiotonu ma le faamasinoga tonu mo tagata matitiva.
60
O galuega ma mea lelei uma sa faia e Romero mo tagata matitiva, ua
fa’atusaina ai o ia o le leo o loo alaga mo tagata ua leai se leo, e pei ona faimai
le perofeta o Isaia, ina ia tumau i afioga a le Atua.
Tatalo: Fa’afetai le Atua e ala ia Iesu Keriso, ua matou iloa ai le ola matou te
tutusa ai ma tagata matitiva o lenei lalolagi, Amene.
IEREMIA
1 – O le Valaau e Lia’iina ma Lepetia
Aso Sa - Novema 8: “Vala’auina o Ieremia” (Jeremiah’s call)
Tusi Faitau - Ieremia 1:1-10
Matua - ff.5-6: “Na a’u iloa oe a o lei faia oe e a’u i le manava; na ou
fa’apaiaina oe a o lei fanau oe, na ou tofia oe e fai ma perofeta i le nuu’. Ona
a’u fai atu ai lea, ‘Aue, le ALII e le ATUA, fa’auta, ou te le iloa ona tautala,
auā o au o le tama itiiti.’”
Ina ua o’o i le taimi ua tatau ona fa’ailoa ai i le tupu, o ositaulaga, ma
tagata uma o Iuta le fa’amasinoga a le Atua o le a o’o mai, valaau e le Atua le
tama talavou o Ieremia e fai ma ana avefeau. Fefe Ieremia ona o ia o le tama
itiiti. Ae fa’alototele e le Atua lana auauna, ma ave i ai ma le mautinoa, o ē e
le fia fa’alogo i lana feau, latou te le mafai ona fa’atoilaloina o ia.
O le fefe ne’i fesiligia, ulagia, pe faitiona i tagata, ua avea lea ma pa
pupuni ua mumusu ai tagata vaivai e tautatala leo tele i le mea moni. O le
fa’alototeleina o Ieremia, ua fa’ailoa mai ai e le Atua ia te ia, ma i tatou uma,
le ‘auala e mafai ona tatou tautatala leo tele ai i le mea moni.
Tatalo: Le Alii e, ia avea i matou ma tamaiti e fa’ailoa le upu moni mai ia te
Oe i mea uma matou te faia, Amene.
Aso Gafua - Novema 9: “Va’ai lelei” (Seeing well)
Tusi Faitau - Ieremia 1:11-19 Matua - ff.11-12a: “Na oo mai foi le afioga a le ALII ia te au, ua fa’apea
mai, ‘Ieremia e, o le a ea le mea ua e vaai i ai?’ Ona ou fai atu ai lea, ‘Ou te
vaai atu i le laau o le sekati’. Ona fetalai mai ai lea o le ALII ia te au, ‘Ua
lelei lau vaai.”
I le vaitau o Ieremia, ua pa’uū ta’ita’i o Iuta i le mailei e masani ai le ola
mamasagia: ua leiloa le eseesega o mea sesē ma mea sa’o. O mea sesē, afai ua
masani ai i aso uma, e ui ina avea ma mea sa’o. A o mea sa’o ua musu e fai
ma le taliaina i le mafaufau, e alu a’i alu a’i, avea ma mea sesē. O le mea lea e
tāua ai le lelei o le va’ai, e pei ona fa’amamafa e le Atua ia Ieremia. O le
auauna a le Atua ua valaauina e fa’atino lona finagalo, e le tatau ona sasi le
va’ai i le mea sesē ma le mea sa’o.
Tatalo: Le Atua o le ola, ia avea i matou e fa’ailoa atu lou finagalo alofa i
tagata uma, Amene.
61
Aso Lua - Novema 10: “O atua pepelo e le fa’amalieina ai”
Tusi Faitau - Ieremia 2:1-13 (False gods fail to satisfy)
Matua – ff.12-13: “Auā e lua mea leaga ua faia e lo’u nuu; ua latou tuua a’u
le puna o le vai ola, a ua latou eli mo i latou o vaieli, o vaieli māvaevae e le tali ai ni vai.”
Fa’amanatu e le Atua i lona nu’u le tulaga matagofie sa i ai anamua, i o
latou ‘augatama sa mulimuli ia te ia ma tausi i ana poloaiga. Peita’i, o lo latou
augatupulaga ua liliu i mea le aoga. Ua latou tapuai i atua e le fa’amalieina ai
o latou loto – o vaieli e le maua ai se vai. Taumafai Ieremia e fa’ailoa i lona
nuu o latou tapua’iga sese, a ua lē mafai lava. O lo latou le usiusita’i ma le
faia o le mea sese, e i’u ai le fa’asalaina.
Tatalo: Le Atua alofa e, agalelei i ē ua fai ma vaisu le ifo ‘au i atua mamate o
lenei olaga, ina ia latou iloa ua na’o lau afio o le Atua moni, Amene.
Aso o Fitafita (Amerika)
Aso Lulu - Novema 11: “Lūlūina i tiga” (Shaking in anguish)
Tusi Faitau - Ieremia 4:19-31 Matua - ff.19-20a: “Lo’u manava e, lo’u manava e! Ua tiga lo’u loto i
totonu ia te au; ua tagi lo’u loto, ou te le mafa’alologo; auā lo’u agaga e, ua e
fa’alogo i le leo o le pu, ma le vāvāo o le taua.”
O upu a Ieremia e le o ni upu fa’amalosi ‘au, a o upu o le fa’atafunaga. E le
nao Ieremia sa lūlūina i le tiga, ae pei ua lūlūina ai ma le lalolagi atoa. A o
osofa’ia pa o le nu’u ma lofituina tagata i le taua, sa vevesi lagona o Ieremia i
le tiga ma le fa’anoanoa, ae fa’afoliga pea tagata o le nu’u e pei e leai se mea o
tupu. A o Ieremia, ua tautala sa’o lava i le mea o loo tupu, aemaise o ona
lagona tiga. O le fa’afoliga ma le musu e talia le mea moni o loo tupu, e tuai
ai lava i le tagata ona faia se suiga, ina ia mafai ona tula’i mai se mea lelei i le
taimi mulimuli.
Tatalo: Le Alii e, a’oa’o mai ina ia ou talia ma tautala i le upu moni, Amene.
Aso Tofi - Novema 12: “Leai se mā, leai se filemū” (No shame, no peace)
Tusi Faitau - Ieremia 6:13-26 Matua - ff.14-15a: “Ua latou fofō fa’atauvaa le manua o le tama fafine a lo’u
nuu, ua fa’apea ane, E manuia, e manuia, a e leai se manuia. Ua latou mamā ea ona o le mea inosia ua latou faia? Ua matuā le mamā lava i latou.”
O folafolaga ae le taunuu. O le masani lea o ta’ita’i o Iuta i le taimi o
Ieremia. Silafia e Ieremia, na o ala o le Atua e manuia e maua ai le filemu ma
le fa’amasinoga tonu. Peita’i, e peiseai sa naunau tagata e fa’aoleole le Atua,
a le mulimuli i ana poloaiga. E le mafai ona olegia le Atua i tapuaiga ma faiga
e ō’ō ma lē aanoa, e pei o folafolaga a ta’ita’i. O le leo e lagona pea, o le
valaau a le Atua ina ia faia le amiotonu ma le fa’amasinoga tonu. O le lē mulimuli i ala o le Alii, e oo mai ai o puapuaga ma le fa’asalaga.
62
Tatalo: Le Atua o le fa’amasinoga tonu, aumaia le agavaa e mafai ona matou
feagai ai ma fa’afitauli o lenei olaga, Amene.
Aso Faraile - Novema 13: “Ina ia ou tagi” (That I might weep)
Tusi Faitau - Ieremia 9:1-11 Matua - f.1: ‘E! fia liua lo’u ulu ma suāvai, ma o’u mata ma punāloimata,
ina ia o’u tagi i le ao ma le po ona o tagata o lo’u nuu ua fasiotia.”
Ina ua tagi Iesu ona o Ierusalema, sa fa’anoanoa lona loto ona ua toilalo lo
latou iloa i mea e maua ai le filemu. E fa’apena foi i le ‘au perofeta. O
Ieremia ua fetosoa’i ona lagona, fa’i o le ita i lona nu’u ona ua latou fulitua i
le Atua, ae e alofa foi le perofeta i ona tagata.
E pei foi o le fa’afitauli i le suiga vevela o le lalolagi. Ua leva ona fa’ailoa
mai mea o le tutupu i le lalolagi pe a le fo’ia lenei fa’afitauli i le taimi nei.
Peita’i, e le o mamafa i tagata lenei fa’afitauli. E fa’aosofia ai lagona o le
musuā i e o loo feagai ma le galuega taulogologo. Ae pei o Ieremia, e le tatau
ona tatou musuā e taulogologo pea. Ia manatua, o i latou o loo tetee mai, o o
tatou tagata foi i latou.
Tatalo: Le Atua e, ia ave’ese lou tagi, ma ta’ita’iina lo’u loto ia te Oe, o le
vaiola e ola ai, Amene.
Aso Toona’i - Novema 14: “Le Alii e, fa’amalolo ia te au” (Heal me, O Lord)
Tuai Faitau - Ieremia 17:5-18 Matua - ff.13-14: “Le ALII e, le fa’amoemoe o Isaraelu, e fa’amaina i latou
uma o e lafoai ia te oe…auā ua lafoaiina e i latou le puna o vai ola. Le ALII e,
ia e fa’amalolo mai ia te au, ona malolo ai lea o a’u.”
Ua aga’i ina matua Ieremia, ma ua fia mautinoa poo fa’amaoni pea le
Atua ia te ia. I lenei vaitau o le fefe ma le vevesi o le feagai ma lona nu’u, ua
amata ona masalosalo Ieremia i lana mafutaga ma le Atua. Peita’i, sa fa’aauau
pea le valaauina a Ieremia, i le tala’iina o le feau e le fia faalogo ai lona nuu.
E musuia pea i tatou e Ieremia i nei ona aso. O tagata ua latou ofoina atu
e tautala i le mea sa’o, e tusa lava pe saisaitia ai, o latou ia e manino ai lo tatou
va’ai i le mea moni.
Tatalo: Le Agaga Paia e, i lou alofa tunoa e te manavaina le ola i mea uma.
Ta’ita’i i matou i vai puna o le ola, e fa’afou ai i matou mo lau galuega, Amene.
IEREMIA –
2 - O Puapuaga o Ieremia
Aso Sa - Novema 15: “Fa’aatoatoaina e Lē na faia i tatou”
Tusi Faitau - Ieremia 18:1-11 (Made perfect by our Maker)
Matua - ff.4-6a: “Ua leaga le ipu na ia faia i le omea i le lima o le fai ipu
omea; ona toe fai ai lea e ia o le tasi ipu e tusa ma le manatu o le fai ipu omea
63
ona fai. Ona o’o mai lea o le afioga a le ALII ia te a’u, ua fa’apea mai, “Le
aiga o Isaraelu e, ou te le mafaia ea ona faia ia te outou e pei o lena fai ipu
omea?”
O le Atua o le tufuga o lo tatou ola na te faa’aogaina mea eseese o lenei
soifuaga e fa’ailoa mai ai ana fuafuaga mamana mo i tatou. E pei o le fai ipu
omea. E i ai lana fuafuaga ua uma ona mafaufau i ai; na te faia le ipu omea e
tusa ma lea fuafuaga. E uma ane, ua i’u i se ipu omea e lelei ma matagofie e
pei ona fuafuaina e le fai ipu omea mai le amataga. O le Atua o le tufuga
poto, ma o ana fuafuaga mo i tatou e lelei atoatoa. E tatau ona tatou ofo atu ia
te ia ma ana fuafuaga mamana, auā e taunuu lava i le lelei e pei ona fuafuaina.
Tatalo: Le Atua o le ola, aumaia lou alofa tunoa e ofo atu ai lo’u tagata mo au
fuafuaga paia, ina ia aogā a’u mo lou finagalo, Amene.
Aso Gafua - Novema 16: “E le mafai ona ou taofia lo’u tautala i le Upu” Tusi Faitau - Ieremia 20:7-18 (I cannot stop speaking the Word)
Matua - f.9: “Ona ou fai atu lea, ‘Ou te le ta’uta’uina o ia, ma ou le toe
tautala i lona suafa’. A o lo’u loto e peiseai o se afi mumū sa i ai, ua punitia
o’u ivi, ua lailoa a’u i onosai, ua ou le mafaia ai lava.”
O le Upu a le Atua e le mafai ona ta’ai fa’afala. Poo a faigata ma
puapuaga e tutupu mai i le soifuaga, e mafai ona tatou taofi mai i le Upu ma
tautala i le Upu, seia o’o ina tatou manumalo i faigata ma puapuaga ona o le
fesoasoani mai o le Upu a le Atua. Sa le faigofie le galuega a Ieremia. Sa
inosia ai o ia e lona nu’u. Sa lamatia ai foi lona soifua i le talaiina o le Upu a
le Atua. Peita’i, e lei mafaia e ia mea faigata ona taofia lona tautala i le Upu.
Tatalo: Le Alii e, ia tala’i e lo’u gutu lou Upu folafola e aunoa ma ni fita ma
ni faigata e o’o mai, Amene.
Aso Lua - Novema 17: “Pe a le talia e tagata tapua’i le mea moni” Tusi Faitau - Ieremia 26:1-15 (When worshippers do not want the truth)
Matua - f.2: “O loo fa’apea ona fetalai le ALII, ‘Ia e tu atu i le lotoā ma fai
atu i aai uma o Iuta, o e omai e tapuai i le fale o le ALII, upu uma ou te poloai
atu ai ia te oe e fai atu ia te i latou, ‘aua lava le tu’ua se upu.”
Tatou te lolotu i le falesā ona o le fia fa’alogo i le Upu a le Atua. Ae le o
tagata uma e omai i le lotu e fia fa’alogo i le moni o le Upu. Valaau le Atua ia
Ieremia e tala’i lana feau atoa i lona nu’u, ona o le naunau o le Atua ina ia tu’u
se avanoa i lona nu’u e salamō ai. Peita’i, e le o le mea lea sa i’u i ai. Na tetee
le nu’u ia Ieremia ma lana tala’iga. E ui o le Upu tu’u sa’o mai le Atua, ae e i
ai taimi tatou te le fia fa’alogo i ai. Auā o le Upu na te lu’itauina i tatou. Ae
tatou te fiu e tetee i le Upu, e le suia lava le Upu a le Atua.
Tatalo: Le Alii e, tatala o matou loto ina ia matou iloa ou ala, ae le o matou
lava ala, matou te ola ma savavali ai e fa’atino lou finagalo, Amene.
64
Aso Lulu - Novema 18: “Fa’atū e le Atua tagata faufautua”
Tusi Faitau - Ieremia 26:16-24 (God raised intercessors)
Matua - f.16: “Ona fai atu lea o alii ma le nuu uma i faitaulaga ma perofeta,
‘E le tatau ona oti o lenei tagata, auā ua tautala mai o ia ia te i tatou i le
suafa o le ALII lo tatou Atua.’”
Na valaauina Ieremia e tala’i le Upu a le Atua i tagata o lona nu’u sa le fia
fa’alogo ai ma lē taliaina. O le fa’atinoga o lona valaauina, ua lamatia ai le
soifua o Ieremia, ua manana’o ai tagata e tu’u i le falepuipui, a o isi ua
manana’o e fasioti ia te ia. Peita’i, na fa’atūina e le Atua tagata faufautua sa
latou fesoasoani ia Ieremia, e pei o Aikamo le atalii o Safana ma isi, sa latou
laveaiina Ieremia i le taimi tonu na lamatia ai lona soifua. O le masani lea o le
Atua. A valaau e le Atua le tagata e fa’atino lona fingalo, e fa’atūina foi e le
Atua isi tagata e fautua ma fesoasoani ia te i tatou i le fa’atinoina o le valaau.
Tatalo: Le Atua e, fesoasoani mai ina ia ou fa’atuatua ia te oe e ui ina si’omia
a’u i le fili ma ana mailei, Amene.
Aso Tofi - Novema 19: “E pule le Atua i lo tatou ta’ita’iga” Tusi Faitau - Ieremia 27:1-15 (God is in charge of our leadership)
Matua - ff.4b-5: “Ia fa’apea ona outou fai atu i o outou alii, ‘O a’u nei, ua ou
faia.le lalolagi, o tagata ma manu ua i luga o le fogaeleele, i lo’u mana tele,
ma lou lima fa’aloaloa; ua ou tuuina atu ai foi i le ua tatau ma lou manatu.”
E i ai fuafuaga mamana o le Atua mo le lalolagi na ia faia. O lona
finagalo mo lona nu’u i le vaitaimi o Ieremia, o le fa’atafea o lona nu’u i
Papelonia mo sina taimi ina ia a’oa’i ai, ma, e leai lava se mea e mafai e se isi
e teena ma suia ai. Pau le mea, o le ifo ‘au ma talia le porokalame ma
fuafuaga a le Atua ua uma ona fa’ataoto.
E i ai fuafuaga a le Atua mo i tatou. Ia tatou tatalo i le Atua ma tatou
‘auai e fa’atino ia fuafuaga mamana, fa’atasi ai ma o tatou ta’ita’i ua ia
valaauina e ta’ita’iina i tatou. A faapea ona tatou faia, ona tatou iloa tino atu
lea o ana fuafuaga ma lona finagalo mo i tatou.
Tatalo: Le Atua e, ua matou tatalo ia fa’atino au fuafuaga ma lou finagalo mo
i matou. Fa’aaupegaina i matou ina ia matou ‘auai i lea fa’atinoga, Amene.
Aso Faraile - Novema 20: “Faimai e ā le Atua...?” (Did God really say…?)
Tusi Faitau - Ieremia 28
Matua - f.16: “O le mea lea, o loo fa’apea ona fetalai mai ai o le ALII,
‘Fa’auta, ou te lafoai ia te oe ai le fogāeleele, e te oti i le tausaga nei; auā ua e tautala i le fouvale i le ALII.’”
E fiafia tagata i perofetaga ona o le fia iloa poo a mea o le a tutupu i le
lumana’i. Ona o lea, ua i ai tagata tau fa’asesē ua faimai o latou o perofeta,
ma ua fafau a latou perofetaga ma folafolaga e fai, i luga o mea e fiafia ma fia
fa’alogo i ai tagata. E naunau foi le Atua e fia fa’ailoa mai ia te i tatou mea o
65
le a tutupu i le lumana’i, pe afai tatou te saili ia te ia, fa’alogo i lona fetalai
mai, ma salamō ma sui o tatou olaga.
Peita’i, e tele perofeta pepelo ua le ta’ua le finagalo o le Atua, a ua fai a
latou perofetaga ona o le fia fai mea ma le naunau e fa’amalie le fa’alogo o
tagata, e pei o Hanania. Sa tete’e Hanania ia Ieremia ma lana feau, ona vavalo
lea i tagata o le a a’e le tafeaga. Na le fiafia le Atua i le perofetaga a Hanania
ma na fa’asala ia te ia i le oti. O taimi uma e fetalai ai le Atua i ona tagata e ala
i ana perofeta, o le fa’amaoniga, e taunuu le afioga a le Atua.
Tatalo: Le Alii e, aumaia lou alofa tunoa ou te faitau ai ma faalogo ai ma le
manino i le moni o lau afioga, Amene.
Aso Toona’i - Novema 21: “E lelei fuafuaga a le Atua”
Tusi Faitau - Ieremia 29:1-14 (God has a good plan)
Matua - f.11: “Auā o a’u nei, ua ou iloa manatu ua ou manatu ai ia te outou,
o le manatu i le manuia, a e le o le malaia, o loo fetalai mai ai le ALII, e
foa’iina atu ia te outou le i’uga e i ai le fa’amoemoe.”
A o nofo tafea le nuu o le Atua i Papelonia, na folafola ai e le Atua le upu
fa’amafanafana ma le fa’amoemoe. Folafola e le Atua le manuia o lona nuu, a
o i ai i le tafeaga. Fa’amautinoa e le Atua lona nu’u, e i ai ana fuafuaga mo i
latou i Papelonia, latou te manuia ai. E ui la ina faigata le tulaga ua latou oo i
ai, aemaise le ‘aumau ai i nuu ese, e tatau ona latou onosa’i ma fa’atuatua i
fuafuaga a le Atua o le a faataunuu mo i latou, e i’u i le manuia. E i ai le
fuafuaga a le Atua mo i tatou. Ia tatou onosa’i, ma fa’atalitali i le Atua ma ana
fuafuaga tatou te manuia ai.
Tatalo: Fa’ailoa mai au fuafuaga paia le Atua, matou te manuia ai, Amene.
IEREMIA
3 – Pupula o le Fa’amoemoe
Aso Sa - Novema 22: “Toe amata” (Beginning again)
Tusi Faitau - Ieremia 30:1-11
Matua - f.10: “O oe foi, Iakopo e, la’u auauna, ‘aua e te fefe, o loo fetalai
mai ai le ALII; auā foi e te mata’u o oe Isaraelu e; …e foi mai lava Iakopo, e
toto’a foi o ia, ma nofo filemu, e leai foi se tasi e fa’amata’u ia te ia.”
O le tusi a le perofeta o Ieremia e le faigofie. O le mafatia, le fa’aaunu’ua,
tiga, ma le fa’amata’u; o fa’afitauli ia tatou te mumusu ai. Peita’i, o fa’afitauli
tonu ia o loo fa’amanatu mai e le tusi o Ieremia ia te i tatou.
I le mataupu e 30 ma le 31 o Ieremia, ua fa’aigoaina e le ‘au su’esu’e, “O
le tusi o fa’amafanafanaga,” o loo folafola ai e le Atua le fa’amoemoe ola mo
lona nuu. E ui i le feau o le faamasinoga ma le fa’atafunaga o loo tala’ia e
Ieremia, a o le i’uga, e toe foi lava le tafeaga ma toe faafoisia e le Atua lona
nuu. O upu o le fa’amoemoe i le ola fou. A o upu foi o loo fa’ailoa mai ai le
66
misiterio o le Atua e ui i lana fa’amasinoga: o ia foi o le Atua fa’amagalo ma
le alofa mutimutivale, na te faia amataga fou mai le i’uga mate.
Tatalo: Le Atua o fa’amafanafanaga, pa’i atu ia i latou ua feagai ma
mafatiaga ma puapuaga, ma avatu i ai le fa’amoemoe ola, Amene.
Aso Gafua - Novema 23: “O le Atua o le foma’i” (God the healer)
Tusi Faitau - Ieremia 30:12-22 Matua - f.17a: “Auā ou te fa’amaloloina oe, ou te fofōina ou manu’a, o loo
fetalai mai ai le ALII.’ I le tusi faitau o lenei aso, o loo fa’amatala e Ieremia le tiga i le taimi na
osofa’ia ma fa’atoilaloina ai Ierusalema e vae ga ‘au a Papelonia: tagi o le
popole ma le mata’u, tiga e le mafai ona togafitia, tu’ulafoaiina, ta’uvalea, ma
le olopalaina. O le fa’asalaga lea a le Atua i lona nu’u ona o lo latou agasala.
A o upu ia ua avea ma matua, o loo fa’ailoa mai ai le Atua o le foma’i, na
te saunia le fa’amalologa mo ona tagata. O le fa’amalologa, o le galuega lea a
le Atua na te aumaia ai le soifua manuia i le tino le mafaufau ma le agaga. O
lea foi se va’aiga i lo tatou ola faatauvaa ma le ma’aleale, ua mafatia ona o le
agasala. Peita’i, o le Atua alofa e tumu i le fa’amagalo, na te fa’amaloloina i
tatou i mea uma tatou te tiga ai ona o le agasala.
Tatalo: Le Alii e, seia e fusia i matou i ou aao alofa, ina ia matou maua ai le
fa’aolaina mai lau afio, Amene.
Aso Lua - Novema 24: “O le alofa e fa’avavau” (An everlasting love)
Tusi Faitau - Ieremia 31:1-14
Matua - f.3b: “O le alofa e fa’avavau, ua ou alofa atu ai ia te oe; o le mea
lea ua ou fa’afualoaina ai lo’u alofa ia te oe.”
O loo fa’aauau pea upu fa’amafanafana a le Atua mo lona nu’u o loo nofo
tafea. E toe fa’afoisia e le Atua lona nu’u. E o’o foi i ē vaivai ma fa’atauvaa
o le nuu, e fa’afoisia e le Atua. O lona uiga, o tagata uma; e leai se tasi e tu’ua
i Papelonia, e toe faafoisia uma e le Atua i Ierusalema. E mafua ona e
fa’avavau le alofa o le Atua. O le nu’u sa fa’apologaina i Papelonia, o lenei ua
tata kitara ma alaga ma le pese fiafia. Soo se atunuu e fa’atinoa le alofa mo
tagata uma, o loo i ai le tumu o le Alii e fa’atupuina le olioli o tagata, e avea
ma maa tulimanu e fa’aauauina lona alofa.
Tatalo: Le alii e, ia avea a’u e avatu le upu fa’amafanafana mo tagata mafatia,
ma avea ma pese malie e olioli ai. Amene.
Aso Lulu - Novema 25: “Loimata o Rasela” (Rachel’s tears)
Tusi Faitau - Ieremia 31:15-30
Matua - f.15b: “Ua tagi Rasela ona o lana fanau, e le mafai foi ona
fa’anāina o ia ona o lana fanau, auā ua leai i latou’
67
O Rasela o le to’alua o Iakopo, le atalii o Isaako, le atalii ia o Aperaamo,
sa tupuga mai ai le nuu o Isaraelu. O lona uiga, ua leva ona maliu Rasela a o
lei alu le tafeaga i Papelonia. A o lea ua faimai Ieremia, “Ua tagi Rasela ona
o lana fanau, e le mafai foi ona fa’anāina.” O le olaga o Rasela, o se olaga e
tumu i le fa’anoanoa, ae fa’aiuina i le fiafia ma le olioli. Na maliu Rasela i le
ala aga’i i Ieruselma, i le fanau mai o lana tama o Peniamina. Tagi la ma
fa’anoanoa Rasela ona o le tiga o le oti o le a o’o mai ia te ia, ae fiafia foi ma
olioli, ona o le a ola lana tama, o le fa’amoemoe ola mo ‘aiga i le lumana’i. Mo Ieremia, e tagi la Rasela ona o le fanauga a Isaraelu ua fa’atafea. Ae
fa’aiu i le fiafia ma le olioli, ona o le folafolaga a le Atua i le toe fa’afoisia o
lona nu’u. E fa’anoanoa, ae i’u i le fiafia. E tiga, ae taunuu i le olioli. O faiga
ia ua masani ai le Atua.
Tatalo: Le Atua o Rasela, seia e fa’apotopoto o matou ‘āiga ma fanau ma
fusia i matou i lou alofa. Amene.
Aso Fa’afetai (Amerika)
Aso Tofi - Novema 26: “Feagaiga fou” (A new covenant)
Tusi Faitau - Ieremia 31:31-40 Matua - f.33b: “..ou te tu’uina la’u tulafono i totonu ia te i latou, ma ou tusia
ai i o latou loto, e fai foi a’u mo latou Atua, o i latou foi e faia mo’u nuu.”
O le feagaiga fou, e tusia i loto o tagata e pei ona folafola e le Atua ia
Ieremia. O le feagaiga tuai sa tusia ai tulafono i papa ma’a, a o le feagaiga
fou, o le a tusia ai tulafono i loto o tagata. O le loto, o le nofoaga o lagona ma
filifiliga fai o le tagata. A tusia la tulafono i le loto, e le toe agasala pe sasi ai
ni filifiliga a le tagata e fai. O le mea fou lea o le faia e le Atua. E le gata o le
a toe fa’afoisia e le Atua lona nu’u i Ierusalema, ae o le a toe fa’afoisia foi ma
le feagaiga na latou osia. Fa’atafea le nu’u ona ua latou solia le feagaiga na
tusia i papa ma’a. Ae a tusia i le loto, e le toe galo lava. O le fa’ailoga lea o le
Atua e fa’amaoni i ona tagata, e le fa’agaeetia lava.
Tatalo: Le Atua e, e fa’afouina mea uma, ia nofofale lau tulafono i lo’u loto,
ina ia ou manatua ma tumau i lau afio i aso uma, Amene.
Aso Faraile - Novema 27: “Tupe i le mea o i ai lou fofoga” Tusi Faitau - Ieremia 32:1-15 (Money where your mouth is)
Matua - f.15: “… auā o loo fa’apea ona fetalai mai le ALII o ‘au, le Atua o
Isaraelu, E toe fa’atauina i le nuu nei o fale, ma fanua, ma tovine.”
A o vevesi Ierusalema i le si’i taua mai o Papelonia, na fetalai le Atua ia
Ieremia e fa’atau se fanua i totonu o le ‘aai. O le fa’ailoga lea o le tauto atu o
Ieremia i le lumana’i a ona tagata. Ua uma taimi o upu, a ua o’o i taimi o
fa’atinoga ina ia talitonu ai tagata i le moni o folafolaga a le Atua, e toe
fa’afoisia i latou e le Atua. O le fa’asalalauga totogia, ae le o se fa’asalalauga
ua na o upu ma tala. O le fa’atauina o le fanau, o le fa’ailoga lea poo a
68
fa’aletonu o loo feagai ma le nu’u, ia latou silafia, e sau pea malama. E le
pouliouli pea taimi uma. Ae iai taimi o le a latou va’aia ma molimauina se
lumanai manuia, ona o le finagalo lea o le Atua mo i latou.
Tatalo: Le Alii o le ola, fa’amanuia i le laueleele ma mea ua e fa’atupuina ai
mo le tamāoaiga, fa’apea tagata o loo fa’aaogāina, Amene.
Aso Toona’i - Novema 28: “Fa’amoemoe mai le efuefu”
Tusi Faitau - Ieremia 32:16-25 (Hope from the ashes)
Matua - f.25:“A o oe, le ALII e, le Atua, ua e fetalai mai ia te a’u, ‘Ia e
fa’atau le fanua mo oe i tupe,ma aami atu molimau; a o le aai, ua tu’uina atu
lea i lima o Kaletaia.”
O le tusi faitau o lenei aso, o le tatalo a Ieremia i le Atua. O upu a le tatalo
o loo atagia ai le tulaga ese o le fa’amoemoe a Ieremia i le Atua, lea e taualuga
i le fuaiupu lea ua fai ma matua o lenei aso. Ua o’o mai i le ‘aai le sii taua mai
o Papelonia (Kaletaia); ua o’o mai mea mauti’eti’e e ā’ea ai pa; o fitafita ua
o’o mai ma le pelu e fasioti tagata o le ‘aai; ae fetalai le Atua ia Ieremia e
fa’atau le fanau. O le fa’ailoga manino lea, o toe upu o Ierusalema ma ona
tagata e le faia e Papelonia, ae faia e le Atua. E ui i le oti ua fa’amalumalu
mai, ae e i ai pea le ola o le Atua i le laueleele, aemaise i ona tagata. O le
fa’amoemoe ola lea mai le efuefu, e le tu’ulafoaiina e le Atua ona tagata.
Tatalo: Aumaia le lototele le Atua, e mafai ai ona matou feagai ai ma mea
faigata e o’o mai, Amene.
FETAIA’I MA MEA PA’IA I LE ATIVENI
1 – O le Iliina o le Pu
Aso Sā o le Ativeni - Taulaga o le Seminare
Aso Sa - Novema 29: “O le mauga paia a le Atua” (God’s holy mountain)
Tusi Faitau - Esoto 19:10-22 Matua - f.19: “O le leo o le pu ua alualu ona tele lava; ua tautala atu Mose,
ona talia ma lea e le ALII ia te ia i le siufofoga.”
O faitauga o lenei vaiaso e autū i tala o loo ili ai le pu i totonu o le Tusi
Paia. O le a tatou va’ava’ai i le fa’aaogaina o le pu, i le fa’ailoa mai o mea
tāua o loo tutupu, fa’aleo ai si’igā taua, vala’au ai tagata i tapua’iga, fa’ailo ai
fa’alavelave tutupu fa’afuase’i; ma folafolaina ai le toe afio mai o Keriso, le
fa’amasinoga mulimuli, ma le atoaga o le malo o le Atua ma lana pule.
O le tusi faitau o lenei aso, fetalai le Atua ia Mose e fa’apaia le nu’u o
aga’i mai i le mauga paia. Ua ili le pu e fa’asino ala ai i tagata, ma fa’ailoa ai
le taimi o loo talanoa ai Mose ma le Atua. Ua fa’ailoa mai e le pu le silisili
ese o le Atua, fa’atasi ai ma Mose, o le puluvaga e tu i le va o le Atua ma
tagata. Ua fa’amanatu mai foi e le pu le afio mai o le Atua i le mana ma le
malosi, e tatau i tagata uma ona ifo ‘au ma tapua’i ia te ia.
69
I le amataga o lenei vaitau o le Ativeni, ua tatou fa’amanatuina foi le afio
mai o le Atua. Ae le o le afio mai ma le mana ma le malosi e pei ona ta’ua i le
tusi o Esoto, a o le afio mai i le ala e sili ona maulalo ma fa’atauvaa. Ua afio
mai le Atua e fa’afetaia’i i tatou, i le mea o loo tatou ola ma soifua ai.
Tatalo: Ia lagona le pu ua ili mai, e tula’i ma fa’atino fa’apea le molimau e
fa’ailoa lou alofa, Amene.
Aso Gafua - Novema 30: “Iupeli!” (Jubilee!)
Tusi Faitau - Levitiko 25:1-15
Matua - ff.9-10: “Ia outou ili ai le pu i lo outou nuu uma lava … e fai lea ma
Iupeli ia te outou.”
O le pu ua ili i lenei aso, o le sofao e ili i le Aso o le Togiola, e fa’ailo ai
le amataga o le tausaga Iupeli. E ta’i 7 tausaga ma fai le tausaga Sapati. O le
tausaga Sapati e malolo ai le eleele e le toe atina’eina. A soso’o tausaga Sapati
e 7 (49 tausaga), o le tausaga e soso’o ai e fa’amanatu ai le tausaga Iupeli. O
le tausaga Iupeli e le gata e malolo ai le eleele, a o fanua uma sa galuea’ina mo
le atina’e e saili ai oloa, e toe fa’afoi i tagata moni e ona. E fa’amagalo uma
foi aitalafu, ma fa’asaoloto pologa e toe foi i o latou aiga. O le fa’amamafa o
le Iupeli, o le toe fa’afoisia o mea uma e pei ona i ai i le amataga, auā o le
Atua e ona. Ana fa’aauau pea le Iupeli i nei ona aso, masalo e ese se ituaiga
soifuaga ua tatou ola ai nei. Se manū ua leai se ola mativa. Leai ni taua ma ni
fa’avaevaea’iga. Leai foi se fa’ailoga lanu ma se fa’aitu’au. Mo le Kerisiano,
e tatau ona Iupeli taimi uma, auā sa fa’amamafa e Iesu le Iupeli i le fa’atinoga
o lana galuega – e pei o le fa’asaoloto o tagata mai le agasala, tutusa tagata
uma, ma isi. O ai e mafai ona e fa’asa’olotoina i lenei vaitau o le Ativeni?
Tatalo: Ia avea a’u e fa’atino lau amiotonu, ma ia fa’asa’olotoina tagata i le
filemu ma le fa’aolataga mai lau afio, Amene.
Aso Lua - Tesema 1: “Ili ma le fa’amaoni!” (A faithful blast!)
Tusi Faitau - Iosua 6:1-7, 15-21
Matua - f.6b: “Ina ave ia le atolaau o le feagaiga ma ia ave e faitaulaga e
to’afitu o pu e fitu o le iupeli, i luma o le atalaau a le ALII.”
A o aga atu Iosua ma le fanauga a Isaraelu e sopo’ia le nu’u folafolaina,
na muamua fetaia’i ma pa maualuluga o le ‘aai o Ieriko. Fetalai le Atua, ua
uma ona tu’uina atu le ‘aai i lima o Isaraelu, ae pau le mea, o le usiusita’i o
Isaraelu i ana fa’atonuga, ona latou manumalo lea. Fetalai le Atua, ia mulimuli
le ‘autau ma ositaulaga i le atola’au, ma savavali fa’ataamilomilo i le ‘aai i aso
e 6. A o le aso 7, ia ta’amilo fa’a-7 i le ‘aai ma ili pu a ositaulaga. A ili leo
tele loa le pu, ona alalaga lea o le nu’u uma, e soloia ai i lalo pa o le aai.
E tele ni a’oa’oga tāua e maua mai i le tala lea. O le mulimuli o Isaraelu i
le atola’au, o le fa’ailoga o le ‘auai o le Atua ma ona tagata. O le ta’amilomilo
foi o Isaraelu i le ‘aai e pei o se tafaoga o fai, o le fa’ailoga lea o le fa’atuatua
70
o Isaraelu i le pule aoao o le Atua ma lona fa’amaoni i le fa’ataunuuina o ana
folafolaga. E ese lava ala o le Atua mai o tatou lava ala. A tatou fa’atuatua ma
talitonu i ala o le Atua, e mafaia soo se mea.
Tatalo: Le Alii e, fesoasoani ia matou talitonu ma fa’alagolago i lou mana e
mafaia ai mea uma, e ui lava ina matou masalosalo, Amene.
Aso Lulu - Tesema 2: “Usita’i i le lapata’iga” (Heed the warning)
Tusi Faitau - Ioelu 2:1-16
Matua - f.1a: “ Ia outou ilia le pu i Siona, ia ta’alili i lo’u mauga paia!...”
E tele mafuaaga ua ala ai ona ili le pu i tala o le Tusi Paia. O ananafi sa ili
e fa’ailo ai le si’igā taua. A o le tusi faitau o lenei aso, ua ili e fa’ailo ai le
lapata’iga e tatau ona usita’ia, ma le vala’au i tagata e tapua’i. I le tusi a le
perofeta o Ioelu, o le iliga muamua o le pu o loo fa’ailoa ai le lapata’iga i le
o’o mai o faigata ma puapuaga i le nu’u. Ta’ua e Ioelu le o’o mai o le “Aso o
le Alii,” o le aso e pouliuli ma pogisa. E fa’atatau lea i le mala o sē akerise, e
osofa’i mai pei o se vaega ’au e fa’aumatia le nu’u. Ae ui i lea, e i ai pea le
fa’amoemoe mo Isaraelu, pe a salamō ma toe foi i le Atua.
O le iliga lona lua o le pu, o le vala’au i le nu’u e tapua’i i le Atua. Ia
tatalo ma anapopogi i le Atua, ina ia alofa mai ai le Atua ma taofia lana
fa’amasinoga, auā “e telegese lona to’asā , ua tele foi lona alofa.”
A o tatou i ai i le vaitau o le Ativeni, tatou usita’ia le valoaga a le perofeta
o Ioelu ma le iliga lona lua o le pu, ina ia tatou toe foi i le Atua, ma fa’atalitali
le afio mai o le Atua e ala ia Iesu Keriso.
Tatalo: Le Alii e, fesoasoani mai ma tatala la matou va’ai ia iloa suiga e
a’afia ai lo matou olaga sologa lelei, Amene.
Aso Tofi - Tesema 3: “Tula’i uma!” (All rise!)
Tusi Faitau - 1 Korinito 15:51-58
Matua - f.52b: “ ...Pe a ilia le pū fa’auma; auā e ilia lava, e toe tutū mai ai ē ua oti ma e ola pea, e liua foi i tatou.”
Tusi Paulo i le Ekalesia i Korinito, e fa’atatau i le misiterio o le Aso o le
Alii, ma lona fa’ailo mai e ala i le iliga o le pu. O le aso e toe tutū ai ē ua oti
ma suia fa’afuase’i ai mea uma, i le itu fa’aletino fa’apea le itu fa’aleagaga. O
o tatou tino e le toe o’o i ai se oti pe pala foi, ae o le a avea ma foafoaga fou a
le Atua. O le toetu manumalo o Keriso mai le tuugamau, ua tatala ai le
avanoa mo tagata uma e liua ai ma fa’afouina ai i le mamalu o le Atua. O lo
tatou fa’amoemoe lea mo le lumani, a o le ta’iala foi mo i tatou i le taimi nei.
O le fa’atonuga a le Aposetolo, ia tatou tutumau i le fa’atuatua, auā e leai se
mea tatou te faia mo le Alii e i’uvale ma le aogā.
Tatalo: Le Alii e, fa’afetai ua e tatala le ala matou te sao ai i le ola e
fa’avavau. Fesoasoani mai ia matou tumau ai, Amene.
71
Aso Faraile - Tesema 4: “Fa’atasi ma Keriso ma ia Keriso”
Tusi Faitau - 1 Tesalonia 4:13-18 (With Christ and in Christ)
Matua - f.16: “Auā e afio ifo mai le lagi le Alii lava, ma le alaga, ma le leo o
le agelu sili, ma le pū a le Atua. E muamua foi ona toe tutū mai o ē ua oti ua
ia Keriso.”
O le faitauga i lenei aso, o loo naunau le ‘au uso i Tesalonia e fia iloa poo
le a tonu le mea o le a o’o i ē ua feoti, i le taimi e toe afio mai ai Iesu. O le
molimau a le Aposetolo, o ē ua feoti, o i latou ia e muamua toe tutū mai, ma
afio fa’atasi ma Keriso i lona toe afio mai. O se feau fiafia lea mo le ‘au uso i
Tesalonia o loo olopalaina i sauāga. Fa’aaogā e Paulo le gagana fa’afa’atusa e
masani ai le tusi o Tanielu, e fa’amatala ai le toe afio mai o Iesu, e pei o le
pisapisaō o tagata ma le iliina o le pu. A o le fa’amamafa o lea gagana, ina ia
tatou fa’amoemoe ma tulimata’i ai le aso e toe afio mai ai le Alii. O le o’o
mai o le vaitau o le Ativeni, o le fa’amanatu ina ia fa’amamafa fa’atasi le
liutino tagata o le Atua e ala ia Iesu, ma le fa’amoemoe i lona toe afio mai.
Tatalo: Iesu e, fa’afetai i le fa’aolataga na e saunia e ala i lou toetu mo lou
toe afio mai. Ia matou fa’atalitali ma fa’amoemoe ai ma le mautinoa, Amene.
Aso Toona’i - Tesema 5: “O le pu mulimuli” (The final trumpet)
Tusi Faitau - Fa’aaliga 11:15-19
Matua - f.15a: “Ua ili foi e lona to’afitu o agelu le pu ...”
O le pu ua ilia i lenei aso, e sau mai le tusi o Fa’aaliga, ma o le iliga
mulimuli lea o se pu i le Tusi Paia. O le fa’aaliga na iloa e Ioane, e 7 pu sa ilia
e agelu e fa’ailo ai mea o le tutupu i le lumana’i. O le iliina o pu ta’itasi, o le
vala’au lea i tagata ina ia salamō ona o fa’afitauli o le a tutupu mai. A o le
iliga o le pu mulimuli, le lona 7 lea, na lagona ai le leo tetele o tagata o loo
folafola, “O le malo o le lalolagi ua avea mo lo tatou Alii ma lona Keriso.” O
le fa’ailo lea o le lumana’i sa fa’atalitali i ai, a o lea ua taunu’u, ina ua i’u le
galuega fa’aola o le Atua, ma ua atagia lona pule aoao e ala ia Iesu Keriso.
I lenei vaitau o le Ativeni, ia tatou sauniuni e fa’amanatu le afio mai o le
Atua e ala i le pepe ma’ale’ale sa fanau i Peteleema. O le Atua ua fa’atasi
mai, ua fanau mai o le pepe, ma ‘auai mai i lo tatou itu fa’aletagata.
Tatalo: Le Alii e, ia avea lou Agaga Paia e fai ma pū-usu e iliina ma fa’alogo
pea i ai i le ola fa’atuatua a ou tagata, Amene.
FETAIA’I MA MEA PA’IA I LE ATIVENI
2 – O Musumusuga
Aso Sa - Tesema 6: “E lei i ai le Atua i le mafui’e” Tusi Faitau - 1Tupu 19:9-18 (The Lord was not in the earthquake)
Matua - ff.11b12: “ ... E lei i ai le Alii i le mafui’e; e mulimuli i le mafui’e o
le afi; e le’i i ai le Alii i le afi; e mulimuli i le afi o le leo filemu ma le itiiti.”
72
O le mauga o Horepa, na molimau ai e Elia le itu mata’ina o le natura o le
foafoaga. I se isi va’aiga, ua fa’aaoga e le tusitala le natura o le foafoaga e
fa’ailo ai le fa’aali mai o le Atua ia Elia. O le savili, o le fa’ailoga o le fa’aali
mai o le mana o le Atua; o le afi, na fa’aali mai ai lona mamalu; ma le mafui’e,
na fa’aali mai ai le malosi o le Atua. Peita’i, i le gasologa o le tala, e le o mea
ia na iloa ai e Elia le Atua. A o le leo filemu na mulimuli ane, sa musumusu ia
Elia e sau i fafo ma le aga, la te fa’asoa ai ma le Atua.
O faitauga o lenei vaiaso o le a tatou va’ava’ai ai i ala tatou te maua ai le
Atua, i mea paganoa ma le filemu o lenei soifuaga. O nei faitauga o le a luitau
ai i tatou, ina ia mapu ane teisi mai le vevesi vale o le olaga i nei ona aso. E le
o se taumafaiga ina ia sola ese mai le olaga ma mea ua masani ai. A o le
naunauta’iga ina ia tatou lagona le musumusuga a le Atua i o tatou loto, auā e
le mafai ona tatou lagonaina i le pisapisaō ua masani ai le olaga i nei ona aso.
Tatalo: Le Atua e, na e fesili ia Elia, Se a lau mea e fai iina? Aumaia le
lototele ina ia matou faia lou finagalo e aunoa ma le fefe, Amene.
Aso Gafua -Tesema 7: “Fusi i ‘aao o le Atua” Tusi Faitau - Salamo 131 (Held in the arms of God)
Matua - f.2:“E moni na ou fifilemu ma fa’alologo, fa’apei o le tama ua te’a
ma le susu o lona tinā, ua tusa a’u ma le tama ua te’a ma le susu.”
E ese foi le mata’ina o se pepe meamea ae fusi i ‘aao o lona tinā. I le moe
filemu o le pepe i le fatafata a lona tinā, a o le tinā foi i lona silasila alofa i si
ana tama, e nofo filemu ma fa’aeteete ne’i te’i ua ala mai. O le agaga lea o loo
atagia i le Salamo 31, i le fa’amatalaina o le tagata fa’atuatua ae fusia i ‘aao
alofa o le Atua. E pei o le tinā i lona pepe, e fa’apea foi le Atua i lana fanau
fa’atuatua. E u’u ma fusia i tatou e le Atua, na te puipuia ma leoleoina i tatou
mai faigata o le soifuaga. E mafai lava ona tatou mafaufau i lea fa’atinoga
masani i le olaga fa’ale-tagata, auā o loo lotolotoi ai le fa’atinoga o le alofa.
Tatalo: Le Alii e, fa’atumauina le agaga o le to’afilemu, ina ua matou
mautinoa o loo e fusia i matou i lou alofa tunoa, Amene.
Aso Lua - Tesema 8: “Feagai ma afā o le olaga” Tusi Faitau - Luka 8:22-25 (Weathering life’s storms)
Matua - ff.24b-25a: “...Ona tu lea o ia, ua vavao i le matagi ma peau o le vai;
ona mavae ai lea ua malū. Ua fetalai atu o ia ia te i latou, “O ifea ‘ea lo outou
fa’atuatua?”...
O le sami, i le vaitaimi o Iesu, o le fa’ailoga o le soona nunumi lea sa i ai i
le amataga e pei ona ta’ua i le tusi o Kenese, ae na tu’umatāmagaina e le Atua
ina ua foafoaina le lagi ma le lalolagi. I le talitonuga fa’a-Iutaia, o le soona
nunumi lea e afua mai ai mea leaga uma ma puapuaga e tutupu i le olaga. O le
manatu lea sa laualuga i le ‘ausoo e uiga i le sami. Ina ua fetaia’i la le ‘ausoo
ma le afā i luga o le sami, na matuā iloga lava le fefefe ma le atuatuvale, na
73
latou fafagu ai le Alii o loo tofa i le taumuli o le vaa. E lei fa’afetauia e Iesu le
malosi o le afā, i lona malosi fa’a-Mesia. Ua nao se upu faigofie ma le filemu
na fetalai ai le Alii, ona malū ai lea o le sami.
Masalo tatou te lei afatia i se va’a e pei o le ‘ausoo. Ae talitonu le manatu,
e i ai taimi sa tatou afatia ai i puapuaga o le soifuaga, ae na laveaiina i tatou e
le Atua. Poo se fa’ama’i, se mafutaga ua motusia, o le le lava o le fa’asoa, poo
se isi faigata e masani ai le soifuaga. A tatou lagona le fa’atasi mai o le Atua,
e mafai ona avea ia faigata ma mea e loloto atili ai lo tatou ola fa’atuatua.
Tatalo: Le Atua e, fesoasoani mai ia matou iloa ona fa’alologo pe a mavae
puapuaga ma afa, o le taimi lea e sa’ili atu ai mo lou fesoasoani, Amene.
Aso Lulu - Tesema 9: “Fa’alologo ma tautala” (Silence and speech)
Tusi Faitau - Failauga 3:1-8
Matua - ff.1,7: “O le mea ma lona tausaga i mea uma, ma ona lava po i mea
uma lava i lalo o le lagi; ... o ona po e saeia ai, ma ona po e su’i ai; o ona po e
fa’alologo ai, ma ona po e tautala ai.”
O tima’iga o i le tusi o Failauga, o ni fautuaga tāua mai se auauna ua i ai le
poto masani o le soifuaga, ma, o lea poto masani, ua na iloa gofie ai le galue o
le Atua i mea e tutupu i le soifuaga. E mafai ona fa’apea, o loo galue le Atua e
ala i le tagata e tautala i le mea sa’o, nai lo le tagata e fa’alologo ma nofonofo
filemu e leai se tala e fai. Peita’i, a tatou mafaufau loloto i ai, e tāua uma le
tautala atu ma le nofo filemu. Pau le mea, o le taimi e fa’atino ai. E i ai taimi,
o le ‘auala sili ona lelei e fo’ia ai se tagata o loo finau mai, o le fifilemu ma
‘aua ne’i toe finau atu ai. O le ituaiga poto ma le fa’autautaga lea e fua mai i le
tagata ua masani i le soifuaga. A o le molimau o le tusi o Failauga, o le poto
ma le fa’autautaga lea, o le mea alofa mai le Atua.
Tatalo: Le Alii e, foai mai mo i matou le poto ma le fa’autauta: ia matou iloa
le taimi e fa’alologo ai, ma le taimi e tautala ai i lou finagalo, Amene.
Aso Tofi - Tesema 10: “Fifilemu e fesoasoani i le malamalama”
Tusi Faitau - Neemia 8:1-12 (Silence as an aid to understanding)
Matua - f.11: “Ua fa’afilemu atu foi e sā Levi i le nuu uma, ua fa’apea atu,
‘Fifilemu ia outou, auā o le aso paia lenei, ‘aua nei tiga foi outou.’”
O le tusi faitau o lenei aso, o loo ‘aumaia ai le tali atu o tagata ua to’ia o
latou loto ina ua fa’alogologo i le Upu a le Alii. E tolu ni vaega o lenei tali.
Muamua, ua latou fetāgisi, ina ua pa’i i le loto le feau ua fa’alogoina. Lua, ua
latou fiafia fa’atasi. O le ‘auala lea ua ta’utino ai lo latou agaga fa’afetai i le
Atua, ona o le feau matagofie ua latou fa’alogoina. Ma le tali mulimuli, lea e
atagia i upu ia ua fai nei na matua, ua fifilemu. Ia fifilemu, ina ia lava se taimi
e goto ai i le ta’ele o le loto le Upu a le Atua ua fa’alogo i ai. Ia fifilemu, ina ia
teu lelei le Upu ua fa’alogoina, ‘aua ne’i galo. Ia fifilemu, ina ia avea le feau
ua auala mai mo le lautele, e fai ma feau i le va o le tagata lava ia ma le Atua.
74
Tatalo: Le Atua e, ia fesoasoani mai ia ou maua le agaga to’a filemu loloto e
iloa tino ai lona ‘auai mai, Amene.
Aso Faraile - Tesema 11: “O ai e sili?” (Who is the greatest?)
Tusi Faitau - 2Korinito 10:7-18 Matua - f.12: “Auā matou te lē fa’amalosi ina fa’atasia, pe fa’atusatusaina ai
matou ma nisi, o e vivii i latou ia te i latou; a o i latou, o loo fefuafua’i i latou
ia te i latou, ma fefa’atusastusa’i i latou ia te i latou, e le popoto i latou.”
Ua lauiloa le fa’atuatua o le ‘au uso i Korinito, ae ua toe fesiligia lava ona
o lo latou femisa’iga poo ai o latou e sili. E lua itu sa tusi atu ai le Aposetolo i
le fa’afitauli lea. Muamua, fa’aaoga e Paulo o ia lava e fai ma fa’ata’ita’i, o lē
e sili atu ia Korinito uma, talu ai: o ia sa muamua i le fa’atuatua; o ia sa sili atu
ona puapuagatia ona o Keriso; o ia foi, e tele atu ana galuega sa ia fai nai lo
latou. E leai la se isi e sili atu nai loo ia. Lua, ua fa’ailoa e Paulo, e le aogā le
fa’atusatusa poo ai e sili, ona e sesē ai le fa’amamafa o le avea ma soo o le
Alii. E le o le finau poo ai e sili, a o le nonofo filemu ma tausi le fealofani o le
tasi i le isi. O le felagolagoma’i o le tasi i le isi i le filemu ma le fa’alologo, a e
le o le fefinaua’i, o le autu lea o le molimau fa’amaoni a le Kerisiano.
Tatalo: Le Alii e, ou te fa’afetai ona o meaalofa ua foa’i mai mo a’u. Ia ou
fa’aaogaina tatau, e fesoasoani atu ai mo isi, Amene.
Aso Toona’i - Tesema 12: “O taimi e le mafaia ai ona tautala” Tusi Faitau - 2Korinito 12:1-10 (Times when speech becomes impossible)
Matua - ff.3-4: “Ua ou iloa foi, na segia lena tagata i parataiso--ou te le iloa
pe na i le tino o ia, pe le i le tino, ua silafia e le Atua--na fa’alogo foi o ia i upu
e le mata’uta’ua, e le tatau foi i se tagata ona tautala i ai.”
E i ai mea e tutupu i le soifuaga e le mafai ona fa’amatala i upu ma tala. E
fa’apea le lagona o Paulo i lona tusi fa’alua atu i le Ekalesia i Korinito, i lona
taumafai e fa’amatala le tulaga o lana a’oa’oga ia te i latou, aemaise le ituaiga
tatalo ua manatu nisi e le ma fa’amatalatalaina. O le tatalo lea e lagona loloto
ai e le tagata lona fesootaiga ma le Atua. Ma, e i ai taimi e le mafai ai e upu
ma tala ona fa’amatalaina. A fa’amatala foi, e te lagona lava e le o atoatoa le
lagona moni o loo e taumafai e fa’amatala. E i ai lava mea e lilo i le Atua, e le
mafai e le poto fa’aletagata ona su’esu’eina; e le mafai foi e le gagana
fa’aletagata ona fa’amatalatalaina. Pau le mea, o le talia i le fa’atuatua.
Ua tatou va’ava’ai i lenei vaiaso i itu eseese e mafai e le filemu ma le
fa’alologo ona aafia ai le ola fa’a-Kerisiano. I lenei foi vaitau o le fiafia ma le
pisapisaō i le aga’i atu i le fa’amanatuina o le Kerisimasi, atonu o le a faigata
ona maua se filemu e mafuta atu ai i le Atua. Ae manatua, e tatala pea le
avanoa mo e o loo galala i le mana o Keriso e nofo mau i totonu o latou loto.
Tatalo: Le Alii e, ia matou maua le avanoa e tatalo fifilemu ai, ma
manatunatu ifo i le fa’atasi mai o lau afio mo i matou, Amene.
75
FETAIA’I MA MEA PA’IA I LE ATIVENI
1 – Fetaia’i ma Mea Pa’ia
Aso Sa - Tesema 13: “O le apefa’i a Iakopo” (Jacob’s ladder)
Tusi Faitau - Kenese 28:10-22 Matua - ff.16-17: “Ona ala lea o Iakopo na moe, ua ia fa’apea, ‘E moni lava
e i ai le ALII i le mea nei, a e ou te le’i iloa’. Ua fefe ai o ia, ua fa’apea, ‘O le
mea mata’utia lava lenei, e le se mea ese lenei, na o le fale lava o le Atua, o le
faitoto’a lava lenei o le lagi.’”
O lenei vaiaso o le a tatou va’ava’ai ai i fetaia’iga ofoofogia o le a fetaia’i ai
le tagata, ma le mamalu silisili ese o le Atua. Mo sina taimi, o le a tatala le
puipui e va a’i le lagi ma lalolagi. E pa’ia le Atua ma mamalu, e le mafai e le
poto o le tagata ona fa’amatalatalaina. A o fetaia’iga ia o le a tatou va’ava’ai ai i
lenei vaiaso, o taimi ia o le a mafai ai ona molimau le tagata i le mamalu silisili
ese o le Atua, ma suia ai ma lona olaga.
O le a tatou amata ia Iakopo, le tama faitogafiti. Na sola ese Iakopo mai i
lona aiga, ina ua ia ave fa’atogafiti le tofiga o le ulumatua mai lona uso o Esau.
I lana sola’aga, na alu ane Iakopo i se tasi nofoaga, ma fa’aaoga se tasi o ma’a
e fai ma ana aluga e moe ai. Ua fai lana miti, e tulaga ese lava. Ua na iloa
agelu mai le lagi, ma na ia maua ai le folafolaga, o le toe fa’amanatu o le
feagaiga na faia i le va o le Atua ma lona tupu’aga o Aperaamo. E ui na
feeseesea’i ma Esau, a o lana miti na ia va’aia ua tupu ai le fa’amoemoe ola ia
Iakopo, e i ai le taimi e toe foi ai i lona aiga ma le filemu.
Tatalo: Fesoasoani i la matou pepese i viiga o faia nei, auā o le paia ma lou
mamalu e le lava upu o la matou gagana e fa’amatalaina ai, Amene.
Aso Gafua - Tesema 14: “Fa’alatalata Mose i le mea pogisa” Tusi Faitau - Esoto 20:18-21 (Moses enters the thick darkness)
Matua - f.21: “Ona tūtū mamao atu lea o le nuu, a o Mose ua ia fa’alatalata
atu i le mea pogisa ua i ai le Atua.”
Ina ua mavae le tu’uina mai o Tulafono e Sefulu, na toe alu a’e lea o Mose
i le mauga o Sinai. Ua na o ia, ona fa’alatalata atu lea i le ‘mea pogisa’. I le
tusi o Esoto, e masani ona fa’aaoga le upu ‘pupula’ e fa’amatala ai le Atua--o
le malamalama tele lea e si’o i le ao puipui, nei a’afia ai le tagata ma oti ai. O
le mea pogisa lea sa fa’alatalata i ai Mose, o le ao puipui lea sa si’o ai le
malamalama tele – o le pupula o le Atua. Masalo o le tala lea e sau mai ai le
manatu: o lo tatou latalata i le Atua, o le atili ai lea ona tatou pogisa ia te ia. E
le o se mea leaga la le pogisa i le Atua, auā o le ao puipui lea o loo puipuia ai i
tatou mai le iloa tino o le Atua, ma tatou feoti ai. Tatou talia ia le manatu: e le
mafai e o tatou mafaufau ona iloa atoatoa le Atua i lona mamalu silisili ese.
Tatalo: Le Atua silisili ese, e le vaaia i mata fa’aletagata. O lou pupula e sili i
soo se malosi fa’ale-tagata. Ia viia ma fa’amanuina lou Suafa, Amene.
76
Aso Lua - Tesema 15: “O le vala’au o le serafi” (The call of the seraphim)
Tusi Faitau - Isaia 6:1-8
Matua - f.8: “Ona ou fa’alogo atu ai lea i le siufofoga o le ALII, ua fa’apea
mai, O ai ‘ea ou te auina atu? o ai foi e alu atu mo i matou? Ona ou fa’apea
atu ai lea: O a’u lenei, ina auina atu a’u.”
O Isaia sa i le malumalu i Ierusalema ma ia va’aia ai le fa’aaliga e tulaga
ese lava. Ua ia iloa atu le malumalu i le lagi, o loo afio ai le Atua i le mea
maualuga. O ona pito’ofu ua si’omia ai le nofoalii ua afio ai, ma tumu ai le
malumalu. Sa i ai ma le ‘au agelu na latou si’o le nofoalii, ua ta’ua o ‘serafi’. Na matua gatete Isaia i le fa’aaliga na ia vaa’ia ai le Atua, o lē na faia le
lagi ma lē e pule i ‘au o le lagi, o loo nofo i lona nofoalii. Auā so’o se tasi e
va’ai tino i le Atua, e oti lava. Peita’i, o le tasi o serafi na i lona lima le malala
ola, ua tu’u i le gutu o Isaia, ua fa’amamā ma fa’amagaloina ai ona agasala. O
le fa’ailoga lea, ua saunia Isaia mo le fa’atinoina o lona valaauina. O le
fetaia’i ma mea pa’ia, o le saunia lea o le tagata mo se galuega fa’apitoa ua
finagalo le Atua e fa’atino.
Tatalo: Le Atua mamalu ma le paia, saunia i matou ma fa’amamaina i matou
e pei ona e faia i lau auauna o Isaia, matou te fa’atino ai lou finagalo, Amene.
Aso Lulu - Tesema 16: “O le ao pupula mai le itu i matu”
Tusi Faitau - Esekielu 1:1-14 (A bright cloud from the north)
Matua - f.4: “Na ou vaai, fa’auta foi, o le afā o loo sau i le itu i matu, o le ao
tele, ma le afi... o le pupula foi ua fa’ataali’oli’oina ai le ao, mai totonu foi e
tino mai e peiseai o le ‘apa pupula mai totonu o le afi.”
O Esekielu o se tasi o ositaulaga na ‘ave fa’atagataotaua i Papelonia i le
tāfega muamua o le nuu o le Atua na alu i le tausaga 597 TLM, a o lumana’i le
fa’atafunaina o Ierusalema i le 587 TLM. A o nofonofo Esekielu i autafa o
vaitafe o Kepara i Papelonia, na ia va’aia ai se fa’aaliga e sili ona ofoofogia: o
le afā tele mai le itu i matu, ma le afi i totonu o le afā e mumū fa’asolo atoa, ae
iloa atu ai ma ‘mea ola e fa’ o loo i totonu, ua ta’ua, o ‘kerupi’. I totonu o le malumalu i Ierusalema, e i ai fa’atagata o kerupi sa leoleoina
le atola’au o le Atua o loo teu i totonu o le potu e i ai mea e sili ona pa’ia. I le
fa’aaliga na iloa e Esekielu, e foliga mai ua ola kerupi ia sa i le malumalu, ma
ua latou ave’eseina le atola’au mai le malumalu ma aga’i ese mai Ierusalema.
Mo Esekielu, o le mafuaaga lea na toilalo ai Ierusalema ia Papelonia – ona ua
le toe i ai le Atua i Ierusalema. A o le va’aia e Esekielu o kerupi a o i ai i
Papelonia, o le fa’ailoga lea o loo i ai pea le fa’amoemoe ola mo le nu’u o le
Atua o loo nofo tāfea.
Tatalo: Fa’ailoa lona mamalu. Pepese i lana fa’aolataga. Auā e silisili ese le
Atua, ma o lona mamalu o loo tumu ai le lagi ma le lalolagi, Amene.
77
Aso Tofi - Tesema 17: “O le fa’atusa o le nofoalii”
Tusi Faitau - Esekielu 1:15-28 (The likeness of a throne)
Matua - f.26: “O i luga foi o va i lagi i luga o latou ulu, ua i ai le fa’atusa o
le nofoalii, ua tino mai e fa’apei o le maa safaira; o i luga foi o le fa’atusa o le
nofoalii le fa’atusa ua tino mai e fa’apei o le tagata i ona lava luga.”
Ua atili ai ona uiga’ese le fa’aaliga na va’aia e Esekielu. Ua iloa atu e
Esekielu o uili ta’avavale i totonu o isi uili taavavale, ma ‘augutu o uili e tele
mata o loo tilotilo mai ai. I luga o ulu o manu o loo i ai le va i lagi, e pei o le
va i lagi na vavae ai e le Atua le vai i le tala i le foafoaga i le tusi o Kenese. I
luga o le va i lagi o loo i ai le nofoalii e fausia i le ma’a safaira, o loo afio ai le
Atua. Fa’amatala e Esekielu le Atua e pei o se tagata. I lona fa’amatalaina o le
fa’aaliga, fa’aaoga fa’afia e Esekielu le fa’aupuga, “ua pei.” O lona uiga, o
mea uma o loo fa’amatalaina e Esekielu e uiga i le Atua, ua na iloa atu, ae le
mafai e upu ona fa’amatalaina atoatoa.
To’atele tagata atamamai i le tusi ata sa latou taumafai e tu’u ata le
fa’aaliga na iloa e Esekielu. Peita’i, o ia ata e le o atoatoa. O le silisili ese o le
Atua, e iloa i le uiga’ese o le fa’aaliga na iloa e Esekielu. E pa’ia le Atua. E
tumu le lagi ma le lalolagi i lona mamalu, e le ma fa’amatalatalaina. E
sa’oloto foi le Atua e gaioi, na te silafia mea uma, e pei ona atagia i le tele o
mata sa i augutu o le uili ta’avalevale na iloa e Esekielu.
Tatalo: Le Atua e le ma fa’amatalatalaina, o lou mamalu silisili ese e iso ai le
iloa fa’aletagata. Fa’ailoa mai ia i matou i ou lava ala faigofie, Amene.
Aso Faraile - Tesema 18: “E tatau lava oe” Tusi Faitau - Fa’aaliga 4:1-11 (Worthy art thou)
Matua - f.11: “Lo matou ALII e, ma lo matou Atua, e tatau lava ‘oe ina ia
tuuina atu ia te ‘oe le viiga, ma le fa’aneeneega, ma le mana; auā na e faia
mea uma lava, ona o lou finagalo foi e i ai i latou ma ua faia.”
O Ioane, pei o Esekielu, sa nofo tāfea i le taimi na iloa ai le fa’aaliga mai
le Atua. Faimai ua tatala faitotoa o le lagi, ma alu a’e i le Agaga, ua na iloa atu
ai le nofoalii o le Silisili Ese. O le nofoalii sa iloa e Esekielu, e fealualua’i ona
e fai uili. A o le nofoalii sa iloa e Ioane, e tumau i le mea e tasi, le gaioioi. Pei
o Esekielu, na iloa foi e Ioane manu e fa, ma e tele ona mata o loo va’ava’ai
mai ai, e pei o mata sa i le auguto o uili sa iloa e Esekielu. E foliga tutusa le
fa’amatalaga a Ioane ma Esekielu, e le o atoatoa, talu ai o loo taumafai e
fa’amatala le silisili ese o le Atua, e le mafai e le gagana ona fa’amatalatalaina
atoatoa. O le fe’au o le tusi o Fa’aaliga, o le Atua o le tumutumuga o mea uma
e va’aia, ma o le Atua e ao ina tapua’i i ai.
Tatalo: E Paia, e paia, e paia! O le lalolagi uma o ē talitonu, ia ifo ma
punonou; o kerupi ma serafi ua ifo atu ia te IA, e silisili ese lava IA, Amene.
Aso Toona’i - Tesema 19: “O le mamoe na fasia” (The lamb who was slain)
78
Tusi Faitau - Fa’aaliga 5:1-14
Matua - f.6: “Na a’u iloa foi, fa’auta, ua tu mai i le va o le nofoalii ma mea
ola e fa, e i ona tua foi le ‘au toeaina, o le Tama’i Mamoe e peiseai na fasia, e
fitu ona nifo ma ona mata e fitu, o Agaga ia e toafitu o le Atua ua aauina atu i
le lalolagi uma.”
A o fa’aauau le fa’aaliga a Ioane, na ia va’aia Lē ua i luga o le nofoalii, o i
lona ‘aao le tusi ta’ai, e leai foi se tasi e agava’a na te tatalaina. Peita’i, i le va
o le nofoalii ma meaola e fa, sa va’aia ai e Ioane le mamoe na fasia. Poo le
mamoe o le Paseka, poo le mamoe e osi ai taulaga, poo le mamoe foi sa ta’ua i
le Isaia 53:7; e le o manino lea. Ae tusa ai ma le fe’au manumalo o le Mesia, o
le mamoe na fasia lea na va’aia e Ioane, o le Keriso na fa’asatauroina. Ua
pepese fiafia ai i latou uma sa si’osi’omia le nofoalii i le pese fou, ua ta’utino
ai, o le mamoe na fasia o i “le aao taumatau o lē ti’eti’e i le nofoalii.”
A tatou mafaufau toto’a i le ata lea o loo aumaia e le fa’aaliga, o se ata e
sili ona mata’ina: O le Atua o loo afio i le lagi i lona nofoalii, ae si’omia e
meaola e fa, o toeaiina, ma isi mea felanulanua’i e tele e pei ona fa’amatalaina
e Ioane. A o le mea e faigata ona iloa atu i le ata, o le tama’i mamoe, i ona
foliga to’afilemu, o loo taoto i ‘auvae o le nofoalii. Le fa’atauvaa o le tama’i mamoe, a o ia lea na te ta’ita’iina vae ga ‘au o le Atua i le lagi. O le ata lea o
le fa’a-Kerisiano, e manumalo i ala o le agamalū ma le loto maulalo.
Tatalo: O mai ia tatou punonou i le agamalū ma le loto maulalo i luma o le
Nofoalii o le alofa, Amene.
UA LIUTINO TAGATA LE UPU: KERISIMASI MA IOANE
1 - Sa i le Amataga le Upu
Aso Sa - Tesema 20: “Le alofa o le Atua ua fa’aalia” Tusi Faitau - 1 Ioane 4:7-19 (God’s love revealed)
Matua - f.9: “O le mea lava lenei ua fa’aalia mai ai le alofa o le Atua ia te i
tatou, ina ua auina mai e le Atua lona Alo e to’atasi i le lalolagi, ina ia tatou
ola ia te ia.”
O le vaitau o le Kerisimasi tatou te manatunatu ai, e le o mea e mafai ona
tatou avatua mo le Atua, a o mea ua foa’iina mai e le Atua mo i tatou. Ma, o
Ioane, i lana Evagelia ma isi ana tusitusiga i le Feagaiga Fou, o loo manino
mai ai le feau lea: Ia tatou alolofa i le Atua, auā o Ia na mua’i alofa mai. Tatou
te alolofa i le Atua auā ua uma ona fa’aali mai le Atua e ala ia Iesu Keriso, o lē
e mafai ona tatou alofaina. E le o se Atua e taumamao ma lē ma iloaina. A ua
liutino tagata, ma ua fa’aliliu e ia o ia lava i se fa’atusa, ma se gagana, e mafai
e i tatou ona malamalama i ai.
Peita’i, e ui i lona liutino tagata e ala i le pepe sa fanau i Peteleema, a o ia
lava o le Atua soifua e to’atasi. O le amio na faia e Iesu, o le amio foi lea e
amio a’i le Atua. Ma, ina ua tatou iloa e alofa le Atua ia te i tatou, o iina tatou
te maua ai le mautinoa e tatau ona tatou alolofa atu i isi. O aso ia e sefulu-tasi
79
o loo totoe ona fa’aiu lea o lenei tausaga, o le a tatou su’esu’e ai i le manatu o
Ioane, i ‘auala e aafia ai lo tatou ola i le alofa o le Atua.
Tatalo: Ia fesoasoani mai, le Atua e, ia matou iloa ma malamalama atili i le
tala lelei a Ioane, ma matou iloa atili lou lava alofa mai ia i matou. Amene.
Aso Gafua - Tesema 21: “O le malamalama ma le pouliuli” Tusi Faitau - Ioane 1:1-9 (Light and darkness)
Matua - f.5: “Ua pupula mai foi le malamalama i le pouliuli, a e lei manu-
malo i ai le pouliuli.”
O le Kerisimasi o le taimi o mōlī malamalama ma mōlī e emoemo i le
pogisa; o mōlī ga’o e fa’atutū solo i totonu o le fale ma luga o fa’amalama e
susulu atu i le pouliuli, ma mōlī felanulanua’i e ta’ai i le la’au Kerisimasi e
fa’amalamalama ai le fale i le taimi pogisa. O le susulu atu o le malamalama i
le pogisa, o le isi lea autu fa’apitoa i le Evagelia a Ioane.
Ua fa’ateteleina le pogisa i lenei lalolagi: o le pogisa o le gasegase o le
mafaufau, pogisa o le atuatuavale, pogisa o le fefe, pogisa o le amio leaga,
pogisa o le leai o se fa’amoemoe, ma le tele o isi mea pogisa. Peita’i, poo le a
lava le ituaiga pogisa, o loo i ai i totonu le malamalama o le Atua o loo susulu
atu, ma avatua le fa’amoemoe ola i tagata e ta’ita’iina i latou i taimi o le pogisa.
O le ola tatalo ma le ola lagolago o le tasi e le isi, o iina e fa’aaoga ai e le Atua i
tatou e fa’asusulu atu ai lona malamalama i le pogisa.
Tatalo: Le Alii e, ia e fesoasoani ia matou iloa ona tatalo ma fa’atino le ala
tonu e susulu mai ai lou malamalama, ma susulu ai pea i mea pouliuli. Amene.
Aso Lua - Tesema 22: “Fa’alauiloaina o le Atua” (Making God known)
Tusi Faitau - Ioane 1:10-18 Matua - f.18: “E le’i vaaia lava le Atua e se tasi; o le Alo e to’atasi o loo i le
fatafata o le Tamā, o ia ua na fa’ailoa mai o ia.”
Faimai nisi, o le faitauina o le mataupu muamua o le Evagelia a Ioane i le
sauniga o le Kerisimasi, o le amataga moni lea o le Kerisimasi. E lē amata i le
fa’atauina o ni meaalofa, poo le teuteuina o le la’au Kerisimasi, poo mōlī ‘emo’emo, poo le tapenaga o se talisuaga. E amata moni le Kerisimasi, i le
taimi tatou te fa’atasitasi ai ma o tatou aiga ma tatou fa’alogo i le Upu: “Ua liu
tino tagata le Upu, sa mau foi o ia ma i tatou..(f.14).”
O le fuaiupu e 18 lea ua fai ma matua, o loo ta’utino mai ai le mea moni: o
lo tatou va’ai ia Iesu - le tagata, le tufuga mai Nasareta – o lo tatou va’ai lava
lea i le Atua. Ina ua finagalo le Atua e liutino tagata, ma soifua pei o se tagata,
ma a’oa’o atu, ma maliu pei o isi tagata; o aga lava ia o le Atua. E mafai ona
tatou va’ava’ai ia Iesu, ma tatou iloa ai le Atua. I le Ekalesia, o i tatou o sui o
Keriso i le lalolagi, ma, e tatau ona fa’alauiloa atu le Atua e ala ia Iesu.
Tatalo: Le Atua e, fa’ailoa ia i matou le Alo, ia matou iloa atili ai lava, Amene.
80
Aso Lulu - Tesema 23: “Talitonu ia Iesu” (Believing Jesus)
Tusi Faitau - Ioane 2:13-22 Matua - f.22: “Na tu mai o ia i ē ua oti ona manatu ai lea o ona soo ua na
fetalai mai lenei upu ia te i latou; ona latou talitonu lea i le Tusi, ma le
fetalaiga a Iesu ua ia fetalai mai ai.”
O le malumalu i Ierusalema o le laumua o le lotu o Iutaia. O le nofoaga e
tatalo ai i le Atua, e faimalaga ai tagata i aso fa’apitoa, ma tapena ai le va
fesootai a le tagata ma le Atua e ala i le ofoina atu o taulaga o le fa’afetai ma le
fa’amagaloga. O sunako, sa faia ai talosaga ma a’oa’oga o le tulafono i aso
faiso’o. Ae na’o le malumalu lava i Ierusalema, e mafai ona faia ai taulaga. I le
aluga o tausaga, ua olaola pisinisi atina’e i le fa’atauina atu o manu e fa’atino
ai taulaga. Ua avea lea faiga ma ala ua pisi vale ai le malumalu ua pei o se
maketi ua fefa’ataua’i ai oloa, ma fa’aleaga ai le agaga o le tatalo sa masani ai.
O le taimi tonu lea sa to’atama’i ai Iesu ma fuli i lalo laulau o ē sa fa’atau
atu. Ae atonu, pei o isi perofeta ua mavae, e i ai le mea moni o loo fa’atino e
Iesu i ana gaioiga sa fai: ua le toe aoga i tagata ona ofo atu ni taulaga e fesootai
ai i le Atua - o Iesu lava ia, o ia o le ala e fesootai ai. O le talitonu i ana upu ma
ana mea sa fai, aemaise i lona maliu ma lona toetu, o le taulaga sili lea ua sui
a’i le faigataulaga sa masani ai Iutaia. O lona uiga, e le toe mana’omia ni
malumalu ma ni Faiga taulaga e fesootai atu ai i le Atua – o le uiga moni lea o
gaioiga sa faia e Iesu i totonu o le malumalu.
Tatalo: Fa’afetai le Alii e, ua avea le taulaga e tasi na osia e lou Alo Pele, ma
ta’iala matou te ui atu ai i lau Afio, Amene.
Aso Tofi - Tesema 24: “Ia tupu olaola le Atua i totonu ia te oe”
Tusi Faitau - Ioane 3:27-36 (Let God grow in you)
Matua - f.30: “E ao ina tupu pea o ia; peita’i a’u nei, e tauau ina itiiti o a’u.”
O Ioane le Papatiso, e fai si ese o le olaga sa soifua ai. Ae mo tagata o lona
vaitaimi, e talafeagai lelei le olaga sa soifua ai Ioane ma faiga sa masani ai le
‘au perofeta – e nofo i le toafa, e la’ei i pa’u o manu, e ‘ai i le meli ma sē
akerise, ma tala’i atu e pei e leai se taeao. Na fa’atino e Ioane le matāfaioi sa
vavalo e le perofeta o Isaia: teuteu le ala o le Alii.
Silafia lelei e Ioane, o ia ua na o se ‘avefe’au, na te folafolaina le afio mai
o le Mesia. Molimau le Evagelia o Ioane, na matua lilo i le mafaufau o Ioane le
Papatiso poo ai tonu lē e mulimuli mai ia te ia. Ae masalo na fa’ate’ia Ioane,
ina ua iloa ane o lana tausoga o Iesu mai Nasareta, le tufuga nofofale. Peita’i, na amata lava ona fa’atafatafa ese Ioane mo Iesu, ina ua fa’ataga ona so’o e
mulimuli ia te ia. Ina ua amata le galuega tala’i a Iesu, na talia lava e Ioane le
talitonuga, ua lata ona fa’ai’u lana galuega teuteu ala. Ma, ua na lagona ai foi
le fiafia, ua taunu’u le galuega na valaauina ai o ia e le Atua (f.29).
Tatou te tutusa ma Ioane i le saunia o tagata e mulimuli ia Iesu. Ae a
mafana loa le tagata i lana mafutaga ma Iesu, ua tatau loa ona tatou se’e
81
tuāgalu; ia fa’aitiiti i tatou, ina ia mafai ona tupu tele le Atua. Tatou te avanoa
pea e fa’amalosi ‘au ma ofo atu le fesoasoani. Ae tatau pea ona tu’u le avanoa
i le Atua e galue ai ma ta’ita’iina le tagata i ona lava ala fa’ale-Atua. O i tatou
ua na’o ni avefe’au, a o le pepe e fanau mai i le fale o manu, o ia lea o le feau –
le Upu a le Atua.
Tatalo: Le Alii e, fesoasoani mai ia matou iloa lou finagalo, ma ia matou iloa
ona tu’u le avanoa e galue ai le musumusuga lilo a lou Agaga, Amene.
Aso Kerisimasi
Aso Faraile - Tesema 25: “Ua o’o mai le malamalama i le lalolagi”
Tusi Faitau - Ioane 3:16-21 (The light has come into the world)
Matua - f.17: “Aua e le’i auina mai e le Atua lona Atalii i le lalolagi ina ia
fa’amasino i le lalolagi, a ia fa’aolaina le lalolagi ia te ia.”
Ua leva ona taumafai le Atua, mai lava i le amataga, e fesoasoani i ona
tagata ina ia amio lelei ma ola fa’apa’iaina. Peita’i, e lei malamalama lava
tagata i lea feau. Ona o lea, ua finagalo le Atua, e liutino tagata e ala i lona
Alo. O le liutino tagata o le Atua, e le o sau fa’apei o se fa’amasino e sasa’a
mai lona to’asā i tagata. Na fa’aali mai e Iesu - e ala i lona soifua, maliu ma
toetu manumalo - uiga moni lava o le Atua, aemaise le ituaiga mafutaga ua ia
finagalo e mafuta ai ma le tagata, ma lona tinoū e fesoasoani i le tagata ina ia
mafai ona ausia lea mafutaga. I lana galuega tala’i, e le maumauina le taimi o
Iesu e fa’amasino atu ai i tagata ma fa’asaga e fa’asala a latou amio leaga. A
ua filifili Iesu e fai ma malamalama, e susulu atu i le lalolagi ua pogisa ona o le
agasala. O lona malamalama ua mafai ai e le tagata ona su’esu’e loloto lava ia
te ia lava, ma fa’amasino lava ia ia te ia, ina ia liliu ese ai mai le pogisa, ae
maua le olioli loloto e soifua ai i le malamalama o le fa’atasi mai o le Atua.
O le aso o le Kerisimasi, o le avanoa e toe fa’asusulu mai ai le malamalama
i o tatou olaga, e le gata e talia ai tiga e afua mai ina ua su’esu’e le tagata lava ia
ia te ia, ae toe maua ifo ai ma le tagata moni lava, na sa tatau ona tatou ola ai
mai le amataga. Ia tatou ola i le malamalama na aumaia e Iesu e ala i lona
soifua na ofoina mai – le Alo o le Atua na afio mai e fa’aola, ae le o le fa’asala.
Tatalo: O le Pepe e Paia mai Peteleema, Iesu o le Alo o le Atua, ua fanau mai
i le aso nei, ia olioli ma fiafia ai, Amene.
Aso Toona’i - Tesema 26: “Mavae atu mai le oti i le ola”
Tusi Faitau - Ioane 5:19-27 (Passed from death to life)
Matua - f.24:“E moni, e moni, ou te fai atu ia te outou, e oo i le aso, ua oo nei
foi i ai, e fa’alogo mai ai e ua oti i le leo o le Atalii o le Atua; o e fa’alogo ai
foi, e ola ai i latou.”
A tatou talitonu i Lē na auina mai Iesu i lenei lalolagi, o lona uiga, ua tatou
feiloa’i ma le Atua. O le Atua lava na faia i tatou. Na te silafia lo tatou ola, e
ui ina fa’aleagaina e le agasala. O le Atua e fa’atasi mai pea ma i tatou, ma
82
fesoasoani mai ina ia mafai ona tatou manumalo i mea faigata uma o loo taofia
i tatou i le avea ai ma tagata moni e pei ona faia ai i tatou e le Atua. Ua fa’aali
tino mai e Iesu e ala i lona soifua, le ‘auala e mafai ona avea ai i tatou ma
tagata moni e pei ona finagalo ai le Atua. E mafai ona tatou alolofa atu i isi, e
pei o Iesu na alofa atu i isi. E mafai ona tatou fa’asoa atu le mafutiaga o le
lalolagi, e pei o Iesu na fa’asoa atu. E mafai ona tatou maua le ola e fa’avavau,
e pei ona maua foi e Iesu. Pau le mea, o lo tatou talitonu ia te Ia; talitonu i le
Atua, o loo fetalai i le mea moni. E pei ona fetalai Iesu, “E iloa foi e outou le
mea moni, e tuu sa’oloto foi outou e le upu moni (8:32).”
Tatalo: Iesu e, ua ou fa’atuatua i lau afio, na e soifua e ‘aumai le malamalama
i le lalolagi uma. Fa’afetai, ua ou ola ai i lea malamalama, Amene.
UA LIUTINO TAGATA LE UPU: KERISIMASI MA IOANE
2 – Le Mea Alofa Silisili a le Atua
Aso Sa - Tesema 27: “Iloa” (Knowing)
Tusi Faitau - Ioane 10:11-18 Matua - f.14: “O a’u nei o le leoleo mamoe lelei; ua ou iloa a’u mamoe, ua
iloa foi a’u e a’u mamoe.”
O Iesu o le leoleo mamoe lelei. Na te tausi lelei lana lafu. Afai e i ai se
mamoe ua le iloa, e saili lava se’ia maua. E ofo atu lona soifua e puipui ai lana
lafu. Ae silisili lava, ua na iloa lana lafu mamoe. Ua na iloa uiga ta’itasi o lana
lafu, i a latou amioga ma o latou fa’aletonu; na te iloa le mamoe e sē gofie; na
te iloa le mea o i ai le laufanua lafulemu; na te iloa nofoaga e ono osofa’i mai
ai se luko poo se manu fe’ai e afaina ai le lafu. A o le leoleo mamoe lelei foi, e
iloa o ia e lana lafu. Latou te iloa le lelei o le leoleo mamoe, na te tausia ma
puipuia i latou i taimi o faigata ma puapuaga; latou te iloa foi e ta’ita’iina i
latou i ala sa’o ma ala saogalemu i mea o i ai le vao mu’a.
O se ata matagofie lea i le mafutaga e mafai ona tatou maua ma Iesu. O i
tatou o totino uma o lana lafu. Ma, afai tatou te iloa le leoleo mamoe, e mafai
foi ona tatou talitonu ia te ia: na te tausia i tatou, e ‘auai fa’atasi mai ia te i
tatou, ma na te ta’ita’iina i tatou i le ala sa’o. Se meaalofa inā manaia!
Tatalo: O le Alii o lo’u leoleo mamoe lelei, e leai se mea ou te mativa ai, na
te ta’ita’i a’u i le olaga pito sili ona lelei ma ou manuia ai. Amene.
Aso Gafua - Tesema 28: “Fa’aolaina ae le o le fa’amasinoina”
Tusi Faitau - Ioane 12:44-50 (Saving not judging)
Matua - f.47b: “Auā ou te le’i sau e fa’amasino i le lalolagi, a ia ou fa’aolaina
le lalolagi.”
O lou fa’amanuia i se isi tagata, e le o se taumafaiga e fa’atupu ni lagona
lelei i le tagata poo se naunau ina ia tupu ni mea lelei ia te ia. O lou tatalo i le
Atua e fa’amanuia i le isi tagata, e pei o le ta’ita’ia o se pelu, lea e masani ona
83
va’aia i ata talafatu fa’asaeanisi, na te auina atu se utupoto o le malamalama e
suluia ma ulufia ai le isi tagata. O le fa’amanuia i le isi tagata, o le ta’ita’ia lea
o se utupoto ia te ia, e mafai ai ona tu’ufa’asolo mai le malamalama ma le
mana o le Atua ia te ia.
Nai lo le fa’amasinoina o isi, e tatau ona fa’amanuia atu i ai, ina ia mafai
ona fesoasoani ma galue le Atua e laveaiina le tagata mai le agasala. O le
fa’amanuia o le Atua i le tagata, e mafai ona suia ai le tagata, ma suia ai ma le
tulaga o loo ola ma soifua ai mo le lelei. Ia fa’aaoga le mana o le fa’amanuia
atu mo ē o loo mana’omia, ma ia galulue fa’atasi ma le Atua e lavea’iina le
lalolagi, ae ‘aua le maumauina le malosi e fa’amasino ai i isi.
Tatalo: Le Alii le Atua e, ia avea au fa’amanuiaga ma pogai o suiga i o matou
olaga, o suiga i le lelei a e lafoa’i i le leaga, Amene.
Aso Lua - Tesema 29: “Ala, upu moni, ola” (Way, truth, life)
Tusi Faitau - Ioane 14:1-7
Matua - ff.6-7a: “Ua fetalai atu Iesu ia te ia, “O a’u nei le ala, ma le upu
moni, ma le ola; e le alu atu lava se tasi i le Tamā, pe a le ui mai ia te a’u.
Ana iloa e outou o a’u, po ua iloa foi e outou lo’u Tamā....”
A tatou fa’amasani ma Iesu, ona tatou iloa lea, o loo tatou faimalaga.
Fa’asino mai e Iesu le ala e mafai ona fa’atuputele ai lo tatou mafutaga ma le
Atua. Peita’i, e le fa’asinoa mai e Iesu poo fea e maua ai lea ala, auā o ia lava,
o le ala. O le aumai o Iesu i totonu o tatou loto, e amata ai ona tatou mafaufau
e pei o ia, galue pei o ia, ma alofa atu e pei o ia. Fa’aali mai e Iesu le upumoni
e tau i le Atua: o Ia lava e to’atasi, o le upumoni a le Atua liutino tagata. Ma,
ua na ia aumaia le avanoa e mafai ona tatou ola sa’oloto ai: “ina ia tatou maua
le ola, ma ia maua atili ai lava (10:10).”
Fa’ailoa mai e Iesu le Tamā: “O le ua vaai mai ia te a’u, ua vaai o ia i le
Tama.(14:9).” A tatou faitau i tala e uiga ia Iesu ma ana fa’amalologa, o ana
a’oa’oga, o lona alofa, fa’amagalo atu, puapuagaina ma fa’atoilaloina le oti ma
le agasala, ma talitonu na soifua o ia i le upumoni; o iina tatou te iloa ai o
gaoioiga foi ia o le Tamā. O Iesu ua mafai ai ona tatou iloa le Atua, e le o se
Atua faigata e naunau i taulaga e fa’amalieina ai. E le o se Atua e mamao le
mea e afio ai, ma fiafia e taumamao ma tagata. O le Atua lea ua mafai ona
tatou iloa e ala ia Iesu, o le Tama e alofa fa’amaoni ia te i tatou ta’ito’atasi.
Tatalo: Le Atua e, o le alofa ua atoatoa, e silisili ‘ese lava, ua na fa’amalosia
lo’u agaga, lo’u ola, ma mea uma lava o i ai, Amene.
Aso Lulu - Tesema 30: “Tagata manumalo i le lalolagi” Tusi Faitau - 1Ioane 5:1-5 (Conquerors of the world)
Matua - f.5: “O ai sē na te manumalo i le lalolagi, pe afai e le o lē talitonu, o
Iesu o le Alo lava ia o le Atua?”
84
O nai aso ua mavae, sa tatou mafaufau ai i le Atua ma lona fa’atasi mai ia
te i tatou e ala i le malamalama e susulu atu i le pogisa. Peita’i, o le fa’atasi
mai o le Atua, e le na o le fesoasoani mai ina ia tatou susulu atu i le pogisa. Ae
ia tatou fa’atoilaloina ma manumalo i le pogisa. E fa’apefea ona tatou iloa lea
mea? Ona o Iesu, o le alofa liutino tagata o le Atua, na ia fetaia’i ma mea
leaga uma na faia e tagata ia te ia, ae lei fa’avaivaia ai lona alofa ma lona
fa’amagalo atu i tagata. Na manumalo Iesu ona e lei vaivai lona alofa ma lona
usiusita’i i lona Tamā, ina ua toe ofo atu i lona Tamā le galuega na auina mai
ai o ia e fa’ataunuu: o le fa’atoilaloina o le malosi o le agasala i luga o tagata –
e ala i lona maliu ma lona toetu manumalo mai le oti ma le tuugamau.
E mafai ona tatou manumalo i mea uma e lia’i mai e le lalolagi ma le amio
leaga o tagata ia te i tatou. E pei o le molimau a Paulo, “... e le mafaia e ia
mea uma ona fa’ate’a’eseina mai i tatou i le alofa o le Atua, o loo ia Keriso
Iesu lo tatou Alii (Roma 8:39).” Afai tatou te fa’atuatua i le mea na faia e le
Atua ia Iesu e mafai foi ona faia e le Atua ia te i tatou e ala i le Agaga Paia, e
leai se mea o i lenei lalolagi e mafai ona lūlūina i tatou.
Tatalo: Fa’afetai le Atua i lou mana e fa’atoilaloina ai fili uma. O lou
fesoasoani mai matou te fa’atoilaloina ai le leaga i le lelei, Amene.
Aso Tofi -Tesema 31: “Savavali i le malamalama” (Walking in the light)
Tusi Faitau - Ioane 8:12 Matua - f.12b: “O a’u nei o le malamalama o le lalolagi; o lē mulimuli mai ia
te a’u, e le savali o ia i le pouliuli, a e ia te ia le malamalama o le ola.”
A o’o i le taimi e fai ai la’u mea’ai i le afiafi, e muamua ona ou fa’amumū le moliga’o, ona ou tatalo lea i le Atua e fa’amalamalama lo tatou pouliuli ma
lavea’i i tatou mai mea faigata uma e tutupu mai i le pogisa o fa’aosoosoga, o
le toilalo, o puapuaga, gasegase o le mafaufau, ma isi mea leaga. E aafia i tatou
uma i le pogisa ma o le taimi lea e lamatia ai i tatou. E tofotofoina i tatou e
fesiligia le Atua, e lūlū lo tatou fa’atuatua, ma tatou fa’avaivai ai i le tausinioga
ma tumau ai i lo tatou amio leaga.
A tatou mulimuli ia Iesu, o lona uiga, ua tatou savavali i le malamalama. E
ui na loloto ma mafiafia le pogisa, ae tatou te agai pea i luma a o i totonu o le
pogisa, fa’atasi ai ma le mautinoa, o Keriso le malamalama o le lalolagi, na te
tauto’aluaina i tatou i mea pogisa uma tatou te i ai. O le a lava lou pogisa o loo
e nofo ai, poo le a foi le pogisa o mafatia ai i latou o loo e talosia, ia tatou la’a
atu i le tausaga fou ma taofi mau le Atua; ia tatou taofi mau Iesu le
malamalama o le lalolagi, ona tatou maua lea o le malamalama o le ola e
susulu atu i soo se pogisa. O le isi a’u tatalo, o le tatalo fa’afetai: “Fa’afetai
le Alii e, ona o le susulu o lou malamalama i mea uma e pogisa, ma e le mafai
e le pogisa ona manumalo ai.”
Tatalo: Ia fa’amalamalamaina le pogisa, le Alii e, auā o lou alofa ma lou
agalelei ua laveaiina ai i matou i mala ma faigata o le pouliuli, Amene.
Tautua Printing Press 1 Kanana Fou St, P.O. Box 1537
Kanana Fou, American Samoa 96799
(684) 699-9810
https://efkasonline.org